Read Khiamniungan Naga Apung 27 Bible Online

Apung 27 - Khiamniungan Naga bible

Apung 27

¹Loto Isak sonkü iula, küta apa niovei nou tsüepshi, Apaüh apa thso yamchong Esau jonkü ngiom, “Jü thso!” Esauüh “Hauh,” ta thala.

²Isaküh ngiom, “Ngo sonaniu, ni epji naiuso shakta eanao shiom.

³A uokop pai naiuso chon nouso lokü liu ai lükhu, küta Uo tsak akopkan.

⁴Ngo mongchiotsün eheshiu samsinyakü theng küta nung jüdongai kankü ashi. Ngo nung hekütün phiai, ngo moeankün khako athonting ouk nou ni hau kiu-e.”

⁵Tilai Isak, Esau ko chite, Rebekaüh anglukü noiküla. Nungtiphe tilai Esau liuhom iuwan,

⁶Rebekaüh Yakob tü ngiom, “Apo Isaküh Esau tü ngiotsün ngo loting lula-iu.

⁷‘Uo tsak kankü yaküta ngü hao atheng kiu, ngo nung hekütün phiai ngo moeankü nai APAOU khako ni hau ouk nou kiu-e.’”

⁸Jüthso, lo, “ngo ti ngioji nung ngio nou lüchhi.

⁹Onnemok hoi ongai lükhu, küta won athso nime a oun meithso nou kankü ashi, nungtiphe ngo nung apoüh thatü mongchiotsün thengkü eheshiu ajantso shane.

¹⁰Ni nung apa dongai kankü khukü he-iau shio-e, naiuso apaüh apa ouk apa moeankün khako ni hau kiu-e.”

¹¹Lüko Yakobüh apa nyiu tü ngiom, “Esau nung chongmai samtsün khaiunia tsak noin ta ni ngeji, lüko jükhun to meekü noin,

¹²tsüngean, jüpoüh ngü tü thantan nai ngo apa tü kausaiji ta ngela-e, nung yamko ouk tsak liko athesan bao meshen thako kanjikane.”

¹³Apa nyiuüh thalakü ngiom, “Jü thso, ti athesan akhako shi-e nung ngü da lünoi, ngo ngiotsünlu lüchhi, khuküta won thso nou ngü hao kankü ashi.”

¹⁴Nungtiphe apa nung won thaloau khu küta apa dongai kankü shi, apaüh nung po nou mongchiotsünli thengsan.

¹⁵Nungaih Rebekaüh Esau neshe amei nou lou küta Yakob hau thokiu.

¹⁶Rebekaüh Yakob tü wonkhun nou phemtso nai si chongmai pun tsüpokü noitsün sang nai patlutkiu.

¹⁷Apaüh samkü thengsantsün Yakob hau themtsai nou ko hakü pha nai semlo-i.

¹⁸Nungai Yakob apa po dongai khuküta ngiom, “Po!” “Hauh,” ta Isaküh thalakü ngiom, “Jüthso ne ongko ni sübao?”

¹⁹Yakobüh thalakü ngiom, “Ngo nioyamchong nou athso Esau; ni ngiotsünli ngo chhi-iu. Tsüojin- yangkü chukü anoi küta ngo ni hau kankü shitsün nyih intso lühe, küta ni ngü tü ni nou ouk kiuau shio-e.”

²⁰Isaküh ngiom, “Jü thso, ni titi thekü shakta eplo?” Yakobüh thalakü ngiom, “APAOU a Goaüh nung epao ngü hachukü noiküla.”

²¹Isaküh Yakob tü ngiom, “Tsüojinyangkü shimkü ashi, küta ngo ni ta thantanao shio-e. Ni atsüoting Esau so?”

²²Yakob apa po dongai tekkü shimkü shin, naiuso thantan küta ngiom, “Asang-i to Yakob sang-ili, lüko aphaso to Esau phasihokso li.”

²³Apaüh Yakob tsütsangshei, tiautenai apa phemtsoso to Esau phem li noiküla. Apaüh Yakob hau ouk mowelutkün khako,

²⁴loüh müjam tsangsheikü ngiom, “Ni atsüoting Esau so?” Nungaih apaüh “Ngo noin,” ta thala.

²⁵Isaküh ngiom, “Nyih ajantso ngü hao kankü ashi. Ngo nung hekütün phiai, ni hao ouk nou kiu-e.” Yakobüh apa dongai nyih kankü shin, apaüh loüh ashiuau theng lüko kankü shin.

²⁶Nungaih apa poüh apa tü ngiom, “Shimkü shiküta ngü tü achep, jü thso.”

²⁷Yakobüh apa po tü chep ao sungnai, Isaküh Esau neshe nyam ngesan, nungtiphe apaüh Yakob hau ouk nou kiuwan. Apaüh ngiom, “Jü thso angannyam pothakü nyamtsün APAOU nou ouk kiutsün eiu tsak nyam khekkü noin.

²⁸Goa nou nihau aün ainou khiamle nou lükiu küta agoh tsüomeikü lünoi! Apaüh nihau chihsikhiam theng, saiukü lükiu!

²⁹Mele nouso atsamki ao lüthe, küta khaiuniahoi nou akhako kauthiokü lüthe-i. Atsam- mongso apem khako ni nokshing lüshing, naiuso anio thsaosithsosoüh akhako kaukü lünap. Sauhaiüh ni hau athesan kiu-e, ngüso athesan lünoi-i, naiuso sauhaiüh ni ouk kiu-e, ngüso ouk lünoi-i.”

³⁰Isaküh apa ouk kiutsün khem, küta Yakob khuwanphi tengko apa dei Esau liuhom ainou yasaom.

³¹Apaüh lüko eheshiu samkü thengsan küta apa po dongai kankü khu. Apaüh ngiom, “Atsüojin Po, achu küta ngo nihau kankü shitsün eheshiu lühe, küta ngü hao ni nou ouk akiu.”

³²“Ni sau?” ta Isaküh sang. “Athso nioyamchong nou Esau ta apaüh thala.”

³³Isak ngaongaokü khaiu mounkü ta, apaüh sang, “Naito, thainian loatküta jü dongai kankü shitsün nung sau noiküla? Ni shitsün khatengko ngo nung heaniu. Ngü nou apa hao athonteng ouk nou kiuwaniu, naiuso loto nung apa ün athon tsüyangkü noi-e.”

³⁴Tilai Esauüh nung lula, apa sang thsüokü mongkiakü ngiom, “Po, ngü hao lüko ni nou ouk akiuha.”

³⁵Isaküh thalakü ngiom, “Anio shiküta ngo sapthio-iu. Apaüh ni nou ouk kankü khuwaniu.”

³⁶Esauüh ngiom, “Tiautenai atao müjam apaüh ngo sapthio-iu. Apa nian Yakob ta thakü tsünian süne? Apaüh ngü nou thso yamchong tengkam lüko aplowan, naiuso loüh apaüh ngü nou ouk kankü khuwaniu. Jü thaiutha ni ouk tsak lüko poikü tsünoi süne?”

³⁷Isaküh thalakü ngiom, “Ngo apa akhako APAOU the-iao shanluttaniu, naiuso atsammongso chikü apa yathsüoau shanluttaniu. Ngo apahau chihsikhiam naiuso theng kiuwaniu. Loto ngo athaiutha ti chhi chhiau tsüpoi taiushi, jü thso!”

³⁸Esauüh apa po tü thsüokü koja: “Po, ni nou ouk tsak linlin taim süne? Ngü lüko ouk kiu Po!” Nungaih Apa shapao yachu.

³⁹Nungaih Isaküh apa tü ngiom, “Aün ainou khiamle athaiutha tsünoi, Athaiutha gohtsa haoson tsünoi.

⁴⁰Ni asah üh aa nou kih-e, lüko anio yathsüokü noi-e, naiuso ni tilai khengshi-e, Ni apa ngiokhem ainou shikhuwan-e.”

⁴¹Esauüh Yakob chinyan, tiautenai apa poüh ouk nou Yakob hau kiuwan. Apaüh yang, “Jü po eanao atao nou shimkü shiji; nungaih ngo Yakob loatte.”

⁴²Lüko tilai Rebekaüh Esauüh yangtaiutsün lula, apaüh Yakob dongai hongküta ngiom, “Anglu, adei Esauüh ni ko phete küta loattao yangji.

⁴³Loto, jüthso, ngo ti ngioji nung lüchhi. Lo shaktalu Haran nai jüdei Laban dongai lükhuwan.

⁴⁴Küta apako adei mongmat mosaiukün lektso

⁴⁵naiuso ni apa tü ti in chhin nung mopeankün lektso atao intso thaiutha lünoikei. Naiuso ngo ajantso hong küta ni nialokü shishi-e. Tiauta ngo nyitsokolu jüthso ne nemtso mowani-e?”

⁴⁶Rebekaüh Isak tü ngiom, “Ngo Esau ün gohmao tsammongnyiu nousoüh thachüluwaniu naiuso akiali iula-iu. Yakobüh lüko nungso Het hai menyiuthso so ongko tsak lüko tsamsigoh yangnaito ngo ee tso eanela.”