Read Khiamniungan Naga Apung 21 Bible Online

Apung 21 - Khiamniungan Naga bible

Apung 21

¹APAOU nou apaüh thaloutsünli Sara ouk kiu,

²apa pem tsükengkü iula küta asun yamai Abraham hau melothso tsak chetkiu. APAOU nou apa chetao ataothat kiutsün taotengko nung melothso nou chetkiu.

³Abrahamüh apa nian Isak ta niankiu,

⁴naiuso tilai Isak ajekhaiu petjeinyi shekü iula, Goa nou thoiluttsünli Abrahamüh apa tü tipankiu.

⁵Tilai Isak chetlut Abraham achetpon 100 noiküla.

⁶Saraüh ngiom, “Goa nou ngü hau amongling naiuso anyaitsün kanjikan kiu-iu.”

⁷Apaüh nung ngioshin, “Sauüh Abraham ta Saraüh methso nyao cheppikü tsade ta ngio-ela? Lüko apa asun yamai ngo apa hau melothso tsak chetkiu-iu.”

⁸Methso nou shekü sung, küta apaüh nyaochep leantsün ajekhaiu ko nai, Abrahamüh sümai asong tsak shan.

⁹Nyitso Ismael, sau Ijip hai nou Hagarüh Abraham tü chetlut, apa Sara thso Isak ko lomhekü noiküla.

¹⁰Saraüh ngüso epküta Abraham tü ngiom, “Nung menyiu tsamki naiuso apa thso ne amao ai lühongan. Sübao jü thso Isaküh teng kamao noin nung ajengtsaiu ko nou nung nyiuhai nou ti haoson tsüepela.”

¹¹Nung ngio nou Abraham aalu tsünoitengkü yangelat, tiautenai Ismael lüko apa thso noiküla.

¹²Lüko Goa nou Abraham tü ngiom, “Melothso nou naiuso atsamki Hagar thaiutha layangelat. Saraüh ni tü tilüsong ngioji nung lüchhi, tiautenai Isak tsangkülu ngo thalotaiutsün thsaosithsoso ni eppe.

¹³Menyiu tsamki thso hau lüko ngo methso piakü kiu-e, naiuso ngüso mele tsak iula-e. Apa lüko athso noin.”

¹⁴Nungthan nyap nai beta Abrahamüh Hagar hau eheshiu intso naiuso khiam meankü napkü nyikhun nekong tsak kiu. Apaüh methso nou nyiuhai ngamtha nai loklutkiu küta apa hongan. Apa pungekü khuküta Bersheba aodangkü nai khekei.

¹⁵Tilai khiam shiukheman, apaüh methso nou paisokhem tsak ko le-an

¹⁶küta apa phayam tsom tsak thatso pungekü moknoi. Apaüh meshen chija yanghekü ngiom, “Ngo jü thso eantsün tü thapao tsüsom.” Apa nungai moknoitsünko, apa ashap ao yachu.

¹⁷Goa nou methso shaptsün lula, küta aün ainou Goa hongthon nou Hagar tü chitekü ngiom, “Ni ti inüh angjaji Hagar? Tsühatkü lüthe. Goa nou melothso shaptsün lula-iu.

¹⁸Achüo, lükhu küta apa alekchu, naiuso apa mong lütsamlo-i. Ngo apa thsaosithsoso ainou mele asong tsak shane.”

¹⁹Nungaih Goa nou apa niovei sopsat naiuso apaüh temkhao tsak ep. Apa khuküta nyihkhun nekong miankü khiam thioküta nung melothso hau intso thioshen.

²⁰Melothso nou sungjikan nai Goa apako hakü noiküla; apa Paran liutsa nai kih, naiuso Uotha po tsak iula.

²¹Apa nyiuüh apa hau Ijip hai menyiu tsak yamkiu.

²²Nung taoko nai Abimelek apa süpaihoi niatsün Phikol ko hakü khuküta Abraham tü ngiom, “Achhisiya apemko Goa hakü noin.

²³Nungtiphe ngo jüthsoso, tsüdekünai jü thsaosithsoso tsüsapthio-iau ni nungai Goa khako athalu-e tsak ashan. Ngo niko ngiotsüo noikü shin, nungtiphe ni lüko ngüko naiuso tisübao ni kiutsün goumchi noin nungko ngiotsüo noiau athalou.”

²⁴Abrahamüh ngiom, “Ngo thalouji.”

²⁵Abimelek tsamkisoüh tisübao temkhao juohean nung thaiutha Abrahamüh Abimelek tü thut.

²⁶Abimeleküh ngiom, “Nung sauüh chhin ngo tsünge. Ni ngü tü nung thaiutha lachite, naiuso nung ayating ngo luji.”

²⁷Nungaih Abrahamüh Abimelek hau onnemok naiuso won ajantso kiukü nungne nime nou athalu-e tsak shan.

²⁸Abrahamüh apa onnemok ong ainou apem chinyat mothikü shingsankü taiu;

²⁹nungaih Abimeleküh apa tü sangkü ngiom, “Ni nung tiau ta chhiji?”

³⁰Abrahamüh thalakü ngiom, “Nung onnemok chinyat nouso alou. Nung chhi nou, Nung temkhao thaiutsün ngo tsak noin ta ni monglamha-e.”

³¹Nungtiphe nung athang nou tü Bersheba ta jon, tiautenai ngüso nime jetko athalu-e ngiomong shingetsün tsak noiküla.

³²Ngüsoüh nung Bersheba nai athalu-e shankütün phiai Abimelek si Phikolne Filistia nai laokü khu.

³³Nungai Abrahamüh Bersheba nai tamarik pai tsak thom küta Athon tsüyang Goa APAOU amkham.

³⁴Abraham Filistia goumchi nai atao laiukü kihküla.