Read Khiamniungan Naga Apung 31 Bible Online

Apung 31 - Khiamniungan Naga bible

Apung 31

¹Yakob sam po Labanüh thataiutsün alum kankü khuwaniu. Apaüh taiutsün jengtsaiu apem sam poüh ti taiuküla nung ainou shin ta Laban thsosoüh ngiotsün Yakobüh lula.

²Naiuso apaüh loüh Laban aya naili tsüdekü kha tsüwonkü ep.

³Nungaih APAOU nou Yakob tü ngiom, “Aposo naiuso atsammongso goumchi ai laokü lükhu. Ngo niko ha-e.”

⁴Nungtiphe Yakobüh Rachel si Lea ne dongai onnemokso noitsün tsamei nai apako aphete ta ngio hong.

⁵Apaüh ngüne tü ngiom, Ngo aje po jü khako nung thaiu naili haimei tsüdekü epsanji; lüko jü po ün Goa ngüko hakü noin.

⁶Aje nemtsoüh ngeji, Ngü jü oukong apem nou aje po thaiutha chhikium.

⁷Lüko apaüh ngü kausaiatkü naiuso ngü amai epao noitsün che jam li-ekiu. Lüko Goa nou apa hau ngütü angja tsükiu-i.

⁸Tilai Labanüh wonhoi nouso aleng haklutlutkü nouso naiuso tsangi tsangi kü nouso amephaiu mai noi-e ta ngiokü noiküla, nungai won nousoüh nung khekkü punsan.

⁹Goa nou aje po ainou wonhoi ouk kankü khuküta nungso ngü hao kiuwan.

¹⁰“Onnemok hoi apunyam akome taoko nai ngo mea tsak mean, naiuso ngo wonpong hoi alengsat, tükhak khakkü naiuso alengsat henkü potsünsoüh komkomkü epm.

¹¹Goa hong nou ngü tü mea nai ngiom, ‘Yakob!’ ‘Hauh,’ ta ngü thalan,

¹²‘Athaplu’ ta Apaüh tsülaokü ngü tü ngiom, ‘Wonpong nouso chikü alengsat ehen, asong naiuso tükhak khakkü noin. Tiautenai Labanüh ni tü kausaikü kankeitsün shioko ngo nung shan.

¹³Ngo Goa, sau ni tü Bethel nai tsangsheikü sungh, tiai ni lung tsak Olip khiam nou tsomkiukü losio küta ayangshiao shantaiu kü ni ngüko ngiomong shinge nou shan. Lo, ni chettsün goumchi nai laokü khushiao lükhemlo.’”

¹⁴Rachel si Lea neüh Yakob tü thalakü ngiom, “Nungai sam po ainou samüh tengkamao titso tsüpoitaiu.

¹⁵Apaüh sam gohmao khaiuniahoi lilu kankeiji, apaüh sam jananiu, naiuso loüh sam thaiutha ko amai kiutsün tangka apem khemaniu.

¹⁶Nung jengtsaiu apem Goa nou sübao sam po ainou lowan nung sam naiuso sam thsoso ün noin. Goa nou ni tü tilüsong ngiom, nung lüchhi.”

¹⁷Nungtiphe Yakob Kanan goumchi ai apa po dongai laokü khushiau khemlo. Apaüh apa thsoso naiuso tsammongnyiu nouso ut hoi chiai moknoi-i, küta apa onnemokso apem apa khako komlo, naiuso apaüh Mesopotamia nai kih nai eptsünso alum hoilo.

¹⁸

¹⁹Laban apa onnemok hoi tü apun tippanao khu, naiuso apa tsünoitsün taoko Rachelüh tsam- khaiu nai amkhamtsün sotsom goa apa po ün kaolowan.

²⁰Yakobüh Laban hao apa yawantsün tsüngeikü kausaiat.

²¹Apaüh meshenüh taiutsün alum loküta liuliukü nung athang leankü khuwan. Apa Eufrates haiu yankü khuküta king goumchi Gilead nai khuau tsalo.

²²Ajekhaiu samnyi phiai Laban hau Yakob khuwaniu ta chite.

²³Apaüh meshen khaiuniaso nialoküta Yakob mothakün lektso king goumchi Gilead nai ajekhaiu chinyatnyi komkü khu.

²⁴Nungsoh nai Goa nou Laban dongai mea mean nai shiküta ngiom, “Yakob ti yamko lünou tsülohattao lütsüolo.”

²⁵Yakobüh apa nejenkhio king nai lahshan, naiuso Labanüh apa nejenkhio king goumchi Gilead nai apa kau nousoko hakü lahshan.

²⁶Labanüh Yakob tü ngiom, “Ni tiau ngü kausaiat küta jüthsoso sua li kankü khuwan?

²⁷Ni tiauta ngü kausaiatküta ngü hau tsüchitekü lailükhun? Ni ngü hau chite tünto, ngü ayam thathunkü amongling naiuso jih hangkü, kokiang khongkü, ni hongela.

²⁸Ni ngü jü thsaosithsoso ko salamtso tsükiu-e-i naiuso meikü lükhu tatso tsüngio-i, nung mainga chhi tsak chhianiu.

²⁹Ni tü pha poh au lüko jü oukong noin, lüko müso apo ün Goa nou ni tü lalohat ta ngü lotsüo.

³⁰Ni tsamai laokü yashiau thatü mongchet nou shioko ta ngo ngeji, lüko jü tsamkhaiu sotsom goa ni tiauta kaulowan?”

³¹Yakobüh thalakü ngiom, “Ngo hatkü noiküla, tiautenai ni athsoso ngü ainou lowanshi-e ta ngü yang.

³²Lüko ni nungai ajantso ko sotsom goa taiukü epsan nai, apa to loatkü wanaolu noin. Nung sam khaiunia khako mitha li, alum ta lüthap, küta ni ün epnai nung ni nou, ni lülo.” Yakobüh Laban ün sotsom goa nou Rachelüh kaulo ta tsüngekü noiküla.

³³Laban khukü Yakob ün nejenkhio nai yam, küta apa Lea ün nejenkhio nai khu, naiuso sua menyiu nime nejenkhio nai yam, lüko apaüh apa tsamkhaiu sotsom goa tsüepsan. Nungthan ko apa Rachel ün nejenkhio nai nap.

³⁴Rachelüh nung tsamkhaiu sotsom goa nou lokü ut tü phanluttsün nekong mong nai taiuküta apa nung chiai moknoi. Labanüh nejenkhio apem yampekkü yam, lüko nung tsüepsan.

³⁵Rachelüh apa po tü ngiom, “Ngü tü lamongmat, APAOU, ngo akhako atsaao tsüshiokü noin; Ngo alei pungkü achinyan khutsün atao noin” Labanüh yam lüko apa tsamkhaiu sotsom goa nou tsüepsan.

³⁶Nungaih Yakob mongmatkü iula, “Ngo ti lothekü noin?” apaüh mongmatkü sangh, “Ni ngü tü mongchiokü yamkeiao lümeikü ngo ti ngiokhem lothekü noin?”

³⁷Lo, ni jü jengtsaiu ngü taiutsün apem yampekkiu, ti tsam jengtsaiu ni ün epsan? nungso kankü kengchiai shiküta akhaiunia si jü khaiuniasoüh nung eppe, nungko je sau thakü noin ngüsoüh epsane.

³⁸Ngo lonyi saokü niko pon khei noikü shiji, a-onnemok naiuso awonsoüh athso pon tilaitso tsüphio, naiuso ngo a-onnemok hoi ong ainou onnemokthso tsaktso tsühean.

³⁹Tilai onnemok tsak liu thainian nou loattane, asapat nou ngo asaita thekiukü shin, adongai nung jü aphio noiküla ta lüko jamtso kankü tsüshi. Anyi naiuso asoh kauwantsün ainou ngo alesan shanji ta ni ngü tü saokü noiküla.

⁴⁰Atao piaküjam ngo anyi alam nouko naiuso asoh athsong nouko asaiao tsüshiokü noiküla.

⁴¹Ngo niko pon khei thumkü noihatsün nung khekkü noiküla, nungti lüko ni jü mephaiu mai chejam li-ekium.

⁴²Jüposo: Abraham Goa, Isak Goa, ngüko tsüha tünto, nito ngü phakeng hongan shiau noiküla, Lüko Goa nou ngü angjatsün naiuso, ngo chhikü shitsün ep küta, müso Apaüh ni tü thut.

⁴³Labanüh Yakob tü thalakü ngiom, “Nungso menyiuthso nouso jü thsoso noin, naiuso nung onnemok nouso ngü nou noin. Atsüoting naito, ni nungko eptsün alum ngü nou noin. Lüko jü thsoso si ngüso thsoso taiukü ngü ti chhisanau tsünoi,

⁴⁴ngü niko athalu-e tsak taiuau khemkü noin. Samüh sam jetko athalu-e taiutsün yangsanau lungphansan tsak shanko.”

⁴⁵Nungtiphe Yakobüh lung tsak loküta tsüpeanau kikü taiu.

⁴⁶Apaüh apa khaiuniaso tü lung kamshiküta sankü ataiu ta ngiom.

⁴⁷Labanüh nung tü JEGAR SAHADUTHA ta jon, lüko Yakobüh nungtü GALEED ta jon. Nungaih ngüso nung lungphansan dongko thaisam tao tsak noi.

⁴⁸Labanüh Yakob tü ngiom, “Nung lungphansan nou je nemtso thaiutha ayangshiau tsak noi-e.” Nung shioko nung athang nian nou GALEED ta nian.

⁴⁹Labanüh ngiom, “APAOU nou sam tsak si tsak ainou pungekü noi taoko jimkü anoi.”

⁵⁰Labanüh tsülaokü ngioshiji, “Ni jü thsoso meikü tsükankei kü, naiuso menyiu amao tsamsigoh yangshinai, nungti lüko ngü nung thaiutha tsüngeha, Goa nou samtü jiokü noin ta lüyangsan.

⁵¹Nung lung nouso ngü je jetko sansaniu, naiuso nungai tsüpeanau lung tsak taium.

⁵²Nung lungphansan naiuso lung nemtso ayangsanao ii noi-e. Ngo nung lungphansan yantaiukü ni komanao tilaitso tsükhu-e, naiuso ni lüko nung yantaiukü tilaitso lashi.

⁵³Abraham Goa naiuso Nahor Goaüh sam jetko thaisane.” Nungaih apa po Isaküh amtsün Goa nianko, Yakobüh nung athalu-e mongkü taiuao ngiomong shinge tsak shan.

⁵⁴Apaüh thainian tsak king nai aloat chaithio kiu, naiuso apa khaiuniaso thaisam nai jonshin. Ngüsoüh heshiukütün phiai nungsoh ngüso asoh chikü king nai noian.

⁵⁵Nungthan nyap ahom beta Labanüh apa thsaosithsoso tü son nai chep küta ouk kiukü punge.