Read Khiamniungan Naga Apung 25 Bible Online

Apung 25 - Khiamniungan Naga bible

Apung 25

¹Abrahamüh tsammongnyiu amao tsak tsamsigoh yangshi, apa nian Ketura noiküla.

²Nung nyiuhai nou ta Zimran, Jokshan, Medan, Midian, Isbak naiuso Shua chetlut.

³Jokshan tü Sheba si Dedan ne chetlut, naiuso Dedan thsaosithsoso -Ashurim, Letushim, naiuso Leunim noiküla.

⁴Midian thsoso: Efa, Efer, Hanok, Abida naiuso Elda noiküla. Nungso apem Ketura thsaosithsoso noiküla.

⁵Abrahamüh meshenüh taiutsün alum Isak hau kiuwan,

⁶Abraham apa aa noi taoko apaüh amao tsammongnyiu nou chetlut kiutsün thsoso hao lüko paopei kiuwan, küta apaüh nungso apa thso Isak ainou pungekü ajepek goumchi nai hongan.

⁷Abraham aakihlaiu pon 175 sonkü kihküta ean.

⁹Apa Isak naiuso Ismael neüh Het hai nou Zoar thso Efron goh tuhlo taiu nou Mamre tsamei tü ajepek nai noitsün goh Makpela Lungken nai khanan.

¹⁰Nung goh nou Abrahamüh Het haiko tuh, küta apa naiuso apa tsammongnyiu Sara ne nemtso nungko khanan.

¹¹Abraham ean kü phiai, Goa nou Isak “Aa noitsün tsak ün temkhao sauüh ngo epji” ta jonji nungh athang shimkü kihküta apa ouk kiu.

¹²Ismael, nung Sara ün Ijip hai nou tsamki Hagar tsangkü Abraham tü chetlut:

¹³Apa thsoso nungti noiküla: Nabaiot, Kedar, Adbil, Mibsam,

¹⁴Misma, Duma, Masa,

¹⁵Hadad, Tema, Jetur, Nafis, naiuso Kedema.

¹⁶Ngüso kau chekü nime paosiposo noin, naiuso ngüso nian, ngüso nok nian, theau kiuwan, naiuso athang athang nai ngüso kihkeitsün hau kiuwan.

¹⁷Ismael ean taoko apa pon 137 noiküla.

¹⁸Ismael tü chetsinyimtsünso Havila si Shur goh jetko Asiria nai khutsün yamko, Ijip tü ajepek nai shinkü goumchi tsak ko kih. Ngüso Abraham thsaosithsoso amao hai ainou pungekü khu.

¹⁹Abraham thso Isak ngiolat nungti:

²⁰Isak achetpon 40 ngoi nai apaüh Laban nio (Mesopotamia ainou Aramea hai) Bethuel ün menyiuthso Rebeka tsamsigoh yang.

²¹Rebekaüh methso tsüchetphe, Isaküh apa thaiutha APAOU tü misao sao. APAOU nou apa misao thala, küta Rebeka pem tsükengkü iula.

²²Apaüh thsoib chettao noiküla, ngüso mochetkün khako ngüso apa methso noithang nai tsaküh tsak thako li-ekü noiküla. Apaüh ngiom, “Tiau tso tsakli ngü tü nungti thawaoji?” Nungtiphe apa APAOU tü amongtsam epao thaiutha asanglo khu.

²³APAOU nou apa tü ngiom, “Athai mongai mele nime noin; Ni khaiunia nime haisat noi-ekü chetkiu-e; Tsak nou amao tsak nouko oukongtso noi-e; Nioyamchong nou niophi yathsüo-e.”

²⁴Apaüh methso chettao thaiutha atao saokü shin, naiuso apaüh melothso thsoib chetkiu.

²⁵Nioyam- chong nou shisileng aseng, naiuso apa khun chongmai nou tsamjeikü noiküla, nungtiphe apa nian Esau ta jon.

²⁶Niophi nou chet taoko Esau nioyamchong nou ta chan nai thatü mongkü helutkü noiküla, nungtiphe apa nian Yakob ta jon. Tilai ngüso chetlut, Isak achetpon 60 noiküla.

²⁷Nung methso nou sungjikan, naiuso Esau uokop montsün poteng iula, apa kengchi ai kihtsün aakih tsüojintsün khaiunia noiküla, lüko Yakob to sangthiokü tsamai noitsün khaiunia tsak noiküla.

²⁸Isaküh Esau tsüojin, tiautenai apa Esauüh loattsün thainian nyih heao mongleng, lüko Rebekaüh Yakob tsüojin.

²⁹Nyitso Yakobüh lapon khiamlam lamkü noiküla, Esau uokop iu ainou yanap. Apa naiukü noiküla,

³⁰küta Yakob tü ngiom, “Ngo naiuji; ngü hao nung lapon aseng nou eheao intso akiu.” (Nung thaiutha ko apa tü Edom ta jon.)

³¹Yakobüh thalakü ngiom, “Ni nioyamchong tengkam nou ngü hao akiu naito, ngo nung nihao kiu-e.”

³²Esauüh ngiom, “Mei! Ngo eanao li noin; jü tengkamüh jü thaiutha ti amei chhi-e?”

³³Yakobüh thalakü ngiom, “Ni atengkam ngü hao kiu-e ta ayating ngiomong shinge tsak lüshan.” Esauüh ngiomong shinge nou shan küta apa tengkam Yakob hau kiuwan.

³⁴Nungaih Yakobüh apa hau themtsai ajantso naiuso khiamlam intso shen. Apaüh heshiu küta tsaloukü nung ainou khuwan. Nungli Esauüh apa nioyamchong tengkam tsüwesankü noiküla.