Read Khiamniungan Naga Apung 34 Bible Online

Apung 34 - Khiamniungan Naga bible

Apung 34

¹Ajekhaiu tsak ko Yakob si Lea ne nio menyiuthso Dina Kanan nyiuhai ajantso tü sailuau khu.

²Tilai Hiv hai nou Hamor thso Shekem sau nung goumchi ko asong noiküla, apaüh Dina epküta nialoukü mongdem emkü lothekiu.

³Nungaih apaüh nung menyiuthso nou meikü epkü apatü tsüojinkü iula, loüh apaüh nung menyiuthso nou atsüojin shiolouau kowe.

⁴Shekemüh apa po tü ngiom, “Ngo nung menyiuthso nou jü tsammongnyiuau theau aiuji.”

⁵Yakobüh apa menyiuthso amiam epiu ta ngela, lüko tiautenai apa melothsoso eiuai thainian hoi kankü khuwanphe, apaüh ngüso moyakün lektso ti tsüchhi.

⁶Shekem po Hamor Yakob ko chiteao khunai,

⁷Yakob methsoso eiu ainou yatsün taotingko noiküla. Tilai ngüsoüh nung thaiutha lula, ngüso lekkat naiuso mongmat sungh, tiautenai Shekemüh Yakob ün menyiuthso ko mongdem emkü amiam kiutsün tsangkü Israel khaiunia lochi ta mongmat.

⁸Hamorüh Yakob tü ngiom, “Jü thso Shekem athso menyiuthso nou ko tsüojinekü iula-iu; tsüojinyangkü apako athso tsamsigoh ayangi.

⁹Samüh sam jetko tsamsigoh yamai khaiunia lou-eao amongchiotsün athalu-e tsak shanko.

¹⁰Nungaito ni nungko sam goumchi nai noiau shio-e, ni tilüsongai aiuji, ni nungai kih au shio-e, akiappe tsünoikü chaile-e kü naiuso jengtsaiu lüko atengkhaiu taiu-e.”

¹¹Nungai Shekemüh Dina po si deisinioso tü ngiom, “Ngü hau nung atsüojinyang akiu, naiuso ngo ainou ni tilüsong aiuji nung ni hau kiu-e.

¹²Ni ti paopei aiuji achite, naiuso tsammongnyiu theau nou mai chai nou ni aiutsün litso alathatkiu, ni ngü hau apalu tsamsigoh yangi naito, ni tilüsong sao-e ngo kiu-e.”

¹³Tiautenai Shekemüh ngüso nio Dina hau amiam kiuphe, Yakob thsosoüh Shekem naiuso apa po Hamor ne ta kausaikü thashin.

¹⁴Ngüsoüh apa tü ngiom, “Tsashe- thun tsütipankün khaiunia tsak hau samüh sam nio tsamsigoh yangiau tsüshio, nungto sam thaiutha amiam tsak noi-e.

¹⁵Samüh ayam tsak yam taiu küta nailu mongchioau shiom, nung ti in tünai, ni akhaiuniaso melo apem tü tsashethun tipan kiukü iula nailu shio-e.

¹⁶Nungailu sam jetko tsamsigoh yangeau mongchio-e. Sam asam ongko noiha-e naiuso asam khaiuniali iulakü noi-e.

¹⁷Lüko ni samüh hantsün ayam nouko tsünapkü naito samüh apa nialoküta khuwan-e.”

¹⁸Nung aküo ayam hantsün Hamor naiuso apa thso Shekem tü shio-eli yang,

¹⁹küta oum khaiunia nou athatkiutsün li shakta chhiau tsalou, tiautenai apa Yakob thso menyiuthso nouko tsüojinekü iula. Shekem apa tsamkhaiu ko mepem atengting tsak noiküla.

²⁰Hamor naiuso apa thso Shekem noknio bekhan nai akamshitsün athang nai ngüso nok haiko chiteau khu.

²¹“Nung khaiunia nouso samko mei-ekü noin, ngüso samko akiha-i naiuso ngüso tsühatkü atsakei-i. Ngüso thaiutha hau lüko saiukü goumchi nou sungkü noin. Samüh ngüso menyiuthsoso tsamsigoh yangko, naiuso sam thsoso lüko ngüso hau yangiau kiuko.

²²Lüko nung khaiunia nousoüh sam ongko khaiunia tsak ta haau ngüsoli sam melohoi apem tsashethun tipankü thetsün aküo nai khuhaau aiu nailu ngüso mongchio-e.

²³Ngüso eiuai taiutsün thainian chikü naiuso amao alum ngüsoüh taiu nou sam ün tsü iula-e süne? Nungtiphe samüh ngüso sam ongko kiha-iau thalouko.”

²⁴Noknio nai kihtsün paopunghoi apem Hamor si Shekem neüh ayang kiutsün ko mongchio; küta melohoi apem tsashethun tipan.

²⁵Ajekhaiu samnyi phiai, tilai nung khaiunia nouso ngüso ün tsashethün tipantsün ainou tsaikia momeikü noiküla, Yakob thsoso ainou Dina dei Simeon si Levi ne ngüne salaiu lokü mehau tsüngela- ikü noknio nai khu küta pohai nouso apem,

²⁶Hamor naiuso apa thso Shekem saokü hakü loatkü wan. Küta ngüsoüh Dina Shekem tsam ainou nialokü khuwan.

²⁷Pohai hoi apem chaoatkütün phiai Yakob thso amao nousoüh ngüso nio lomiamtsün thaiutha phaosankü ngüso nok koman, naiuso jengtsaiu apem yanhean.

²⁸Ngüsoüh thainian hoi nouso; janghoi, gado hoi, naiuso nok nai si eiu nai noitsün alum lowan.

²⁹Ngüsoüh apiamai nouso alum lowan, nyiuhai naiuso thsohai apem thalowan, naiuso tsam ainou jengtsaiu alum kankü khuwan.

³⁰Yakobüh Simeon si Levi netü ngiom, “Ajeüh jü khako angja kankü shin, loto Kanan hai, Periz hai, naiuso nung goumchi nai noitsün khaiunia pungkü nou ngü chinyan-e. Ngo khaiunia piakü tsünoi, ngüso apem kamlokü ngü tü khengshikü phaosan naito, naiuso pha poh naito, sam tsammong apem lomowane.”

³¹Lüko ngüsoüh thalakü ngiom, “Samüh sam nio tü ajisiwop nyiuhai tsakli kankei-iau tsüaiu.”