Read Khiamniungan Naga Apung 33 Bible Online

Apung 33 - Khiamniungan Naga bible

Apung 33

¹Yakobüh Esau khaiunia tsom püle hakü shitsün ep, nungtiphe apaüh methsoso Lea si Rachel, naiuso sua tsamki menyiu nime mongko janekü kiu.

²Apaüh sua tsamki menyiu nouso naiuso ngüso thsoso hau chongi, nungthanko Lea naiuso apa thsoso, naiuso athon nai Rachel naiuso Yosep phiai taiu.

³Yakob ngüso khako khukü apa dei shimkü shi nai chinyatjam goh nai kauthio.

⁴Lüko Esau apako, pheteao jingkü shikü apa pha nou Yakob sang lemkü piplo, küta apa tü chep. Ngüne nemtso shapkü noiküla.

⁵Esauüh lemkü thaplunai, apaüh menyiuhoi naiuso methsoso ep, nungaih apaüh sangkü ngiom, “Niko ha nouso khaiunia nungso sauhai?” Yakobüh thalakü ngiom, “APAOU, nung methso nouso Goa nou ngü hau atsüojinyang nou kium.”

⁶Nungaih sua menyiu tsamki nouso lüko ngüso thsoso hakü shin, küta apa khako kauthiokü asuhat kiu;

⁷nungthankü Lea naiuso apa thsoso shin, naiuso athonting nai Yosep naiuso Rachel shiküta apa khako kauthiokü asuhat kiu.

⁸Esauüh sangkü ngiom, “Ngo loüh ahoi amao tsak phetetsün nung ti? Nung ti athat?” Yakobüh thalakü ngiom, “Nung ni ainou atsüojinyang epao thaiutha noiküla.”

⁹Lüko Esauüh ngiom, “Ngo saiukü taium, jünio, ni nou nilu lütaiu.”

¹⁰Yakobüh ngiom, “Tsüde, atsüojintsün dei, ngo ni ün atsüojinyang lesan naito, jü paopei alou. Akha eptsün to jü thaiutha Goa kha eptsünli noin, loto ni ngüko haimeili iula-iu.”

¹¹Tsüojinyangkü ngü nihau tisübao paopei kankü shikü noin nung alou, Goa nou ngüko atsüojinyang noikü ngo potsün alum kium. “Apaüh molokün lektso Yakob tsülaokü sanglutkü noiküla.”

¹²Esauüh ngiom, “Sam tsalokü khuko, ngo akhako khu-e.”

¹³Yakobüh thalakü ngiom, “Me- thsohoi outsükong ta ni ngeji, naiuso ngo onnemok hoi si aa apotsün naiuso ehen nouso yangao noin. Ngüso nyitso lüko kongkü kumki naito, ahoi nouso apem eane.

¹⁴Tsüojinyangko jü khako lükhu, küta ngo yamlukü thaiu-e, thainian nouso naiuso methso nouso keikei likü ngo jü APAOU dongai Edom ai thaiukü shi-e.”

¹⁵Esauüh ngiom, “Naito ngo jü khaiuniaso ajantso asam ko taiukiu-e.” Lüko Yakobüh thalakü ngiom, “Nung thaiutha pokü tsünoi tititenai nilu mongmei naito.”

¹⁶Nungtiphe nung ajekhaiu ko Esau Edom nai laokü khuau tsalou.

¹⁷Lüko Yakob Sukkot ai khuwan, nungai apaüh tsam tsak apa thaiutha naiuso apa thainian thaiutha asoloau lahsan. Nungshioko nung athang tü Sukkot ta jon.

¹⁸Mesopotamia ainou laokü yatsün taoko Kanan goumchi nai noitsün noknio Shekem nai meikü shingoi, küta apaüh noknio shimkü tsamei tsak ko nejenkhio nou lahsan.

¹⁹Apaüh Shekem po Hamor thsaosithsoso ainou tangkason tsom tsak nou nung goh nou tuh.

²⁰Apaüh nungai asio amthang tsak shan küta nung nian El, Israel Goa ta niankiu.