Read Khiamniungan Naga Apung 3 Bible Online

Apung 3 - Khiamniungan Naga bible

Apung 3

¹Lo APAOU nou shantsün thainian ongko pao nou akaosaiting noiküla. Pao nou Menyiu tü ngiom, “Atsüoting aimong ko noitsün pai eiu tilünou lahe ta Goa nou ni tü ngiomso?”

²Nungaih Menyiu nou pao tü ngiom, “Aimong ko noitsün pai eiu samüh heau shio-e,

³lüko tisübao pai aiwemko noin, nung pai eiu lahe naiuso lathantan, nung henaito asam eane ta Goa nou ngiom.”

⁴Pao nou Menyiu tü thalakü ngiom, “Nung atsüotsüde, asam tsü ean-e.

⁵Tititenai ti ajekhaiu ko asamüh nung he-e, nungailu asam niovei sopsatkü, asam Goali, amei si tsümei ngekü iula-e ta Goa nou ngen.”

⁶Nungaih Menyiu nou nung pai eiu heao amei, naiuso niovei nou chinekkü, ayangloutsün epkü iulaau aiukü apaüh nung pai eiu panlokü he, küta apa tsammongpo hau lüko kiukü, apaüh lüko he.

⁷Nungaih ngüne nemtso niovei sopsat, naiuso ngüne tsosa ta ngekü iula; küta ngüneüh phiopai thsamsa loküta chio-ekü meshen thaiutha nejam shanlo.

⁸Nungaih APAOU Goa nou ah tangsep taoko aimong nai tsakeitsün sangh ngüneüh lula, küta ngüne chija APAOU Goa ainou aimong pai nouso so ai paman.

⁹Lüko APAOU Goa nou khaiunia tü jonkü ngiom, “Ni tiai noin?”

¹⁰Apaüh thalakü ngiom, “Ngo ni aimongai tsakeitsün sangh lula, küta ngo nilun hatkü jü chija pamkü noian, tiautenai ngo tsosa noiküla.”

¹¹Apaüh ngiom, “Ni tsosa noiau nitü sauüh ngiom?” “Ngo ni tü pai eiu tsüheau ngiokhem kiutaiu nou ni heaniu süne?”

¹²Nungaih khaiunia nou thalakü ngiom, “Menyiu sau ni ngoko noiau kiu, apaüh ngü hau pai eiu nou kiu, küta ngo heaniu.”

¹³Nungaih APAOU Goa nou Menyiu tü sangkü ngiom, “Ni nung chhisantsün ti?” Menyiu nou thalakü ngiom, “Pao nou ngo kaosaiat, küta ngo heaniu.”

¹⁴APAOU Goa nou pao tü ngiom, “Ni nung chhi nou shioko, thainian apem khaioko ni athesan, liu thainian apem khaioko ni athaiüh chinkei-e, naiuso ni pu noulu heshiu-e, nung ni nou aakihlaiu thathunkü noi-e.

¹⁵Ngo ni naiuso menyiu aje jetko eh taiukiu-e, naiuso ni tü nyimsantsün naiuso apa tü nyimsantsün jetko, apaüh ni tü khaiu nai ngamkei-e, naiuso ni apa tü thsan nai haiu-e.”

¹⁶Apaüh Menyiu nou tü ngiom, “Ngo ni methso kantsün naiuso chettsün taoko, akia thsüokü losungkiu-e; ni kiakü methso hai chetsan-e, lüko atsammongpo ko amongchiotsün noi-e, naiuso ni apa ngiokhem khemai noi-e.”

¹⁷Küta Apaüh Adam tü ngiom, “Ni atsammongnyiu ngio tü ang nou shioko, naiuso ‘ni nung lahe’ ta ngo sübao ni tü ngiokhem kiula, nung pai eiu heanphe, athaiutha goum nou athesan noi-e; aakihlaiu thathunkü ni nung da chhikü heshiuau eppe.

¹⁸Chih ai naiuso akhujeitsün tsao nouso sunge, küta nungtü samsantsün ainou ni heshiu-e.

¹⁹Ni pu ainou losankü shan, ni nung pu au laokü mo-iulashikün lektso, ni akhakhengai lemlu sungkü eheshiu eppe ni pu noin, naiuso nung pu aulu ni laokü iulashi-e.”

²⁰Adamüh apa tsammongnyiu nian Ev ta nian, tiautenai apa aa khaiuniale chikü nyiuting noiküla.

²¹Naiuso APAOU Goa nou Adam naiuso apa tsammongnyiu hau thainian khun nou neshe shankiu küta tenkiu.

²²Nai APAOU Goa nou ngiom, “Athaplu, nung khaiunia nou sam khekkü tsak iula-iu, amei si tsümei ngeji, küta loüh apa pha nou aa kiutsün pai nou tü lüko thantanküta, hekü, loüh asaichi aa nou tsükih shiau noin.”

²³Nungtiphe APAOU Goa nou Eden Aimong ainou apa sai au losantsün goh nou tü chhiau apa hongan.

²⁴Nungaih Apaüh Eden Aimong ajepek nai akoi pohtsün aa thainian naiuso ayam pungkü nai ehükü noiau laplapkü amonting salaiu tsak taiukiu. Tiautenai nung saulünou aa kiutsün pai dongai shimkü shitsün ainou lolaokü taiu au noiküla.