Read Khiamniungan Naga Apung 49 Bible Online

Apung 49 - Khiamniungan Naga bible

Apung 49

¹Yakobüh apa thsoso jonkü ngiom, “Komshikü akam, küta ngo ashiau taoko asam tü ti shithawao-e nung chiteko:”

²“Kamkü ashi küta anglu, Yakob thsoso. Asam po Israel tü anglu.”

³“Reuben, jü thso yamchong, ni jü oukong noin naiuso, ngo khaiunialotsün thso yamchong, Jü thsoso chikü nouko ni niansong nai, naiuso oukong nai asuhat suntsün atengteng.

⁴Ni asangloau tsüshiokün khiampek tsak khekkü, Lüko ni thatü atengau tsüthe-e, tititenai ni jü tsamki menyiu nouko saihan, küta apo then lochinyan.”

⁵“Simeon naiuso Levi ne adeianio, ngüneüh ngüne dunsiyam kankeikü tsümeikün sunheji.

⁶Ngü ngüne akau ai ngemtsün ko tsüha-e. Tsüdekünai ngo ngüne kam nai haoson tsüloha-e, tititenai ngüne amongmat nai khaiunia loat. Naiuso ngüneüh mongchiotsün nai, jangtsopong thsan uo-pao hethatji.

⁷Ngüne amongmat tü athesan lünoi-i, tiautenai nung thatü thsüokü noin, naiuso ngüne amongmat nai athesan lünoi, tiautenai nung atsüojin tsülep, Ngü ngüne Israel goumchi apem meankü pengpuni-e, Ngo ngüne nung khaiuniaso ongko wonpengi-e.”

⁸“Yihuda, ni adeisiniosoüh lomsane; Niko tsaotsünso tü ni sang nai thalo; Adeisiniosoüh akhako kaukü nape.

⁹Yihuda to chongkaonio khekkü noin, apako khengetsünso loat küta apa ken nai laokü shiji. Uo apem khongkü lukü saikü noitsün ainou, sauüh apa lochu kiuau tsüsom.

¹⁰Yihudaüh nokpao pailai nou seme, naiuso apa thsaosithsosoüh asaichi nokshinge. Mele nousoüh apa hau paopei nou, kankü apa khako asuhat kiukü kauthio-e.

¹¹Apaüh apa gado ehen nouso sainaoshep pai nou ta phantaiu-e, Nung shep ameiting nou ta phankü, apaüh meshen neshe theng nou, naiuso apa shitho sheli aseng nai phetanji.

¹²Theng nou apa niovei shenge, naiuso nyao nou apa huo jaothokkü yanthsü-e.”

¹³“Zebulun khiamnok sai nai kih-e, Apa haiusai nai kheng asong taiutsün the-e, Sidon nok ko apa elung noi-e.”

¹⁴“Isakar nung gado akong tsakli, Onnemok tsampai nime jetko saikü noitsün.

¹⁵Lüko apaüh nung athang nou aalutsün meikü noin ta epji, naiuso goh nou amongchiotsünli, apaüh thsa kanau apa san kaukü napji. Naiuso sua li chhiau oukong nou thoilutji.”

¹⁶“Dan to apa khaiunia thaiutha nokpao noi-e, ngüso to Israel amao mele nouso lilu noi-e.

¹⁷Dan to yamtsai nai pao tsakli noi-e, Yamkok nai shee noitsün pao tsak, nungüh mokthso nouso chan nai haiuji. Nungti nung chiai moknoitsün phiai sheikü loithiowanji.”

¹⁸“Ngo ni akipsantsün tü taiuji, APAOU.”

¹⁹“Gad to kauhoi tsaküh komane, lüko apaüh phokleshikü ngüsobao komkeishi-e.”

²⁰“Asher ün goh ai chihsikhiam amei sunge, Nokpao eheshiu thaiutha apaüh chihsikhiam losan-e.”

²¹“Naptali to jinchai li khaolaokü tsakei-e, apaüh athapau meikü athso punkiutsünli noi-e.”

²²“Yosep to eiu eiutsün paikia tsakli, haiusai nai eiu eiutsün paikia tsak, sübao paikia nousoüh dioai nouso sojeiji.

²³Apa ehsoüh apa tü tsaokü komkei, naiuso apa tü eh nousoüh, uokoppai naiuso chon nouso semkü komkei.

²⁴Lüko apa uokoppai tsühenyi, naiuso apa phasihok mongkü noin. Akongting Yakob Goa oukong tsangkü, Israel solotsün onnemok jimtsün tsangko.

²⁵Sauüh ni hachu nung apo ün Goa noin, Ni ouk kiutsün Akongting Goa noin. Khütha ainou ah-uo khiam ouk nou, naiuso goh akheiteng ainou khiam a-aoting nou, Thainian hoi naiuso thsoso piakü ouk kiutsün,

²⁶Chihsikhiam naiuso taopun nouso ouk kiutsün, Akeng king nouso ouk kiutsün, Athon tsüyang king nouso ainou asamsantsün alum, nung ouk nouso Yosep khaiu ai lünoi. Naiuso meshen deisinio ainou, Nung ouk nouso Yosep khaiu ai lünoi.”

²⁷“Benjamin to liuai kihtsün chio ajetengli iula-e, apaüh ahom asham loatkü heau eppe.”

²⁸Nungso Israel kau chekü nime, naiuso nung ngio nouso ngüso, poüh meshen thsoso pungkü ta momo tü maikü noitsün ouk nouso kiukü athon ngio chitekü ngiom.

²⁹Nungthan kü Yakobüh apa thsoso tü thoilutkü ngiom, “Loto ngo jü khaiuniaso ko eantsün nai ngüso ko haau thaiutha khuwanji, naiuso Het hai Efron tsamei nai noitsün Lungken nai kümei jüposo ko ngo ataiukiu,

³⁰nung Lungken nou Kanan goumchi nai Mamre tsamei ajepek nai noitsün Makpela goh ko, etam thaiutha Abrahamüh Het hai nou Efron ko tuhsan.

³¹Nungko ngüsoüh Abraham naiuso apa tsammongnyiu Sara; Isak naiuso apa tsammongnyiu Rebeka, naiuso Lea khanan.

³²Nung gohthang naiuso Lungken nouso Het haiko tuh, ngo nungko akhanan.”

³³Tilai Yakobüh apa thsoso tü ayamhan nouso chitekhem, nungko apa then ai sai küta ean.