Read Khiamniungan Naga Apung 24 Bible Online

Apung 24 - Khiamniungan Naga bible

Apung 24

¹Loto Abraham thatü sonankü iula, naiuso apa chhisiya alum nai APAOU nou apa ouk kiu.

²Apaüh taiutsün alum khaiuko paotsangtsün asheting tsamki tsak tü apaüh ngiom, “Apha jü siokha jetko ataiu küta ngiomong shinge tsak ashan.

³Ni jüthso thaiutha tsammongnyiu tsak Kanan nai noitsün khaiunia ong ainou tsüshinge ta Aün naiuso Goum Goa, APAOU nianko ngiomong shinge tsak shanao aiuji.

⁴Ni ngo chettsün goumchi nai laokü khuküta jü thso Isak thaiutha tsammongnyiu tsak jü tsammongso ong ainou kankü ashi.”

⁵Nungaih tsamki nou sangshikü ngiom, “Nung menyiuthso nou apa tsam leanküta ngüko nung goumchi nai tsüyaha-e tünai, Ngo athso ni shitsün goumchi nai laokü honge süne?”

⁶Abrahamüh thalakü ngiom, “Ni jü thso nungai laokü tsühonge ta lüyang!

⁷APAOU, Aün Goa nou ngo jüpo tsam ainou jonsan, naiuso jü tsammongso goumchi ainou niasan, küta apaüh jü thsaosithsoso hau nung goumchi kiu-e ta mongkü thalou. Apaüh meshen hongthon akhako honge, nungai ni jü thso thaiutha tsammongnyiu tsak epao shio-e.

⁸Nung menyiuthso nou niko aikü yahaao tsümongchiokü naito, ni nung athalu-etsün ainou sokkiu. Lüko ni jü thso ti thaiutha ko lünou nungai laokü tsünialükhunela.”

⁹Nungtiphe tsamki nou apa pha Abraham siolak jet nai taiukü, meshen APAOU, naiuso Abrahamüh ti saokü noiküla nung chhiao ngiomong shinge nou shan.

¹⁰Tsamki sau Abraham jengtsaiu khaiuko APAOU noiküla, apa ut che louküta ajenapki Mesopotamia noknio tiai Nahor kihküla nungai khu.

¹¹Tilai apaüh nungai sao-iu, apaüh noknio bechi nai ut nouso asingkau nou thaothiokü noi-i. Menyiuhoi khiam khaiu shitsün atao nung anyiwem yankü noiküla.

¹²Apaüh misao sao, “APAOU, jü APAOU Abraham Goa, ngü hao lonyi ashio nou a-epi, naiuso jü APAOU tü ni thaloutsün ataiukiu.

¹³Nung noknio ainou mesohoi khiam khaiu shiao noitsün temkhao dongko ngo nungai noin.

¹⁴Ngo ngüso ongko tsak tü ngio-e, ‘Tsüojinyangkü akhiam meng nyapkü ale-i, küta ngü hau ashiu au akiu.’ Lüshiu, küta ngo a-utso hao lüko khiam kankü shi-e ta apaüh ngio naito, atsamki Isak thaiutha ni chosantsün apa tsak anoi-i.Nung thawao naito, jü APAOU tü athalou nou taim ta ngo nge-e.”

¹⁵Apa misao mokhemloukün khako, Rebeka apa sangdong khaiu nai khiam meng kankü shisao. Apa Abraham nio Nahor naiuso tsam- mongnyiu nou Milka ngüso Bethuel thso menyiuthso noiküla.

¹⁶Nung mesothso nou athap ao thatü meikü asangting tsak noiküla. Apa temkhao nai saokü khiam meng meankü khaiulokü laokü shin.

¹⁷Tsamki nou apako pheteao jingkü khuküta ngiom, “tsüojinyangkü akhiam meng ainou ngü hao ashiuau akiu.”

¹⁸Apaüh thalakü ngiom, “Lüshiu, APAOU,” naiuso shakta apaüh meshen sangdong khaiu ainou nyapkü semlo küta apaüh shiu.

¹⁹Tilai tsamki nou khiam shiukheman, apaüh ngiom, “Ngo loüh a utso hau khiam kankü shi-e küta ngüsoüh aiutsünli apem ngüsoüh lüshiu.”

²⁰Apaüh khiam meng nouso thainian nouso hau shenkü shakta lokeng küta apa utso apem hau moshen-khemkün lektso temkhao nai khiam piakü khaiusanao khaolaokü khu.

²¹APAOU nou apa chhi nai ashio nou kiujimota tsamki nou menyiuthso nou ta nyankü thapkü taiu.

²²Tilai apaüh chhi nou khem, tsamki nou chai apia mai lakkeng daokhiap nou apa ngan nai lolut naiuso apa sang nai lakkeng lak nime lakthio kiu.

²³Apaüh sangkü ngiom, “Tsüojinyangkü apo sau ngü hau achite. Apa tsamai jü khaiuniaso naiuso ngo sotsüo aaluao tsampai noimo?”

²⁴Apaüh thalakü ngiom, “Jü po Nahor si Milka ne thso nou Bethuel noin.”

²⁵“Nungai sam tsamai tsokap si jangchih saiukü noin, naiuso nungai asam thaiutha anoiau athang noin.”

²⁶Nungai tsamki nou singkaongam langthiokü APAOU nou tü amkham.

²⁷Apaüh ngiom, “APAOU lülom, jü APAOU Abraham Goa, sauüh jü APAOU tü apa athalo monglamkü taiukü shin. APAOU nou ngü jü APAOU tsammongso dongai saitha yam niakü shin.”

²⁸Nung menyiuthso nou apa nyiu tsamai kopkü khukü nung ngiolat apem chiten.

²⁹Rebeka dei Laban ta niankü tsak noiküla, apa kengchiai temkhao dongai Abraham ün tsamkiso noitsün nai kopkü khu.

³⁰Labanüh apa nio ngan nai lakkeng daokhiap naiuso sang nai lakkeng lak nouso ep, naiuso apaüh tsamki nou apa tü ti ngiom, nung lula. Apa Abraham tsamki sau temkhao shimkü apa ut so dongko tsakü noiküla khukü ta,

³¹ngiom, “Ngü ko hakü tsamai ashi. Ni APAOU nou ouk kiutsün khaiunia tsak noin. Tiauta ni nungai kengchiai tsakü noin? Ngo jütsamai athaiutha tsampai tsak khemkü taium, naiuso nungai a utso thaiutha lüko athang noin.”

³²Nungtiphe tsamki nou apa tsamai khu, naiuso Labanüh ut nouso thsa yaman kiu küta ngüso hau tsokap naiuso achih nou wao. Nungai apaüh Abraham ün tsamki naiuso apa khaiuniaso hok tsawanao khiam kankü shin,

³³tsamki nou ngiom, “Ngo ti ngioau noin nung mongiokün lektso to ngo tsühe-e.” Labanüh ngiom, “Lüngio.”

³⁴Apaüh yalou, “Ngo Abraham tsamki noin.”

³⁵APAOU nou jü APAOU phopkü ouk kiu-iu, naiuso apa memei khaiunia tsak shankiu-iu. Apaüh apa hau onnemok hoi naiuso won hoi, naiuso tsam thainian nouso, tangkason, lakkeng, melo naiuso menyiu, ut hoi naiuso gado hoi, ouk kium.

³⁶Sara, jü APAOU tsammong- nyiu, tilai apa sonan apaüh melothso tsak chetkium, naiuso jü APAOU üh apa hau meshenüh taiutsün alum kium.

³⁷Jü APAOU nou ngü hao ngiomong shingekü aikü athalu-e tsak angio angao thoilut. Apaüh ngiom, “Jü thso thaiutha tsammong- nyiu Kanan goumchi ainou menyiuhoi ong ainou to lacho.

³⁸Nungliko to, Jü po ün khaiuniaso dongai, jü tsammongso dongai khukü apa thaiutha tsammongnyiu tsak lücho.

³⁹Naiuso ngo jü APAOU tü sangkü ngiom, ‘Meso nou ngü ko aikü tsüshi hanai titi the-e?’

⁴⁰Apaüh thalakü ngiom, ‘APAOU, sübao ngo asai angio angji, apaüh meshen honghoi niko hakü honge küta nihao ashio nou kiu-e. Ni jüthso thaiutha tsammongnyiu tsak jü khaiunia ongko naiuso jü po tsammongso ainou eppe.

⁴¹Ni ngiomong shinge ainou thakhuau yam tsaklu noin. Ni jü tsammongso dongai khunaito, naiuso ngüsoüh angio tsüangkü naito ni nung ainou sok-iu.’

⁴²“Tilai ngo temkhao dongai shin, ngo nungti misao saokü noiküla: ‘APAOU, jü APAOU, Abraham Goa, atsüojinyangko ngo ti chhiji nungko ashio nou akiu.

⁴³Ngo nungai temkhao nai noin; tilai meso tsak khiam khaiuloau shi-e, ngo apa khiam meng ainou ngü hao ashiuau akiu ta sao-e.

⁴⁴Apa mongchio küta jü ut so thaiutha lüko khiam khaiushen ha naito, jü APAOU ün thso thaiutha tsammongnyiu tsak nou ni chosantsün nung noi-e sao.’

⁴⁵Ngo nyankü misao loutsün mothunkün khako, Rebeka apa sangdong khaiu nai khiam meng kankü shiküta khiam khaiu au temkhao nai sao. Ngo apa tü ngiom, ‘tsüojinyangkü ngü hao khiam ashiuau akiu.’

⁴⁶Apaüh shakta apa khiam meng sangdong khaiu ainou kaukü napküta ngiom, ‘Lüshiu, küta ngo loüh a ut so hao lüko khaiushene.’ Nungtiphe ngü shiu, naiuso apaüh ut hoi hao lüko khaiushen.

⁴⁷Ngo apa tü sangkü ngiom, ‘Apo sau?’ Naiuso apaüh thalakü ngiom, ‘Jü po Nahor si Milka ne thso Bethuel noin.’ Nungai ngo lakkeng khiapthso nou apa ngan nai lolut, naiuso lakkeng lak nou apa sang nai ngiolut.

⁴⁸Ngo kaukü napkü APAOU tü amkham. Jü APAOU Abraham Goa, sauüh ngü jü APAOU ün thso thaiutha tsammongnyiu epao apa tsammongso dongai saitha nialut ngo APAOU nian lomji.

⁴⁹Naiuso lo asamüh jü APAOU tü tsüojinkü, naiuso atsüoting kankei-e tünaito, ngü tü angio sai: ngo uai tsüdekünai tsatai phokleshi-e.”

⁵⁰Laban si Bethuel neüh thalakü ngiom, “Nung chhisiya APAOU ainou shiphe, nung athalou tsak loau sam chhi tsüde.

⁵¹Rebeka nungai noin, apa niakü lükhu, APAOU apa pemüh ngiotaiu nouli, apa ni nou APAOU ün thso tsammongnyiu lü-iula.”

⁵²Tilai Abraham tsamki nou nung lula, apa kaukü napküta APAOU tü amkham.

⁵³Nungai apaüh neshe naiuso tangkason, naiuso lakkeng chaiou nou losan küta nungso Rebeka hau kiu. Loüh apaüh adei si anio nouso hao lüko paopei apiamai nou kiu.

⁵⁴Nungai Abraham ün tsamki naiuso apako ha nouso khaiuniahoi nou heshiu, naiuso asoh nou nungko aalokü wan. Tilai ngüso ahom chunge, “Ngü jü APAOU dongai laokü khu.”

⁵⁵Lüko Rebeka deisiniosoüh ngiom, “Menyiu nou sam ko anojet tsak tsüdekünai che nyi anoiha-i, nungphiai apa khuau shio-e.”

⁵⁶Lüko apaüh ngiom, “Sam lanoi-ishi. APAOU nou jü chhi ashiolotsün tsak kiu-iu, ngü jü APAOU dongai laokü khuko.”

⁵⁷Ngüsoüh thalakü ngiom, “Samüh menyiuthso nou jonko küta apaüh lüko ti ngio-e ta taiuko.”

⁵⁸Nungtiphe ngüsoüh Rebeka jon küta sangkü ngiom, “Ni nung khaiunia ko hakü khuau aiujimo?” “Aiuji” ta apaüh thalan.

⁵⁹Nungtiphe ngüsoüh Rebeka naiuso apa akeng tsammongso tsamki Abraham ün tsamki naiuso apa khaiuniaso ko khuha-i.

⁶⁰Naiuso ngüsoüh Rebeka hau nung ouk ngioyak nouko kium. “Nyiuhai, ni hengsiheng nyiu tsak lüthe! Athsaosithsosoüh ngüso ehoi noknioso lüshiolo!”

⁶¹Nungaih Rebeka naiuso meso nouso Abraham ün tsamki ko ut nouso chiai noikü khuau khemlou, küta ngüso chikü tsalokü khu.

⁶²Isak shikü, “Ngü eptsün Aa Tsak ün Temkhao” ta ngiotsün liutsa nai taiukü noiküla, naiuso apa Kanan ajepekki goumchi nai kihküla.

⁶³Apa asham beta eiu nai tsakeikü khu, nungai ut nouso shitsün ep,

⁶⁴Tilai Rebekaüh Isak ep, apa ut chiai nou saom

⁶⁵küta Abraham ün tsamki tü sangkü ngiom, “Nung eiu nai sam dongai shikü tsakeitsün khaiunia nou sau?” “Apa jü APAOU” ta tsamki nou thalakü ngiom. Nungai apaüh apa kha sang nai khitsün ne nou lopok.

⁶⁶Tsamki nou Isak hau apa chhisiya alum chiten.

⁶⁷Nungaih Isaküh apa nyiu Sara kihtsün nejenkhio nai Rebeka nialoukü nap, naiuso apa meshen tsammongnyiu ao iula. Isaküh Rebeka tsüojin, naiuso apa nyiu mowantsün ainou aalu ep.