Read Khiamniungan Naga Apung 2 Bible Online

Apung 2 - Khiamniungan Naga bible

Apung 2

¹Nungli maou, goh, naiuso nungko noitsün apem shankhem.

²Chinyatnyi nouko nai Goa nou Apaüh shantaiu nou apem chhisiya khem, naiuso Apaüh shankü shitsün chhisiya ainou chinyatnyi nouko shio-alou.

³Nungtiphe Goa nou chinyatnyi nou ouk kiu, naiuso nungh mothikü losiokiu. Tiautenai nungh ajekhaiu ko Goa nou apa chhi shankü shitsün chikü ainou chhikhemkü noiküla.

⁴Tilai APAOU Goa nou goum naiuso aün shan,

⁵goh nai paisam aosam titso tsünoiküla, naiuso ti chihle khiamle mosungh, tiautenai apaüh ah ou nou mohongkü noiküla, naiuso goh nou tü chhiao sau tsünoiküla.

⁶Naiuso goh kheiai nou ah paithsao nou sungh küta goh apemai khiamle nou haolutkiu.

⁷Naiuso APAOU Goa nou goum ainou pujah nou khaiunia shan, naiuso aa isa nou apa ngankhan nai sathiokiu, naiuso khaiunia nou aa onthso noitsün tsak iula.

⁸Naiuso APAOU Goa nou Eden nai aimong tsak shan, küta meshenüh shantsün khaiunia nungko taiukiu.

⁹Naiuso goh nai APAOU Goa nou aluao meitsün naiuso eheao thaiutha paisam amei apem samsan-i, aa paidong lüko aimong awem nai naiuso amei si tsümei chikü ngetsün pai apaüh nungko samsan-i.

¹⁰Eden nai aimong nou tü khiam thsaluttao haiu tsak chetsan, naiuso Eden tsai ai nungh khiam haiu püle ao janpek.

¹¹Ayating haiu nian nou Pishon, nung haiu nou chaiou lakkeng noitsün Habila goh lemjeikü noin.

¹²(Naiuso nung goh nai chaiou lakkeng naiuso angan nyamtsün naiuso lung apiamai nouso epji.)

¹³Haiu nime nou nian Gihon, nungh haiu nou Kus goh lemkü noin.

¹⁴Haiu süme nou Tigris haiu noin, nungh haiu nou Asiria goh ajepek dongai tsanglükhunji; naiuso haiu püle nian nou Eufrates haiu noin.

¹⁵Naiuso APAOU Goa nou khaiunia nou nialokü shiküta, Eden Aimong nai chhi chhiau naiuso jimao taiukiu.

¹⁶APAOU Goa nou khaiunia nou tü ngiokhem kiukü ngioji, “aimong nai noitsün pai pungkü da eiusantsün pai-eiu ni heau shio-e;

¹⁷lüko amei si tsümei ngeloau kiutsün pai ainou eiu ni lahe; tiautenai ti ajekhaiu ko ni nung he-e, nungnyilu ni atsüoting ean-e.”

¹⁸Naiuso APAOU Goa nou ngiom, “Khaiunia thaiutha pemsa kih au tsümei, Ngo apa thaiutha hau ahachutsün waokü tsak shan-e.”

¹⁹Nungtiphe APAOU Goa nou goh ainou pujah loukü goumchi thainian chikü naiuso ajeikeitsün waio nouso chikü shanküta apaüh tilüsong nian niankiu-e ta khaiunia dongai nialoukü shin, naiuso khaiunia nou aa thainian pungkü ti nian jonkiu nungli nianao iula.

²⁰Nungtiphe khaiunia nou waio nouso chikü naiuso thainian nouso chikü nian niankiu, lüko nungso tsaktso apa hachuau waokü tsünoiküla.

²¹Nungaih APAOU Goa nou khaiunia nou niongao thatü chiikü ngao-i kü apa saila-i, küta apaüh khaiunia ainou ou tsak losankü nungh athang nou lophangkü wan.

²²APAOU Goa nou khaiunia ainou losantsün ou nou Menyiu tsak shan, küta apa dongai nialoukü shin.

²³Nungaih khaiunia nou ngiom, “Aphiteng nai nungko ngüli nou tsak noin- Jü ou ainou losantsün ou, naiuso jünyih ainou losantsün nyih. Apa nian ‘Menyiu’ ta noi-e, tiautenai apato melo ainou losankü shan.”

²⁴Nung shioko melo nou meshen po naiuso meshen nyiu wankü, meshen tsammongnyiu ko jeiaikü noiji, naiuso ngüso nyih tsak hau iulakü noiji.

²⁵Nungaih melo si menyiu ngüne tsosa noiküla, lüko ngüso amiam tsünoi.