Read Khiamniungan Naga Apung 32 Bible Online

Apung 32 - Khiamniungan Naga bible

Apung 32

¹Yakob apa yamai khu taoko, honghoi ajantso apa ko pheten.

²Tilai apaüh ngüso ep, apaüh ngiom, “Nung Goa Saothang noin” nungtiphe apaüh nung athang nou tü MAHANAIM ta jon.

³Yakobüh apa dei Esau dongai Edom goumchi ai apa khako ngio kantsünso hong.

⁴Apaüh ngüso hau ngio-iau ayam han: “Ngo, Yakob, angio angtsün atsamki, jü APAOU Esau, ngü Laban ko kihakü noiküla, nung shioko ngo lo saokü tsülaoshikü tsangankü noian.

⁵Ngo tsam thainian gado hoi, onnemok hoi, won hoi, naiuso tsamki hoi taim. Akhako atsüojinyang epe ta ayang noikü ngo nung ngio hongji APAOU.”

⁶Tilai ngio kantsünso Yakob dongai laokü shishin, ngüsoüh ngiom, “Sam adei Esau dongai khu, apabao niko pheteau thaiutha tsalo-iu. Apaüh apako khaiunia tsom püle hakü shiji.”

⁷Yakob hattakü yangelat. Khaiunia sauhai apako hakü noiküla, nungso apaüh hoi nime hau janthat, loüh nungko hakü onnemok hoi, won hoi, jangtso hoi, naiuso ut hoi ta noiküla.

⁸Apaüh yang, “Esau shikü chonghoi nou tü pha poh nai, hoi amao tsak nouto khuloau shio-e.”

⁹Nungaih Yakobüh Goa tü misaokü ngiom, “Jüpao Abraham, jüpo Isak Goa, ngü tü anglu! APAOU, ni ngütü jü goumchi ai jü tsammongso dongai laokü lükhu ta ngiom, naiuso jü thaiutha ni alum meikü shankiu-e ta ngiom.

¹⁰Ni hantsün atsüojin naiuso mongkiu- tsün apemtü ngo atsamki tsümaiteng. Ngo Yordan haiu yantsün taoko pailai tsak tü simkü ti tsütaiu, naiuso lo ngo nung hoi nime hakü laokü shikü noin.

¹¹Jü dei Esau ainou ngo akipsan, ta ngo misao saoji. Apa shitsün nung sam methso menyiuhoi apem lomowanao naiuso sam komanao shiji ta ngo hatji.

¹²Jü thaiutha alum meikü khu-e ta ni thalotsün naiuso haiusai nai singtso tü piakü sauühtso aweao tsüshiokü thsaosithsoso piakü ngü hao kiu-e ta thaloutsün lüyangsan.”

¹³Sotsü nungai shamankü phiai, Yakobüh apaüh taiutsün ong ainou apa dei Esau hau paopei kiuau chosan: Won asang tsom nime, naiuso apong khei, anyaothiptsün ut aosam nouko athso sunkü, jangtso asang aopüle, naiuso jangtsopong che, gado asang khei, naiuso apong che ta,

¹⁶apaüh ahoi ahoi ta janpek küta apa tsamkiso hoi pungkü apaotsangao thoilut. Apaüh ngüso tü ngiom, “Jü khako lükhu, küta ahoi pungkü jetko ajet nou ataiu naiuso tsak nungphiai athe.”

¹⁷Apaüh ayateng tsamki tü ngiokhem kiukü ngiom, “Tilai jü dei Esau niko phetekü ‘Ni ün APAOU sau? ni tiai khuji? akhako thainian nouso sauüh nou? ta sange,

¹⁸ni nung thashiau noin: Nungso atsamki Yakob ün nou. Apaüh nungso apa APAOU Esau hau paopei kankü shiji. Yakob apa pem lüko sam phikolu noin.’”

¹⁹Apaüh tsamki nime nou ta lüko nung ngiokhemlu kiukü ngiom, loüh süme nou ta lüko nunglu ngiom, naiuso sauhai thainian jim ahoi ahoi nai noiküla, ngüso chikü tü ngiom. “Tilai asam apa ko phete-e nungti asamüh Esau tü ngioau noin.

²⁰‘Ah’ atsamki Yakob sam phikolu noin,” ta asamüh ngioau noin. “Ngo apa paopei nou shiolo-e, naiuso tilai ngo apa phete-e, tsüngean apaüh ngü hau wankiu-e” ta Yakobüh yangkü noiküla.

²¹Apaüh paopei nouso apa khako hongtaiu küta nungsoh naito apa nejenkhio nai shaman.

²²Nungsoh nai asaila ainou chuküta apa tsammongnyiune naiuso ngüneko hoikü shitsün nyiuhai nime, naiuso apa thsoso chekü tsak nouso nialokü Jabbok haiu yankü khu.

²³Apaüh ngüso haiu nou yankü hongankütün phiai loüh meshenüh thataiutsün chikü hongshian,

²⁴lüko apa to tsükhu hakü pemsa noian. Nungaih khaiunia tsak shikü ah-nge tao saokü apako lange.

²⁵Tilai khaiunia nou alangetsün apaüh tsüshio ta epsan, apaüh Yakob tü chhang nai shiuh, naiuso nung oujei nou hangan.

²⁶Khaiunia nou ngiom, “Ngo akhu-i, ah-nge awon nou shiji.” Yakobüh thalakü ngiom, “Ni ngo mo ouk kiukün lektso, ngo ni tsükhu-i-e.”

²⁷Khaiunia nou sangkü ngiom, “Ni sau ta nian?” Apaüh thalakü ngiom, “Ngo Yakob.”

²⁸Khaiunia nou ngiom, “Anian loto Yakob ta tsüjonshi-e. Ni Goa ko lange-iu, naiuso khaiuniako lange-iu, küta ni shiolom, nungtiphe anian Israel ta jone.”

²⁹Yakobüh ngiom, “Lo ngü hau anian achite.” Lüko apaüh thalakü ngiom, “Ni tiau jü nian ngeau aiuji?” Nungaih apaüh Yakob ouk kiu.

³⁰Yakobüh ngiom, “Ngü Goa khasikha epiu, naiuso ngo loüh aa noin,” nungtiphe apaüh nung athang nou tü Peniel ta jon.

³¹Yakobüh Peniel wankü khu taoko aje nou peksan, naiuso apa chhang oujei hangan shioko apa soisoikü noiküla.

³²Lonyi saokü Israel thsaosi- thsosoüh chhang nai nou nyi tsüheji, tiautenai nung chhang nyi nouko Yakob tü shiuhkü noiküla.