Read Khiamniungan Naga Apung 46 Bible Online

Apung 46 - Khiamniungan Naga bible

Apung 46

¹Yakobüh apaüh taiutsün apem khemkü yamsan, küta apa po Isak Goa tü amkham chaithio kiutsün thang Bersheba nai khu.

²Goa nou asoh apa tü atsangshei tsak nai chitekü, “Yakob, Yakob!” ta jon. Hauh, ngo nungai noin, ta apaüh thala.

³Apaüh ngiom, “Ngo Goa, apo Goa.” “Ijip nai khuau lahat; Ngo nungai athsaosithsoso mele asong tsak shane.

⁴Ngo Ijip nai niko khuha-e, naiuso athsaosithsoso nung goumchi ai laokü nialokü shishi-e. Ni tilai eane Yosep niko hakü noi-e.”

⁵Yakob Bersheba ainou tsalo, apa thsosoüh apa, ngüso thsoso, naiuso ngüso tsammongnyiuso tisübao mokthso nou kankeitsün tsamkei Ijip nokpao nou hongkü noiküla nungko noi-i.

⁶Ngüsoüh ngüso thainian apem naiuso jengtsaiu apem Kanan nai noi taoko kamsantsün lokü Ijip nai khu.

⁷Yakobüh apa thsoso, apa thsaoso melothso hoi si menyiuthso hoi nouso apem apako nialo.

⁸Yakob ün tsammong apako hakü Ijip nai khutsün mepem nouso: apa thso yamchong Reuben,

⁹Naiuso Reu- ben ün thsoso: Hanok, Palu, Hezron, naiuso Karmi.

¹⁰Simeon thsoso: Jemuel, Jamin, Ohad, Jakin, Zohar, naiuso Kanan nyiuhai thso nou Shaul.

¹¹Levi thsoso: Gershon, Kohat, naiuso Merari.

¹²Yihuda thsoso: Shela, Perez, naiuso Zera. Yihuda ün thso amao nouso: Er, naiuso Onan, nung Kanan nai ean. Perez thsoso: Hezron naiuso Hamul;

¹³Isakar thsoso: Tola, Pua, Jashub, naiuso Shimron;

¹⁴Zebulun thsoso: Sered, Elon, naiuso Jarel.

¹⁵Mesopotamia nai Yakob tü Lea tsangkü chetluttsün thsoso: Apa thso menyiuthso nou Dina hakü nai apem kamkü thsaosithsoso mepem 33 noiküla.

¹⁶Gad thsoso: Zephon, Hakki, Shuni, Ezbon, Eri, Arod, naiuso Areli.

¹⁷Asher thsoso: Imna, Isva, Isvi, Beria, naiuso ngüso nio menyiuthso Sera. Beria thsoso: Heber, naiuso Malkil.

¹⁸Nung Yakob thsaosithsoso 16 nouso Labanüh apa thso Lea hau sua menyiu tsamki Zilpa sau kiukü noiküla, apa tsangkü chetsinyimtsünso noin.

¹⁹Yakob tsammongnyiu Rachelüh apa hau melothso nime chetkiu: ngüne Yosep naiuso Benjamin noiküla.

²⁰Ijip nai noi taoko Yosep tü melothso nime chetlut: ngüne Manase naiuso Efraim noin. Heliopolis nai meson tsak thso Potifera apa menyiuthso Asenat tsangkü chetlut- kiu.

²¹Benjamin thsoso: Bela, Beker, Asbel, Gera, Naaman, Ehi, Ros, Muppim, Huppim, naiuso Ard noiküla.

²²Nung Yakob ün thsaosithsoso 14, nouso Rachel tsangkü noiküla.

²³Dan thso Hushim,

²⁴Naptali thsoso: Jezeel, Guni, Jezer, naiuso Shillem noiküla.

²⁵Nungso chinyat nouso Yakob thsaosithsoso Labanüh apa thso Rachel hau sua tsamki Bilha kiutsün tsangkü noiküla.

²⁶Yakob tü saitha chetsinyimkü khutsün thsaosithsoso sauhai apa ko Ijip nai khuha, apa thsoso tsam- mongnyiu nouso tsüwehakünai apem kamko mepem 66 noiküla.

²⁷Yosep tü Ijip nai melothso nime chetlut, Ijip goumchi ai khutsün Yakob kau apem wenai khaiunia 70 noiküla.

²⁸Yakobüh Yosep tü ngüso Goshen nai epeau asangluau Yihuda kha ai hong: tilai ngüso shisao,

²⁹Yosep apa mokthso chiai moknoikü Goshen nai apa poko epeau khu. Tilai ngüso phete, Yosepüh apa pha nou apa po sang nai piplo küta atao laiukü shap.

³⁰Yakobüh Yosep tü ngiom, “loto ngo ni epphe, naiuso lo saokü aa noin ta ngephe, ngo eanau khemlokü noin.”

³¹Nungai Yosepüh apa deisinioso naiuso apa po ün tsammongso tü ngiom, “Jü deisinioso naiuso jü po tsammongso sauhai Kanan nai kihkü noiküla ngüso jü dongai shi-iu ta ngü khukü nokpao hau chiteau noin.

³²Asam onnemok jimtsünso, thainian aa nyimtsünso, asamüh asam thainian hoi, in amomo ahoi ahoi sunkü naiuso asam ün alum jengtsaiu sunkü shikü noin ta ngo apa hao chiteko.

³³Tilai nokpao nou asam jonküta asam chhi atengting ti ta sang nai,

³⁴asam paosiposoüh chhikü shitsünli asam aaki tha- thunkü thainian aa nyimkü pao- tsangkü shin ta chiteau tsüphiokü lüthe. Nungli apaüh asam Goshen khiamkhan nai kih-i-e.” Yosepüh nung ngiotsün tiautenai Ijip haiüh onnemok jimtsünso tü to ti angja kiuau tsünoiküla.