Read Khiamniungan Naga Apung 28 Bible Online

Apung 28 - Khiamniungan Naga bible

Apung 28

¹Nungaih Isaküh Yakob jon, küta ouk kiukü apa tü ngiom, “Ni atsamsigoh au Kanan hai menyiu layang.

²Nung likoto Mesopotamia nai apao Bethuel tsamai lükhu, küta nungai akaiu Laban ün menyiuthso tsak tsamsigoh lüyang.

³Akongteng Goa nou atsamsigoh shan nai lüouk kiu, naiuso thsohai piakü lü ouk kiu, nungtiphe ni mele piakü po iula-e!

⁴Apaüh Abraham ouk kiutsünli ni naiuso athsaosithsoso lü ouk kiu, naiuso Goa nou tisübao Abraham hau kiutaium, naiuso tisübao goh ko nilo kihkü noin, nung ni hao lüthe!”

⁵Isaküh Yakob Mesopotamia nai, Aramea hai nou Bethuel thso Yakob si Esau ne nyiu Rebeka dei Laban dongai hongan.

⁶Isaküh Yakob ouk kiu küta Mesopotamia nai tsammongnyiu tsak yamao honganiu ta, loüh Isaküh Yakob ouk kiunai, apaüh Kanan nyiuhai to tsamsigoh layang ta thoiluttsün Esauüh lula.

⁷Loüh Yakobüh apa posinyiu neüh ngiotsün angkü Mesopotamia nai khuwaniu ta Esauüh lulanai,

⁸Esauüh apa posinyiu neüh Kanan nyiuhai tsamsigoh yangiau tsümongchio ta ngela.

⁹Nungtiphe apa Abraham thso Ismael dongai khu, küta apa menyiuthso Nabaiot nio nou Mahalat tsamsigoh yang.

¹⁰Yakob Bersheba wankü Haran dongai khuau tsalou.

¹¹Ajenap taoko apa asiothang tsakai shi küta nungko aalou. Apa khaiu lung tsak tü niolutkü apa sailüshi.

¹²Apa mea nai hokthengpho tsak goum ainou aün sungsaokü tontaiutsün chiai honghoi asong asao ta tsakeikü ep.

¹³Naiuso nungai APAOU apa phiko tsakü noiküla. Apaüh ngiom, “Ngo Abraham Goa, Isak Goa, APAOU nou noin.” “Ni tisübao goumchi ko lo saikü noin nung goumchi ngo ni naiuso athsaosithsoso hau kiu-e.

¹⁴Ngüso goumchi nai aweluao tsüshiokü singtsoli noi-e. Ngüsoüh ngüso goumchi aniokün püle chikü nai losunge, naiuso ni si athsaosithsoso tsangkü ngo mele nouso apem ouk kiu-e.

¹⁵Lüyangshi, ni tilüsongai khu-e ngo ni solo-e, naiuso niko noiha-e, naiuso ngo ni nung goumchi nai laokü kanjikan shi-e. Ngo ni tü thalotaiutsün chikü mochikhemkün lektso ni tsüwane.”

¹⁶Yakob asaila ainou chunge küta ngiom, “APAOU nungko noin! Apa nung athang nouko noin, nung ngu tsüngekü noiküla!”

¹⁷Apa hatkü ngiom, “Nung athang nou titi ahattao tsak! Nung Goa ün Tsam naiuso aünnok bekhan noin.”

¹⁸Yakob nungthan nyap ahom beta chukü, apa khaiukhamao thekü saitsün lung nou lou, küta nung ayangshiao tsak kikü taiu. Nungai apaüh nung chiai Goa tü alosio au Olip khiam nou tsomlut.

¹⁹Apaüh nung athang nou Bethel ta nian. (Ataojam nungko noknio Luz ta niankü noiküla.)

²⁰Nungaih Yakobüh APAOU tü ngiomong shinge tsak shan: “Ngo süme khutsün nai ni ngüko hakü ngü sojei-e, naiuso ngü hau eheshiu naiuso atenao neshe kiu-e,

²¹naiuso ngo jüpo tsamai aalokü shi-i-e tünaito, ni jü Goa noi-e.

²²Nung ayangshiao nou lung sübao kitaium nung athang nai ngo che haoson ni oukkiutsün alum pungkü ainou kiu-e.”