Read Khiamniungan Naga Apung 8 Bible Online

Apung 8 - Khiamniungan Naga bible

Apung 8

¹Goa nou Noa naiuso apako kheng nai noitsün aa thainian apem, naiuso tsam thainian apem yangsan, küta goumchi nai ahsheih tsak hau yankü khu-i, naiuso khiam nou abkü shin.

²Haiutsongan naiuso aün koukhantso nouso kiapan, naiuso maou ainou saotsün ah-ou laolo;

³naiuso khiam nou goumchi ainou ababkü shikü, nung ajekhaiu 150 nyi thapungkü phiai apem abkü shin.

⁴Naiuso alei chinyat nouko ajekhaiu chekü chinyat nai kheng nou Ararat king ai saonoi.

⁵Naiuso alei che ajekhaiu ayanyap nai kingkhaiu nouso epkü iula.

⁶Naiuso ajekhaiu aopülenyi thon nai, Noaüh kheng koukhantso nou sopsat,

⁷küta apaüh mükho tsak hongkhon, naiuso khiam nou goumchi ainou mowaikün lektso nung akhu ashi jeikei.

⁸Naiuso goumchi nai khiam absüne mo-ab ta ngeau apaüh meshen ainou mükham tsak hong.

⁹Lüko mükham nou meshen hokngam taiuao tsüephe, apa dongai kheng nai laokü shin, tititenai goumchi apemai khiam noiküla. Nung apaüh meshen pha tsatphu küta apa nialokü shikü meshen dongai kheng nai niathio.

¹⁰Naiuso apaüh ajekhaiu chinyatnyi taiukü noishiküta loüh mükham nou kheng ainou hongkhunshi.

¹¹Nai mükham nou apa dongai ahsham laoküshin naiuso athaplu, apa son nai Olip paisa ayan piankü noiküla. Nungtiphe Noaüh khiam nouso goumchi ainou abthio-iu ta ngela.

¹²Naiuso apaüh loüh ajekhaiu chinyatnyi taiushi küta mükham nou hongshi, nungaito apa dongai nung mükham laitso laokü tsüshishi.

¹³Naiuso pon 601 sim nouko aya alei, naiuso ayating ajekhaiu nai khiam nou goumchi ainou waikü abpan. Naiuso Noaüh kheng nyingjeitsün lowan küta thaplunai goumchi waikü noiküla.

¹⁴Naiuso alei nime ajekhaiu kheikü nime küta chinyatnyi nouko goumchi waikü noiküla.

¹⁵Goa nou Noa tü ngiom,

¹⁶“Ni, naiuso atsammongnyiu, athsoso, naiuso athsoso tsammongnyiuso, kheng ainou ashikhuwan.

¹⁷Niko aa noitsün thainian chikü, waio nouso, tsam thainian nouso, achinkeitsün thainian nouso, tilüsong goumchi ko chinkü keiji, niko kheng ainou nialokü ashian, ngüsoüh goumchi nai shingkü chetsinyimkü khuau noin.”

¹⁸Nungti Noa naiuso apa ko apa thsoso, naiuso tsammongnyiu, naiuso apa thsoso tsammongnyiuso,

¹⁹naiuso thainian chikü, achinkeitsün apem, waio chikü, tilüsong goumchi nai tsakeiji, ngüso apong si asang pungkü kheng ainou sao.

²⁰Noaüh APAOU thaiutha amkham tsam tsak lashan, naiuso asio thainian naiuso waio nouso in pungkü ainou, losan küta apaüh amkham tsam nai ajahtsün chaithio kiukü amkham.

²¹Naiuso APAOU nou tü angannyam amei nyam; nai APAOU nou meshen mongpemai ngiom, “Ngo khaiuniathso thaiutha goumchi müjam athesan tsükiushi-e, tititenai khaiunia da mongpem nai mongsai methso nai yakü tsümeikü noin; tsüdekünai Ngo aakihlaiu thathunkü ngo chhikü shitsünli müjam loüh tsüangja-ishi-e.

²²Goumchi noi nou lektso lelu lethiotsün atao, be-eiuyam atao, atsong si alam tao, aou tao si asaio tao, anyi si asoh tsülaokü noi-e.”