Read Khiamniungan Naga Apung 40 Bible Online

Apung 40 - Khiamniungan Naga bible

Apung 40

¹Atao intso noikü phiai Ijip hai nokpao thengkam semtsün naiuso themtsai saitsün asong neüh nokpao mongkia-ikü noiküla.

²Nungaih nokpao nou nung asong nime thako mongmat,

³küta Yosep khothiotsün akho tsam athang nailu ehühoi ahei tsamai ngüne khothiokü wan.

⁴Ngüso akho tsamai atao laiukü wanan, küta asong nou Yosep ngüso yathsüoau chhisiya thoilutkü taiukiu.

⁵Sotso akho tsamai taiutsünso ongko nokpao thengkam semtsün naiuso themtsai saitsün nemtsoüh mea mean tsak tsak mean, naiuso nung mea mean athat nou alat amomo noiküla.

⁶Tilai Yosep ahom ngüso dongai shin, apaüh ngüne ayangelat noikü ep.

⁷Nungai apaüh ngüne tü sangkü ngiom, “Aje lonyi tiauta yangelatkü epji?”

⁸Ngüneüh thalakü ngiom, “Je nemtsoüh mea mean tsak tsak mean kü noin, lüko nungko nung mea mean athat naiuso alat chiteau sau tsünoi.” Yosepüh ngiom, “Sauüh nung mea mean athat naiuso alat nouso chiteau shio-e nung kiutsün Goa nou noin, nungtiphe aje mea mean ngü hau achite.”

⁹Nungai nokpao thengkam semtsün nou ngiom, “Jü mea ko nungai sainaoshep,

¹⁰pai akia süme sunkü noiküla, Nung asha nou sungsisung küta, apun nou sungh, küta sainaoshep nou nyankü iula.

¹¹Nungaih ngo nokpao thengkam semkü noiküla; ngo nung sainaoshep nou panlo küta thippekkü thengkam nai thio, küta nung nokpao hau kiukü noiküla.”

¹²Yosepüh ngiom, “Nung athat nungti noi-e: paikia süme nou ajekhaiu samnyi.

¹³Samnyi mongko nokpao nou ni sokkane, ni hau wankiu-e, küta ni aya chhitsün nailu taiushi-e. Tilai ni nokpao thengkam semtsün noiküla, ni aya chhikü shitsünlu ni apa hau thengkam nou kiushi-e.

¹⁴Lüko athaiutha alum meikü khunai tsüojinyangkü ngo ayangsan, naiuso nokpao nou ta jü thaiutha lüko chiteküta nung akho tsam ainou shi-anao ngo ahachu.

¹⁵Meiba tsümeiba, ngo Ibri hai goumchi ainou kaukü kanlükhunkü noin, naiuso nungai Ijip nai lüko ngo nung akho tsamai noiau maikü titso tsüchhitaiu.”

¹⁶Tilai themtsai saitsün asong nou thengkam semtsün mea mean athat alat waokü chiteji ta ep, apaüh Yosep tü ngiom, “Ngo lüko mea tsak mean kü noin. Ngo themtsai kim süme jü khaiu ai kankü noiküla.

¹⁷Asungthun kim mongko nokpao hau in pungkü nou saitsün noiküla, naiuso waio nousoüh nung hean.”

¹⁸Yosepüh thalakü ngiom, “Nung athat alat nungti noi-e: Themtsai kim süme nou ajekhaiu samnyi noin.

¹⁹Samnyi nouko nokpao nou ni sokke, küta akhaiu tapsankü wane! Küta amea pem apaüh phankü wane, loüh nung waio nouso shikü anyih heane.”

²⁰Ajekhaiu süme noikütün phiai nokpao nou apa chet sümai tsak shankü apa asonghoi hau waoshen, apaüh apa thengkam semtsün naiuso themtsai saitsün ne sok küta asonghoi khako nialokü shin.

²¹Apaüh thengkam semtsün hau apa aya chhithang nai laokü kiushi;

²²lüko apaüh themtsai saitsün asong nou loat kü wan. Nung apem Yosepüh ngiotsünli thawao.

²³Lüko thengkam semtsün khaiunia nou Yosep ngio tsüyangsanshi kü apa thaiutha apem peankü khuwan.