Read Khiamniungan Naga Apung 35 Bible Online

Apung 35 - Khiamniungan Naga bible

Apung 35

¹Goa nou Yakob tü ngiom, “Tsaloukü Bethel nai lükhu, küta nungaih lükih. Nungai ni adei Esau ainou khulükhuntsün taoko niko phetetsün Goa Ngo, hau nungko asio amthang tsak lüshan.”

²Nungtiphe Yakobüh apa tsammongso naiuso apako hakü noinso apem tü ngiom, “Asamüh taiutsün melemao sotsom goa nouso lüwannan, asam losioküta neshe ayan lütholo.

³Goa sau ngo khutsün apemai asai hakü noiküla, ngo angja taoko sauüh ngo hachu, apa hau ngo amthang tsak lahkiuau sam nung wankü Bethel nai khuau noin.”

⁴Nungtiphe ngüsoüh melemao sotsom goa, ngüsoüh taiutsün chikü kiuwan naiuso loüh ngüsoüh taotsün noutao lokamkü ta kiuwan. Apaüh nungso Shekem shimkü lampai khem nai khanan.

⁵Tilai Yakob naiuso apa thsoso nung athang wankü khuau tsalou, nung shimkü noitsün noksong nouso khako ahat asong tsak shin, küta ngüsoüh ngüso tü tsükom.

⁶Yakob, Kanan goumchi nai apa khaiuniaso apem hakü Luz ai, lo tisübao tü Bethel ta jonji, nungai shin.

⁷Apaüh nungai asio amthang tsak shan küta nung athang nou tü Bethel ta jon, tiautenai Goa Yakob ko apa dei ainou khulükhuntsün tao nungko phetekü noiküla.

⁸Rebeka tü paotsangtsün Debora ean küta Bethel tü ajepekki nai lampai khemko khanan. Nungtiphe nungtü, “Ashaptsün Lampai” ta jon.

⁹Tilai Yakob Mesopotamia ainou laokü shin, Goa nou apa dongai sungkü apa ouk kiu.

¹⁰Goa nou apa tü ngiom, “Anian Yakob noin, lüko lo nai yakü nung Israel” ta noi-e, nungti Goa nou apa Israel ta niankiu.

¹¹Naiuso Goa nou apa tü ngiom, “Ngo Akongting Goa noin. Chetsinyimkü singkü lükhu. Mele piakü ni ainou nyimsane, naiuso ni nokpao nouso paoteng noi-e.

¹²Ngo Abraham naiuso Isak ne hau kiutsün goumchi ni hau kiu-e, naiuso ngo loüh aphiai chetsinyimtsün athsao- sithsoso hau lüko kiu-e.”

¹³Nungphiai Goa nou apa wankü khuwan.

¹⁴Nungko, Goa apako chitetsün athang ko, Yakobüh ayangshitsün lung tsak kitaiu küta theng naiuso Olip khiam thsalutkü losiokü taiu.

¹⁵Apaüh nung athang nou tü Bethel ta jon.

¹⁶Yakob naiuso apa tsammong- soüh Bethel wankü khu, naiuso tilai ngüso Efrat athang ainou loüh ajette intso noishiküla, Rachelüh methso chettao atao saojikan, naiuso apa methso chet taoko akhemloau chekkü noiküla.

¹⁷Tilai apa methso chetloau thaikiatsün tsaokü iulawan, methso chet tao paotsangtsün nou apa tü ngiom, “Lahatkü lünoi, Rachel, nung loüh melothso noin.”

¹⁸Lüko apa ean tao noiküla, küta apa iilo athonting khako, apaüh melothso nou Benoni ta niankiu, lüko apa poüh apa nian Benjamin ta niankiu.

¹⁹Tilai Rachel ean, apa Efrat ai khutsün yam dongko khanan, lo nung tü Betlehem ta jonji.

²⁰Yakobüh nungko ayangsanao lung tsak kitaiu, naiuso nung lonyi saokü Rachel etam ta ii noin.

²¹Yakob kha ai tsülaokü khuküta Eder ehüpuo ta la-ekü athang tsak ko apaüh apa nejenkhio lahsan.

²²Yakob nung goumchi nai kihkü noitsün taoko, Reubenüh sua menyiu tsamki Bilha ko emsaikü noiküla, Yakobüh nung thaiutha lulakü thatü mongmat sungh. Yakob thso melo chekü nime noiküla:

²³Lea thsoso Reuben (thso yamchong,) Simeon, Levi, Yihuda, Isakar, naiuso Zebulun.

²⁴Rachel thsoso: Yosep naiuso Benjamin,

²⁵Rachel ün sua menyiu Bilha thsoso: Dan naiuso Naptali.

²⁶Lea ün sua menyiu Zilpa thsoso: Gad naiuso Asher. Nungso melothso nouso Mesopotamia nai kih taoko chet.

²⁷Yakob, Abraham naiuso Isak kihtsün Hebron shimkü Mamre tsamei nai apa po Isak dongai khu.

²⁸Isak aakihlaiu pon 180 sunkü kihküta ean,

²⁹naiuso apa thso Esau naiuso Yakobüh apa khanan.