Read Khiamniungan Naga Apung 19 Bible Online

Apung 19 - Khiamniungan Naga bible

Apung 19

¹Tilai honghoi nime nungh asham Sodom nai shin, Lot, bekhan dongko mokkü noiküla. Apaüh ngüso epsiep tsakü chokü ngüso tü phete ao khu. Apa ngüso khako kaukü napkü

²ta ngiom, “Jü APAOU nouso, ngü nungko asam yathsüoau shikü noin. Tsüojinyangkü jütsamai ashi. Asam hok tsawan küta lüsoh to nungko ashaman. Ahom beta asam chuküta asam yamai khuau shio-e.” Lüko ngüsoüh thalakü ngiom, “Nyah, sam asoh chikü nung noknio kengchiai noi-e.”

³Apaüh tsülaokü ngüso tü koja, küta phikü lu ngüso apako apa tsamai khuha. Loto apa tsamkiso tü themtsai intso tsai sanao ngiom, naiuso loüh mesanhoi hau eheshiu meikü khemsanao ngiom. Tilai nung khemsan ngüsoüh heshiu.

⁴Mesanhoi mosaikü nou khako, Sodom khaiunia nousoüh nung tsam lemlowan. Noknio nouko noitsün khaiunia ehen asong chikü nungko hakü noiküla.

⁵Ngüsoüh Lot kengchiai jonshi küta sangh, “Lüsoh niko shamao shitsün khaiunia nouso tiai noin? Sam dongai kengchiai nialokü ashi!” Sodom khaiunia nousoüh ngüso ko ajisiwop chhiau aiukü noiküla.

⁶Lot kengchiai shiküta apa phiai koukhan kiapkü wan.

⁷Apaüh ngüso tü ngiom, “Haiso, nungti tsümeikü nou chhi ngüso tü lachhi ta ngo asam tü kojaji!

⁸Athaplu, ngo jüthso menyiuthso nime losaokü asangting taim. Ngo ngüso asam dongai kengchiai niakü shi-e, küta asamüh tilüsong aiuji nung ngüso ko chhiau shio-e. Lüko nung khaiunia nouso tüto titso lachhi; ngüso jü tsamai mesan noin, naiuso ngo ngüso kiploau noin.”

⁹Lüko ngüsoüh ngiom, “Sam yam ainou lüsoian, ni gohmao khaiunia! Ti chhi-e nung sam hau chiteau ni sau? Sam yam ainou lüsoian, tsüdekünaito samüh ngüso tü chhitsün tü tekkü tsaokü ni tü chhi-e.” Ngüsoüh Lot phiai tenshi küta kou lopek ao khaai khu.

¹⁰Lüko tsammongai noitsün khaiunia nime nou pha tsatshiküta Lot tsamai tenthiowan; küta kou nou kiapan.

¹¹Nungaih ngüsoüh kengchiai noitsün khaiuniahoi tü niopek nou shiuh, nungtiphe ngüsoüh koukhan nou tsüepsan.

¹²Nung khaiunia nime nou Lot tü ngiom, “Nung noknio nouko ni nou melothsoso si menyiuthsoso, naiuso athsoso kihatsün le hai, tsüdekünai amao posidei ajantso kihkü noinai, ngüso nung ainou lüsoian-i,

¹³tiautenai samüh nung athang lomowane. APAOU nou nung khaiunia nouso thako lochi lotsaotsün thatü thsüokü lula-iu, küta sam Sodom lomowanao hongshikü noin.”

¹⁴Nungaih khaiunia sauhaiüh Lot menyiuthsoso tsamsigoh yangao noin ngüso dongai khuküta ngiom, “Liukü akhemlo, küta nung ainou asoian; APAOU nou nung athang lomowane.” Lüko ngüsoüh nungh apaüh alo lonyaiji ta yang.

¹⁵Ah siochan honghoi nou apa liuliu-iau ngiom, Lot aliuliu. “Lo shakta!” “Atsammongnyiu naiuso athso menyiuthso nime nou nialokü lüsoian, nungaito ni apim aa nou nung noknio mowan nai tsümo-e.”

¹⁶Lot henyinyikü noiküla. APAOU nou apa tü tsüojinkü yangkiu, nungtiphe khaiuniahoi nou apa, apa tsammongnyiu, naiuso apa menyiuthso nime pha nai thalokü nung noknio ainou niashi.

¹⁷Nungaih honghoi ongko tsaküh ngiom, “Apim aa thaiutha lükhulou, nungaito ni tsü-eane.”

¹⁸Lüko Lotüh thashikü ngiom, “Nyah, asonghoi, tsüojinyangkü samtü nung chhiau lakiu.

¹⁹Asamüh jü thaiutha chhi amei asong chhianiu naiuso jü aa kipsaniu. Lüko king nouso yam laiukü khukü noin, aküothe nou ngü thalowane, naiuso ngo nung mosaokün khako eane.

²⁰Ni nungai nok ehenthso tsak epjimo? Nung ashim nou omane. Ngo nungai khu-e, ni nung athang ehentso tsaklu ta epji naiuso ngo aalokü noi-e.”

²¹Apaüh thalakü ngiom, “Mei-e, ngo mongchioji. Ngo nung nokthso tsülomo-e.

²²Liuliukü! Lükhaolao! Ni nungai mothasaokün lektso ngo ti chhiau tsüshio-e.” Lotüh nung nok nou tü ehen ta ngio nou shioko, nung nok nian Zoar ta nian.

²³Lotüh Zoar ngoi-iunai nung ajepek tao noiküla.

²⁴Alekta APAOU nou Sodom naiuso Gomora noknio nouso khaiuko taoson lung in nyai ah- ouli hong,

²⁵küta apaüh nung noknio nouso naiuso tsamei goh apem, naiuso noknio nouko noitsün apem, naiuso goh nai nyimsantsün apem mowan-i.

²⁶Lüko Lot tsammong- nyiuüh phiai lapkü thapshiküta jem kheam tsak hau iulawan.

²⁷Nungthan nyi ahom beta nung athang nai liuliukü khukü APAOU khako apa tsakü noiküla.

²⁸Apaüh Sodom naiuso Gomora tü thapthiokü tsamei goh apemai thaplukü nung goumchi inkhao nou lung piakü jektsün taoko sungtsünli ep.

²⁹Goa nou Lot kihtsün tsamei noknio nouso lothean, apaüh Abraham mongai taiu küta Lot hau aalokü solo-i.

³⁰Tiautenai Lot Zoar nai kih au hatkü noiküla, nungtiphe apa naiuso menyiuthso nime nouso king nai sung küta ken tsak ko kih.

³¹Thso yamchong nou apa nio tü ngiom, “Sam po sonanji, naiuso sam tsamsigoh yangküta thsohai kihaau nung goumchi apem nai khaiunia nou tsünoi.

³²Ashi, samüh sam po theng nou shentok ko, nungtiphe sam apako saiha küta apa ainou thsoso lelo haau shio-e.”

³³Nungsoh nai ngüsoüh apa hau asai ao theng nou shen, küta niochong nou apa ko em, lüko apa thatü tokkatphe apaüh nung chhi tsünge.

³⁴Nungthan nyi nai niochong menyiuthso nou apa nio tü ngiom, “Ngo apako müso saihakü noiküla, loüh lüsoh lüko jam apa tokkati ko, küta ni apako lüsaiha. Naito sam pungkü nou sam po ainou methso taiu-e.”

³⁵Nungtiphe nungsoh ngüsoüh apa tokkati, küta niophi nou apako em. Loüh apa thatü tokphe, apaüh nung chhisiya nou tsünge.

³⁶Nungti Lot menyiuthso nime nemtso ngüne poteng ainou pem tsükengkü iulan.

³⁷Niochong nou melothso tsak chet, apa nian Moab ta jon. Apa lo Moab hai chetsinyimtsün po noin.

³⁸Niophi nou lüko melothso tsak chetkiu, apa nian Benami ta jon.