Read Khiamniungan Naga Apung 48 Bible Online

Apung 48 - Khiamniungan Naga bible

Apung 48

¹Atao intso noiküta Yosep hau apa po akia noin ta chite. Nungtiphe Yosep apa thso Efraim naiuso Manase ne nialokü Yakob ko pheteau khu.

²Tilai Yakob hau apa thso ne apa ko pheteau shikü noin ta chite, Yakob, apa ou kongloshiküta then chiai chukü moknoi.

³Yakobüh Yosep tü ngiom, “Akongting Goa nou ngü tü Kanan goumchi Luz nai tsangsheikü sungküta ngü ouk kium.

⁴Apaüh ngü tü ngiom, Ngo ni hau thsoso piakü kiu-e, küta athsao- sithsoso mele piakü iula-e; ngo athsaosithsoso hau nung goumchi athon tsüyangkü theau thaiutha kiu-e.”

⁵Yakobüh ngioshiji, “Yosep, athso ne, sauhai ni tü Ijip nai ngo moshikün khako chetlut, nung jü haoson noin, Efraim naiuso Manase ne jüthso Reuben si Simeon ne lilu atengting noin.

⁶Ni tü loüh melothso chetlut shinai, ngüso to ngü ün ta tsümonglo shi-e, paopung eptsün to Efraim si Manase ne tsangkü noi-e.

⁷Ngo nung anyiu Rachel kuothako chhiji. Ngo Mesopotamia ainou laokü shitsün taoko, Efrat ainou laiukü mokhukü, Kanan goumchi nai ngo thsüokü yangelatikü apa ean. Ngo apa nungai Efrat ai khutsün yamkuk nai khanan.” (Efrat tü lo Betlehem ta jonji.)

⁸Tilai Yakobüh Yosep thso ne ep, apaüh sangkü ngiom, “Nung sauhai thso?”

⁹Yosepüh thalakü ngiom, “Nungso jü thsoso, sauhai ngü hau Ijip nai kih taoko kium.” Yakobüh ngiom, “Ngo ngüne ouk kiuau jü dongai nialokü ashi.”

¹⁰Asun shioko Yakob niovei outsükong nou apaüh meikü epau tsüshio. Yosepüh melothso nou ne apa dongai nialokü shinai, apaüh ngüne piploküta son nai chep.

¹¹Yakobüh Yosep tü ngiom, “Ngo tilaitso ni epshi-e ta tsüyangkü noiküla, naiuso lo Goa nou ngü hau athsoso saokü epi-iu.”

¹²Nungaih Yosepüh ngüne Yakob shiokha ainou nialoküta apa khako khakheng nou goh da thankü kauthio-i.

¹³Yosepüh Efraim Yakob tsat ai naiuso Manase apa uai ta taiukiu.

¹⁴Lüko Yakobüh apa pha jih- eküta pha uai nou anio nou Efraim khaiu ai thanglut, naiuso apa pha tsatai nou adei nou Manase khaiu ai thanglut.

¹⁵Nungaih apaüh Yosep ouk kiu: “Jüposo Goa sau, Abraham si Isak soüh yathsüokü shin, nungüh nung melothso nouso ouk akiu! Goa, sauüh ngo nung ajekhaiu saokü nialokü shin, nungüh ngüso ouk akiu!

¹⁶Hong, sauüh ngo atawai apem ainou juosan, nungüh ngüso ouk akiu! Jü nian naiuso jüposo Abraham naiuso Isak nian, nung melothso nouso tsangkü aa anoi-i! Ngüso thsoso naiuso thsaosithsoso piakü lünoi-i!”

¹⁷Tilai Yosepüh apa po pha uai nou Efraim khaiu nai thanglutkü ep, apa nungtü tsümonglingkü noiküla, nungtiphe apaüh apa po pha Efraim khaiu ainou Manase khaiu ai thanglut au lowan.

¹⁸Apaüh apa po tü ngiom, “Po, ayam nou nungti tsüde, niochong nou nung melothso nou noin; apha uai nou apa khaiu ai athanglut.”

¹⁹Nungaih apa poüh tsümong- chiokü ngioji, “Ngo ngeji, jü thso, ngo ngeji. Manase thsaosithsoso lüko mele asong tsak iula-e. Lüko apa nio apatü songthsokü noi-e, naiuso apa thsaosithsoso mele asong tsak iula-e.”

²⁰Nungtiphe apaüh nung ajekhaiu ko ngüso ouk kiukü ngioji, “Israel haiüh tilai ouk kiutsün misao sao-e, ngüsoüh anian jone. Ngüsoüh ngio-e, Goa nou ni Efraim naiuso Manase li ashankiu.” Nungti Yakobüh Efraim nung Manase tü songthsokü ouk taiukiu.

²¹Nungaih Yakobüh Yosep tü ngiom, “Ni eptsün li, ngo eanau atao saokü noin, lüko Goa nou niko ha-e naiuso ni apaosiposo goumchi ai laokü nialokü shishi-e.

²²Shekem, goh mei khiamkhan nou ngo sübao jü sah naiuso jü uokoppai tsangkü Amor hai ainou thalou, nung adeiso hau tsüdekü ngo ni hau kiuji.”