Read Khiamniungan Naga Apung 50 Bible Online

Apung 50 - Khiamniungan Naga bible

Apung 50

¹Yosep apa po dongai shimkü shikü shap, naiuso khakheng nai son nou chep.

²Nungaih Yosepüh apa po mea tsüchoiankü hau apaotsangau ngiokhem kiu.

³Nung choiankü tsükhukü hau apao- tsangtsün asaita ajekhaiu aopülenyi thethekü noiküla. Ijip haiüh apa thaiutha meathio anuo ajekhaiu aochinyatnyi nuokü noiküla.

⁴Tilai meathio anuo tao yanlükhun, Yosepüh nokpao khemko asonghoi tü ngiom, “Tsüojinyangkü nung ngio nokpao dongai kankü akhukiu:

⁵‘Tilai jüpo eanau atao shimkü noiküla, apaüh khemtaiu- tsün Kanan goumchi nai etam nouko apa mea akamtaiu ta ngiomong shinge tsak shankü noiküla. Nung- tiphe tsüojinyangkü jüpo khananao ngo akhu-i, küta ngo laokü shishi-e.’”

⁶Nokpao nou thalakü ngiom, “Ni chhi-e ta thalokü taiutsünli khuküta apo lükhanan.”

⁷Nungtiphe Yosep apa po khananao khu. Nokpao khemko asonghoi apem, apa mikhem noikham nai noitsün ashe hoi, naiuso Ijip nai aniakei khaiuniahoi chikü Yosep ko khuha.

⁸Apa tsammongso, apa deiso, naiuso apa po tsammong apem apako khuha. Goshen khiamkhan naito ngüso methso ehen hoi, onnemok hoi, won hoi, naiuso janghoi lu taiukü apem khu.

⁹Ehli tsamkei nai keitsün khaiuniahoi, mokthso chiai keitsün khaiunia hoi, nouso lüko apako khuha; nungko hoi asongting tsak noiküla.

¹⁰Tilai ngüso Yordan ajepekki nai noitsün Atad ko thamthaotsün athang tsak ko shisaom, ngüso atao laiukü sang songkü shikü mongsaiu, küta Yosepüh amongsaiu amkham kiukü nungko ajekhaiu chinyatnyi shaman.

¹¹Tilai Kanan paopunghoi nou khaiunia nouso Atad nai mongsaiutsün ep, küta ngüsoüh ngiom, “Ijip haiüh amongsaiu amkham nungti mongkü titi chhiji!” Nung shioko nung athang nou tü Abel Mizraim ta jon.

¹²Nungtiphe Yakob thsosoüh ngüso tü thoiluttsünli chhin;

¹³Ngüsoüh apa mea Kanan nai kankü khuküta Het hai nou Efron goh Abrahamüh etam gohthang au thaiutha tuhtaiutsün Mamre tsamei tü ajepek ai noitsün Makpela nai Lungken nouko khanan.

¹⁴Yosepüh apa po khanan kütün phiai apa deiso naiuso apa po khananao sauhai apako khuha ngüso apem hakü Ijip nai laokü yashi. Yosepüh apa Deiso mong Losongshiji

¹⁵Ngüso po ean küta phiai, Yosep deisiniosoüh ngiom, “Samüh apa tü tsümeikü chhikü noitsün thaiutha Yosepüh sam tü thamshiau ayang noinai naiuso tsülaokü chinyan nai titi the-e?”

¹⁶Nungtiphe ngüsoüh Yosep dongai ngio tsak hong: “Sam po mo eankün khako apaüh ni tü nungti lüsang ta sam tü ngiom,

¹⁷‘Tsüojinyangkü adeisiniosoüh ni tü aphio atso chhitaiutsün awankiu.’ Lo tsüojinyangko apo Goa yathsüo- tsünsoüh ni tü chhi taiutsün, awankiu.” Tilai nung ngiopung ep, Yosep shap.

¹⁸Nungaih apa deisinioso chija shikü apa khako kauthiokü ngüsoüh ngiom, “Sam atsamkiso akhako nungai noin.”

¹⁹Lüko Yosepüh ngüso tü ngiom, “Lahat, ngo jüpem Goa thangko taiuau tsüshio.

²⁰Asamüh jü thako tsümeikü mongthat thatsan, lüko Goa nou ti thawao-ikü shikü noiküla nung shioko lonyi khaiunia piakü aa nou noin nung kipsanau thaiutha noiküla.

²¹Asam ti ahatao tsünoi. Ngo asam naiuso asam thsoso paotsange.” Nungti apaüh ngüso mongtü thankü atsüojin ngio nou ngüso mongtsamikü lomongsong kiushi. Yosep Ean

²²Yosep Ijip nai apa po tsammongsoko aikü tsülaokü kih. Apa eantsün taoko achetpon 110 noiküla.

²³Apa Efraim thsoso naiuso thsaoso lüko epkü aakihlaiukü kih.

²⁴Apaüh apa deisinioso tü ngiom, “Ngo eanau atao saokü noin, lüko Goa nou Abraham tü, Isak tü, naiuso Yakob tü, mongkü thalotaiutsün goumchi nai nung goumchi ainou khukü sam yam nia-e naiuso paotsang-e.”

²⁵Nungphiai Yosepüh apa khaiuniaso tü ngiomong shinge tsak shanau sanghkü ngiom, “Ngü tü Athalou,” “Tilai Goa nou asam nung athalotsün goumchi nai nialokü khu-e, asamüh jü mea asamko kankü khuau noin.”

²⁶Nungti Yosep achetpon 110 kihkü Ijip nai ean. Ngüsoüh apa mea tü khaiutsom tsomlutkü paotsangküta mea paidan nai lokthio.