Read Khiamniungan Naga Apung 6 Bible Online

Apung 6 - Khiamniungan Naga bible

Apung 6

¹Tilai khaiuniathso nou goumchi apemai shingkü khu, ngüso tü menyiuthso nouso chetlut.

²Goathso nousoüh khaiunia menyiuthso nouso aleng meikü epkü, ngüsoüh aiutsün chikü ngüsoüh tsammongnyiu theau lou.

³Nungaih APAOU nou ngiom, “Jü Onthso khaiunia da asaita tsünoi-e, tiautenai apa nyihlu noin, lüko lo nai yakü apa aakihlaiu pon 120 chiai tsükih-e.”

⁴Nungso ajekhaiu nai goumchi nai akongtinghoi noiküla, naiuso nungphi lüko tilai Goa thsoso khaiunia menyiuthso ko emküta ngüsoüh ngüso thso chetkiu; ngüso peta nai yakü lenghoi niansong eptsün khaiunia noiküla.

⁵Tilai APAOU nou khaiuniathso aphio angei goumchi nai sungkü naiuso ngüso mongpem mongsai yangtsün asaichi tsümeikü ep;

⁶nungai khaiuniathso nou tiauta goumchi nai shan ta APAOU mong kiakü yangshi, naiuso apa mongkia.

⁷Küta APAOU nou ngiom, “Khaiuniathso sübao ngo sheithokü shan, thainian, achinkeitsün, maou nai jeikeitsün, waio nouso, ngo goumchi ainou moisemkü mowani-e; tiautenai ngüso shithosantsün thaiutha jümong kiakü yangsanji.”

⁸Lüko Noa, APAOU niothapko atsüojinyang epsan.

⁹Noa ainou nyimsantsün vetao- ling nungso: Noa asio khaiunia kihküla, naiuso apa vetaoko aphio tsüleptsün tsak noiküla, Noa Goa ko tsakei.

¹⁰Naiuso Noa tü melothso süme chetlut: ngüso Shem, Ham, naiuso Japet.

¹¹Naiuso Goa khako goumchi tsüsiokü noiküla, naiuso goumchi nou pha poh-etsün nou miankü noiküla.

¹²Goa nou goumchi thaplunai, nung tsüsiokü nou miankü noiküla, tititenai khaiuniathso chikü nou apa saisile goumchi nai tsüsiokü iula-i.

¹³Goa nou Noa tü ngiom, “Khaiuniathso athon ajekhaiu jükhako sungkü noin, tiautenai ngüsoüh goumchi pha poh-etsün nou meankü iula-i-iu, athaplu, ngo ngüso goumchi ko aikü mowani-e.”

¹⁴Ni athaiutha Gofer pai nou kheng tsak lüshan, kheng mongai tsampai lüshan, küta amongai naiuso achiai tsanlep nou lülepjei.

¹⁵Ni nungti lüshan: kheng nou atheng nai meter 133, apün nai meter 22, naiuso atsok nou meter 13 lüshan.

¹⁶Ni kheng nai koukhantso tsak lüshan, küta nung centimeter 44, athat chiai lüshan. Naiuso nung tsai ai koukhan tsak lüshan, nung ni asaothon nai, naiuso müjam nou si samjam nou tsampai sunkü lüshan.

¹⁷Tititenai athaplu, ngo aa noitsün chikü, goumchi ainou lomowaniao goumchi nai shelei nou kankü shiji; goumchi ko noitsün chikü ean-e.

¹⁸Lüko ngo niko Jü Athalu-etsün shan-e, küta ni kheng nai nappe, ni naiuso athsoso, atsammongnyiu, naiuso athsoso tsammongnyiuso niko nappe.

¹⁹Naiuso ni kheng nai aa thainian in pungkü nimeme ngüso niko aa kih-iau thaiutha, nialokü anap, ngüso apong si asang theau noin.

²⁰Thainian in pungkü, naiuso tsam thainian in pungkü, naiuso goumchi nai chinkeitsün in pungkü, ngüso aa kih-iau lümeikü, in pungkü adongai nimeme shi-e.

²¹Naiuso ni eheshiu in pungkü adongko lükamshi; nung athaiutha si ngüso thaiutha eheshiuau noi-e.

²²Noaüh Goa nou apa tü thoiluttsünli alum chhin.