Read Khiamniungan Naga Apung 41 Bible Online

Apung 41 - Khiamniungan Naga bible

Apung 41

¹Pon nime yankütün phiai, Ijip nokpao nou mea mean tsak apa Nail haiukok nai tsakü noikü mean.

²Nungai jangtso chinyat usokkü a-on meikü tsahkü haiumong ainou sung küta khengliu tsamheau tsalo.

³Loüh amao jangtso chinyat sungshi, nungso to paiuthingkü naiuso achinyanao lümeikü noiküla. Nungso haiusai nai amao jangtso nouso dongko tsa,

⁴küta atsaosilao jangtso nousoüh atsa jangtso nouso miolikü hean. Nungai nokpao nou mea mean ainou chunge.

⁵Apa loüh müjam sailashi nai amao mea mean tsak meanshi. Tsopong amei naiuso nyankü noitsün chinyat tsopai tsak ta sungh.

⁶Nungko loüh amao tsopong chinyat lüko chetsanshi, nungso singtso goh ahsheih nou thatü makü naiuso sheikü noiküla;

⁷nung makü noitsün tsopong nousoüh tsopong amei nouso miolian. Nokpao nou chunge küta nung apaüh mea meanji ta ngesan.

⁸Ahom apa yangelatkü noiküla, nungtiphe apaüh Ijip nai noitsün angehoi naiuso athanga ii hantsünso chikü dongai ngio hong. Apaüh apa mea mean nouso chiten, lüko sauühtso apa hau alat chiteau tsüshio.

⁹Nungaih thengkam semtsün nou nokpao nou tü ngiom, “Ngo phiokü chhianiu ta ngo lonyi to pheksanau noin.

¹⁰Ni themtsai saitsün asong nou je ta mongmatkü noiküla, naiuso ni sam süpaihoi ahei nou tsamai akho tsamai wanankü noiküla.

¹¹Sotso je nemtsoüh mea mean tsak tsak mean, naiuso mea mean nou alat athat amomo kiukü noiküla.

¹²Ibri hai oum tsak nungai sam ko noiküla, apa ehühoi ahei nou sua tsak noiküla. Samüh apa hau sam mea mean chiten, naiuso apaüh sam thaiutha nung lathat kiu.

¹³Apaüh ngiotsünli alum yanlükhunkü thawao: ni ngo akeng chhisiya nailu taiukiushi, lüko ni themtsai saitsün to loatkü wan.”

¹⁴Nokpao nou Yosep dongai hong, küta apa akho tsam ainou shakta nialokü shi. Apaüh sonpon iuwanlo, naiuso neshe lianlo küta apa nokpao khako shin.

¹⁵Nokpao nou apa tü ngiom, “Ngo mea mean tsak mean kü noin, naiuso sauüh nung athat alat chiteau tsüshio. Ni mea mean nou alat sasa kiuau shioji ta ngo lulan.”

¹⁶Yosepüh thalakü ngiom, “Ngo tsüshioji, Akhengting Nokpao, lüko Goa nou ni hau mongtsam thasangkiukü alothatsün kiu-e.”

¹⁷Nokpao nou ngiom, “Ngo Nail haiukok nai tsakü noikü ngo mea mean tsak ep.

¹⁸Tilai jangtso chinyat atsah si usokkü auon meikü haiu ainou sung, küta khengliu tsamheau tsalo.

¹⁹Nungai amao jangtso chinyat sungshi, nungso tsaosilao naiuso achinyanau lümeikü noiküla. Nungso ngo Ijip nai tilaitso tiai tso tsüeptsün achinyanting jangtso hoi noiküla.

²⁰Nung apaiuthing jangtso nousoüh atsah jangtso nouso miolikü hean,

²¹lüko sauüh nung tsünge, tiautenai nungso aya nousolilu tsümeitingkü noiküla, nungai ngo chunge.

²²Loüh ngo tsopai tsak tü tsopong chinyat nou meankü naiuso nyankü sungkü ep.

²³Nungaih loüh singtso goh ahsheih nou wonankü matchaikü tsopong chinyat nyim- sanshi,

²⁴küta tsaosilao tsopong chinyat nou tsopong amei chinyat nouso miolikü hean. Ngo nung mea mean nouso athanga ii hantsünso hau chite, lüko ngüso sauüh nung alat ngü tü ngioau tsüshio.”

²⁵Yosepüh nokpao tü ngiom, “Mea mean nime alat nou emkülu athat ngioji: Goa nou nitü apaüh ti chhiao noin nung chite-iu.

²⁶Jangtso atsa chinyat nou pon chinyat, naiuso loüh tsopong chinyat nyankü noitsün lüko pon chinyat, nungso alat nunglu noin.

²⁷Jangtso paiuthingkü chinyat intso noiküta sungtsün naiuso tsopong amatchai chinyat sübao singtso ahsheih nou wonkü noiküla nung pon chinyat naiusile noin.

²⁸Nung ngo nitü ngiotsün lilu noin, Goa nou apaüh ti chhi-e nung ni hao hanji.

²⁹Pon chinyat Ijip goumchi apem nai alum tsükhemkü noi-e.

³⁰Nungphiai pon chinyat naiusile noi-e, nungaih pon amei nouso apem peane, tiautenai naiusile nou nung goumchi lotheane.

³¹Saiukü taiu- tsün atao nou thumkü peane, tiautenai naiusile tisübao hoilutkü shiji nung angioau tsüshiokü tsak noi-e.

³²Amea mean laoshikü meantsün to: nung chhi nou Goa nou tongtü thatkü wananiu, küta nung apaüh tsütsangkü thawao-i-e.

³³“Loto ni angelatsün naiuso mongthat mongsai naptsün khaiunia ajantso yam loküta goumchi apem khako alum ta apaotsangao taiu nai mei-e.

³⁴Ni loüh amao asonghai lüko chhi nai kiukü ta alum tsükhemkün pon chinyat nouko haoson pungo taiuloau noin.

³⁵Khaiunia nouso tü chhitha pon nouko chih nou kamtaiuao ngiokhem lükiu, küta noknio nai chih nou kamsankü taiuküta ehü lolutkü taiuao oukong lükiu.

³⁶Nung chih nou naiusile pon chinyat thaiutha goumchi apem hao waoshen shiau kamtaiuau noin, nung Ijip nai thawaoau noin. Nungaih to khaiuniahoi nou tsünaiu-e.”

³⁷Nokpao naiuso apa khemko asonghoi nou nung chhithang mongchiokü lou,

³⁸küta apaüh ngüso tü ngiom, “Samüh Yosep tü simkü amao khaiunia sau tsüeppe, khaiunia sau da Goa Onthso nou noin.”

³⁹Nokpao nou Yosep tü ngiom, “Goa nou nihau nungso apem haniu nungtiphe nung angela mongthat mongsai khengai sau tsünoi-e ni ta thsale asong noin ta tsangsheiji.

⁴⁰Ngo ni jü goumchi paotsangao taiukiu-e, küta jü khaiuniaso apemüh ni ngiotsün angkü noi-e. A ngiokhem oukong jü ngiokhem oukong khemtengko noi-e.

⁴¹Ngo lo ni Ijip goumchi apem thaiutha nokshingpaou taiukiuji.”

⁴²Nokpao nou apa phakhatso ainou nokpaoling niansat suonkü khiaptso nou ngiosan küta Yosep tü ngiolutkiu. Apaüh ne ashethop ameiting nou Yosep tü tenlutkiu, naiuso apa sang lemkü chaiou nou shantsün sangkom ngiothio kiu.

⁴³Apaüh nokpao keitsün mokthso nou apa khemko haove nime nou ko apa hau kiu, naiuso apa asuhat kiutsün apa khako khukü wekü ngiom, “Yam asopkiu! Yam asopkiu!” Nungti Yosep Ijip goumchi apem khaiuko nokshingpaou shankiu.

⁴⁴Nokpao nou apa tü ngiom, “Ngo nokpao, Ijip goumchi ko sauühtso ni ngiokhem tsükiukünai phasihok loksanau tsüshio.”

⁴⁵Apaüh Yosep hau Ijip hai nian Zaphanat Panea ta niankiu, naiuso Heliopolis noknio nai meson tsak Potifera thso menyiu nian nou Asenat apa tsammongnyiu theau kiu. Tilai Yosep Ijip goumchi nokpao yathsüoau tsalo apa achetpon 30 noiküla. Apaüh nokpao mikhemthang letaiukü Ijip goumchi apem nai sailukü tsakei.

⁴⁶

⁴⁷Alum tsükhemkü noitsün pon chinyat taoko goumchi nai eheshiu saiukü sungh,

⁴⁸nung apem Yosepüh kamshiküta noknio nai khaikamkü wan.

⁴⁹Nungaih tsonyak piaküphe Yosepüh athatao tsüshiokü tsonyak nouso haiusai nai singtso li noiküla.

⁵⁰Naiusile moshikün khako Asenat tsangkü Yosep thso melo nime noiküla.

⁵¹Apaüh ngiom, “Goa nou ngü angjatsün naiuso jüpo ün tsammongso pean-iau nung shankium,” nungtiphe apaüh apa nioyamchong nou Manase ta niankiu.

⁵²Apaüh loüh ngiom, “Goa nou ngü angjatsün goumchi nai ngü hau thsoso kium.” Nungtiphe apaüh apa thso nime nou nian Efraim ta niankiu.

⁵³Alum tsükhemkü taiutsün Ijip goumchi khaiunia monglingetsün thonkü shin,

⁵⁴küta naiusile pon chinyat nou tsalo, nung Yosepüh ngiotsün khekkü noiküla. Nungaih amao goumchi pungkü nai lüko naiusile, noiküla, lüko Ijip goumchi koto khülam nou epkü noiküla.

⁵⁵Tilai Ijip nai naiu nou yalo, ngüsoüh wekü nokpao tü khülam nou sao; nungtiphe apaüh Yosep dongai lükhu ta ngiokhem kiu, küta apaüh tilüsong ngio-e, nung lüchhi ta ngiom.

⁵⁶Naiusile nou tekkü tsaokü iula, naiuso goumchi apemai lingkü khu, nungtiphe Yosepüh khülam kamtaiutsün tsam apem sopküta Ijip hai hau khülam nou jankiu.

⁵⁷Khaiuniahoi goumchi apemai nou Ijip ai Yosep ko khülam tuh ao shin, tiautenai nung naiusile nou alumai thatü thsüokü noiküla.