Read Khiamniungan Naga Apung 37 Bible Online

Apung 37 - Khiamniungan Naga bible

Apung 37

¹Yakob apa po kihtsün Kanan goumchi nai tsülaokü kih.

²Yakob kau ngiolat nungti noin: Yosep achetpon 17 oum taoko apa po ün sua menyiu tsamki Bilha naiuso Zilpa neta chetsinyimtsün deisinioso ko onnemok hoi naiuso won hoi jimkü noiküla. Apaüh apa po dongai apa deisiniosoüh tsümeikü chhitsün ngem nouso kankü shin.

³Yakobüh apa thsoso apem khaiuko Yosep tsüojin, tiautenai apa asün taoko chetlut. Yakobüh apa hau phalaiu phakhut tsak shankiu.

⁴Tilai apa deisoüh ngüso poüh Yosep tü ngüso chiai simkü tsüojinji ta ngela, ngüso Yosep ko ngiomei tsüchitekü niokia thsüokü iula.

⁵Sotso Yosepüh mea mean tsak mean, küta nung thaiutha tilai apaüh apa deisinioso hau chite, ngüsoüh apa tekkü chinyan shikü iula.

⁶Apaüh ngiom, “Ngo meantsün mea mean tü anglu.

⁷Sam apemüh eiuai jinyakpong keshikü noiküla, jü jinyakpong ngüchu küta lukü tsakü noiküla, Nungai asam ün jinyakpong nou jü jinyakpong lemloküta nung khako kauthiokü am.”

⁸Apa deisiniosoüh sangkü ngiom, “Ni sam khako nokpao theküta nokshinge ta yangji süne?” Nungtiphe ngüsoüh apa tü loüh tekkü chinyan, tiautenai apaüh apa mea mean ngüso thaiutha ko chitetsün shioko noiküla.

⁹Nungaih loüh Yosepüh mea tsak meanshi, küta apa deisinioso tü ngiom, “Ngo loüh amao mea tsak mean shin, nung mea nou ko: aje, alei, naiuso kianthsüo chekü tsak nou ngü tü kaukü amkü epm.”

¹⁰Apaüh apa po hau lüko nung mea mean chiten, nungaih apa poüh apa tü thut: “Nung mea mean ti in athat noin? Ni anyiu, adeiso, naiuso ngo, sam khukü ni tü kau-e ta yangji süne?”

¹¹Yosep ün deisinioso apa tü niokiakü noiküla, lüko apa poüh nung apem thaiutha mongai yangkü taiu.

¹²Nyitso Yosep deiso Shekem nai tilai ngüso po ün onnemok jimao khukü noiküla.

¹³Yakobüh Yosep tü ngiom, “Ngo ni adeisinioso Shekem nai onnemok jimkü noitsün nai khu-iau aiuji.” Yosepüh thalakü ngiom, “Ngo khemloukü noin.”

¹⁴Apa poüh ngiom, “Adeiso naiuso onnemok hoi apem meikü noi si tsünoi khukü lüthaplu; küta shikü ngü hau achite.” Nungai apa poüh Hebron tsamei ainou apa hong. Yosep Shekem nai thasao,

¹⁵küta nung goumchi nai yamekeikü noin taoko khaiunia tsaküh apa epküta apa tü sangkü ngiom, “Ni ti tü yamji?”

¹⁶Apaüh thalakü ngiom, “Ngo jü deiso sauhai ngüso ün onnemok hoi jimkü noin ngüso tü yamji.” “Ngüso tiai noin nung ni chiteau shio-emo?”

¹⁷Nung khaiunia nou ngiom, “Ngüso nung ainou khuwaniu. Ngüso Dothan nai khu-e ta ngiotsün ngo lulaküla,” Nungtiphe Yosep apa deiso phi khukü ngüso Dothan nai epiu.

¹⁸Ngüsoüh Yosep laiukü nai ta ep, naiuso apaüh ngüso moshisaokün khako, ngüsoüh apa thako kausai küta apa loattao thatsan.

¹⁹Ngüso tsak si tsak chitekü ngiom, “Nungko mea meantsün shiji,

²⁰lo ashi, samüh apa loatko, küta apa meapem waikü noitsün temkhao tsak ko yakthio ko. Samüh apa liu thainian nou loattan ta ngioau shio-e. Küta samüh apa mea mean ti iula-e nung epsane.”

²¹Reubenüh nung lula küta Yosep kipsanau kowe. Apaüh ngiom, “Samüh apa laloatko.”

²²“Apa nung liutsa temkhao nailu yakthiowanko, lüko apa tü ti latawai.” Apaüh nung ngiotsün, ngüso ainou Yosep kipsan küta apa po dongai laokü hongshiau ayang noiküla.

²³Tilai Yosep apa deiso dongai shisaom, ngüsoüh apa phalaiu phakhut chipekkiu.

²⁴Nungaih ngüsoüh apa niakü khukü temkhao thang nai yakthiowan.

²⁵Ngüso heshiu taoko Ismael hai hoi tsak Gilead ainou Ijip ai khutsün alekta ep. Ngüso ut nouso angannyam nyamtsün pai eiu naiuso painek thsa nou meankü kankü shin.

²⁶Yihudaüh apa deisinioso tü ngiom, “Sam nio loatküta phikü taiutsün tsangkü samüh ti alesan eppe?

²⁷Samüh apa nungso Ismael hai hau jananko, naito samüh apa tü ti tsütawai-e; meiba tsümeiba, apa sam nio, sam nyih, naiuso sam she noin.” Apa deisoüh mongchio,

²⁸küta tilai Midia hai chaile hoi ajantsoüh shiyanlükhun, adei nousoüh Yosep temkhao khanthan ainou tensan küta Ismael hai hau apa tangkason khei he jan-an, küta ngüsoüh apa Ijip nai kankü khuwan.

²⁹Tilai Reuben khanthang nai shikü Yosep nungko tsüepsan apa amongsaiu nou meshen ne chipek.

³⁰Apa deisinioso dongai laokü shiküta ngiom, “Melothso nou nungai tsünoi! Ngo ti in chhi-e?”

³¹Nungaih ngüsoüh won tsak loat küta Yosep phakhut tü nung ashe nou laolut.

³²Ngüsoüh nung phakhut nou ngüso po dongai kankü shikü ngiom, “Samüh nung epsan. Nung athso jengtsaiu süne?”

³³Ngüso poüh nung ngesan küta ngiom, “Ah, nung apa ün! Liu thainian ajantso nou apa loattiu. Jü thso Yosep nelangkü chipekkaniu!”

³⁴Yakobüh apa neshe chipekkü mongsaiu küta nyikong nou tenlo. Apaüh apa thso thaiutha atao laiukü mongsaiukü mea shap.

³⁵Apa thso melo si menyiuhoi apem shikü apa lodang ao kowe lüko apa adangao tsüaiukü ngiom, “Ngo jü thso thaiutha mongsaiutsün tsüthonkü eantsün goumchi nai napane.” Nungti apa thso Yosep thaiutha tsülaokü apa mongsaiu.

³⁶Nung taoko, Ijip nai Midian hai nou Farao nokpao ün asonghoi tsak ongko Potipar, sau nokpao kamko ehü ahei tsak noiküla apa hau Yosep jan-an.