Read Khiamniungan Naga Apung 29 Bible Online

Apung 29 - Khiamniungan Naga bible

Apung 29

¹Yakob apa yam ajepek goumchi dongai tsülaokü khu.

²Alekta apa temkhao tsak lemkü onnemok ahoi süme sainoitsün nai shin. Nung temkhao ainou onnemok hoi nouso hau khaiushen, nung temkhao kuk nai lung asong tsak noiküla.

³Tilai onnemok hoi nou nungai kamshi-e, onnemok jimtsün- soüh lung nou lekkan küta onnemok nouso hau khiam shenkü noiküla. Khiam shen küta ngüsoüh nung temkhao lung nou kapjeikü taiushi.

⁴Yakobüh onnemok jimtsünso tü sangkü ngiom, “Jü haiso, asam tiai nou shin?” Haran ainou shin ta ngüsoüh thalan.

⁵Apaüh sangshin, “asamüh Nahor thso Laban ngejimo?” Ah, samüh ngen, ta ngüsoüh thalakü ngiom.

⁶Apa meikü noimo? ta apaüh sangshi. Ngüsoüh thalakü ngiom, “Apa meikü noin. Athaplu, nungko apa thso Rachel apa onnemok ko hakü shiji.”

⁷Yakobüh ngiom, “Lo tao anyiwem noin, nungtiphe onnemok hoi niakamao atao mosao, asamüh ngüso hau khiam shen küta thsan tsamhe-iao laokü tsünialükhun küto?”

⁸Ngüsoüh thalakü ngiom, “Onnemok hoi nungai moshikün lektso naiuso lung nou molekkankün lektso samüh nung chhiao tsüshio; nung lekkan nailu samüh onnemok hoitü khiam thsaluttao shio-e.”

⁹Tilai Yakob ngüsoko chitekü noiküla, nung taoko Rachel onnemok hoi hakü shisao.

¹⁰Tilai Yakobüh Rachel apa po ehen nou Laban ün onnemok kankü ep, apa temkhao nai khuküta lung nou lekkan, küta onnemok tü khiam thsalut.

¹¹Nungai apaüh Rachel tü son nai chep küta amongling nou sang sungkü shap.

¹²Yakobüh apa hau chitekü ngiom, “Ngo Rebeka thso apo ün tsammong noin.” Nungaih Rachelüh apa po hau chiteao kopkü khu;

¹³naiuso tilai apaüh apa le Yakob thaiutha lula, apa kopkü khukü ta piplo, küta son nai chep, naiuso apa tsamai nialokü shi. Tilai Yakobüh Laban hau athawaotsün alum chite,

¹⁴Labanüh ngiom, “Ah, atsüoting ni jü nyih naiuso jü she noin.” Yakob nungko alei tsak thumkü noian.

¹⁵Labanüh Yakob tü ngiom, “Ni jü tsammong nou shioko amai tsülokü jü thaiutha chhisiya tsüchhiao noin. Ni alei chai titithatso aiuji?”

¹⁶Laban thso menyiuthso nime; Nioyamchong nou Lea, naiuso niophi nou Rachel ta niankü noiküla.

¹⁷Lea nung niovei nou outsükongkü, lüko Rachel to akamshikü naiuso meso meikü noiküla.

¹⁸Yakob Rachel ko tsüojinekü iulakü, apaüh Laban tü ngiom, “Ni ngü hau Rachel tsamsigoh yangi naito, ngü ni pon chinyat yathsüokü chhikiu-e.”

¹⁹Labanüh thalakü ngiom, “Ngo apa amaohai hau kiuwan liko to ni hau kiu-e, ngü ko nungko anoiha.”

²⁰Yakobüh Rachel tsamsigoh yangao thaiutha pon chinyat yathsüokiu, naiuso atao nung chikü ajekhaiu thsaothsaokü lilu apaüh yang, tiautenai apaüh Rachel tsüojin.

²¹Nungaih Yakobüh Laban tü ngiom, “Atao nou sao-iu: ngü athso tsamsigoh yange.”

²²Nungtiphe Labanüh tsamsigoh shan sümai nai khaiunia apem jon.

²³Lüko nungsoh nai, Rachel liko apaüh Yakob dongai Lea nialokü shi, küta Yakob apako emsai.

²⁴Labanüh apa thso Lea tsamkiao apa ün sua menyiu Zilpa kiu.

²⁵Nungthan nyap ah nou mongekün tao naita Yakobüh nung Lea ta tsangsheisan. Apa Laban dongai khuküta ngiom, “Ni ngütü nung chhi tiauta chhin? Ngo Rachel jonao ni yathsüokü shin. Ni tiau ngo kausaiat?”

²⁶Labanüh thalakü ngiom, “Sam saisile nung: Niochong menyiuthso nou khako niophi menyiuthso chong tsamsigoh yangao ayam tsünoi. Tsamsigoh shantsün sümai anojet ayanan-i

²⁷ni loüh pon chinyat jü thaiutha chhisiya yathsüokiushi naito, ngü nihau Rachel kiu-e.”

²⁸Yakobüh mongchio, naiuso tilai tsamsigoh shan sümai anojet nou yanlükhun, Labanüh apa thso Yakob hau tsammongnyiu theau kium.

²⁹Labanüh apa thso Rachel tsamkiao apa ün sua menyiuthso Bilha kiu.

³⁰Yakob Rachel ko lüko tsüojinekü em, naiuso apaüh Lea ko nai Rachel tü tekkü tsüojin. Apaüh loüh Laban pon chinyat yathsüokiu shi.

³¹Tilai APAOU nou Yakob atsüojin Lea ko nai Rachel tü phopkü epsan, Apaüh Lea tü methso chetsinyimao ayam sopkiu, lüko Rachel to lon noian.

³²Lea pem tsükengkü iula, küta melothso tsak chetkiu. Leaüh ngiom, “APAOU nou ngü angjatsün epiu, loto jü tsammongpoüh ngü tsüojin-e” nungtiphe apaüh methso nou Reuben ta niankiu.

³³Loüh Lea pem tsükengkü iulashikü melothso tsak chetlutkiu. Apaüh ngiom, “APAOU nou nung melothso lüko kiu-iu, tiautenai apaüh ngo meikü tsütsüojin ta lula;” nungtiphe apaüh methso nou Simeon ta niankiu.

³⁴Loüh Lea pem tsükengkü iulashikü melothso tsak chetlutshin, Apaüh ngiom, “Loto jü tsammongpo ngü tü thatü shimkü noi-e, tiautenai ngü apa hao melothso süme chetkiu-iu,” nungtiphe apaüh methso nou Levi ta niankiu.

³⁵Loüh Lea pem tsükengkü iulashikü melothso tsak chetkiu, apaüh ngiom, “Nung taokoto ngü APAOU lomsan-e;” nungtiphe nung methso nou Yihuda ta niankiu. Loto apa methso chetkiutsün laowan.