Read Khiamniungan Naga Apung 23 Bible Online

Apung 23 - Khiamniungan Naga bible

Apung 23

¹Sara aakihlaiu pon 127 kih.

²Apa Kanan goumchi Hebron nai ean, naiuso apa eantsün shioko Abraham mongsaiukü noiküla.

³Abrahamüh apa tsammongnyiu mea letaiukü, Het hai dongai khu, küta ngiom.

⁴“Ngo nungai asam ongko gohmao khaiunia tsak kihakü noin, ngo jü tsammongnyiu khananao goh intso ajankiu.”

⁵Ngüsoüh thalakü ngiom,

⁶“Sam tü anglu, APAOU, Samüh nitü oukong noitsün ahei tsak ta thapji, sam etam ameiting nai atsammongnyiu lükhanan. Ni apa khananao, sam sau lünou nihau etam tsak kiuao monglingkü noi-e.”

⁷Nungaih Abrahamüh ngüso khako kaukü napküta ngiom,

⁸“Asamüh ngü hau jü tsammongnyiu nungai khananiao mongchio naito, Zoar thso Efron tü,

⁹Makpela Lungken, sübao apa gohthun shimkü noin nung ajankiu ta asangkiu. Lo asam khako, nung gohmai thomkü lokü ngühau ajankiu ta asangkiu, nungaito ngo nung etam gohthang ao theau shio-e.”

¹⁰Efron pem lüko nung noknio bekhan dongko Het hai akamshihoi ongko moknoihakü noiküla, apaüh khaiunia pungkü nou lulakü thalakü ngiom,

¹¹“Anglu, APAOU, ngü nihau gohthang apem naiuso nungko hakü Lungken nou kiu-e. Nungko jükhaiuniaso khako, ni atsammong- nyiu khananao ngo nung gohthang nou kiu-e.”

¹²Abrahamüh Het hai khako kauthio küta

¹³khaiunia pungkü nou lulaao lümeikü Efron tü ngiom, “Ngo ni tü sangji, tsüojinyangkü anglu, Ngo gohthang apem tuh-e, Amai nou alo, küta ngo jü tsammongnyiu nungai khanane.”

¹⁴Efronüh thalakü ngiom,

¹⁵“APAOU, goh nou tangkason tsom püle mailu noin, je jetko nung thaiutha ti? Atsammongnyiu nungko lükhanan.”

¹⁶Abrahamüh mongchio küta Efron khaiunia hoiüh lulakü ngiotsün chai mai nou chaile hai tsoithat ko wekü tangkason tsom püle nou thatkiu.

¹⁷Nungti thekü Mamre tsamei tü ajepek nai noitsün Makpela nai Efron goh Abraham ün jengtsaiu hao iula. Nung goh, Lungken, goh tü suntsün pai nouso athun saokü Abraham ün iula.

¹⁸Het hai apem sauhai nung akamshi nai noiküla nungsoüh nung Abraham ün jengtsaiu ta mitha kiu.

¹⁹Nungaih Abrahamüh apa tsammongnyiu Sara Kanan goumchi Lungken nai khanan.

²⁰Nungtiphe goh naiuso Lungken sübao Het hai ün noiküla, nung Abraham jengtsaiu etam goh tsak iula.