Read Khiamniungan Naga Apung 9 Bible Online

Apung 9 - Khiamniungan Naga bible

Apung 9

¹Naiuso Goa nou Noa naiuso apa thsoso ouk kiukü ngüso tü ngiom, “Chetsinyim küta goumchi miankü shingkü lükhu.”

²Thainian apem, waio nouso naiuso ngou nouso asamlun hatkü kih-e, ngüso apem asam oukong khemai noi-e.

³Kiansinga asangnya ngo asam hao kiutsünli, lemlemkü aa noitsün apem asam thaiutha eheshiuau noi-e.

⁴Lüko nyih aa nouko she sunkü asamüh lahe.

⁵Ajantsoüh khaiunia aa nou loatnai, apa tü thamshi-e, thainian ou ajantsoüh khaiunia loatnai ngo ee nou thamshi-e.

⁶Sauhaiüh khaiunia ün she lopenge, apa she lüko khaiunia noulu lopengshi-e, tititenai Goa kheknai apaüh khaiunia shan.

⁷Asam chetsinyim küta shingkü lükhu, goumchi miankü chetsinyimkü naiuso shingkü lükhu.

⁸Goa nou Noa naiuso apa thsoso tü chitekü ngioji,

⁹“Athaplu, Ngo asamko Jü Athalu-etsün shanji, naiuso asam phiai asam thsaosithsoso ko,

¹⁰naiuso asam ko noitsün aa thainian apem: waio nouso, tsam thainian nouso, goumchi liutsa thainian pungkü, kheng ainou shikhutsün goumchi thainian apem ko ngo nung shane.

¹¹Naiuso ngo asam ko Jü Athalu-etsün shaniu, küta loto aa apem shelei nou tsülomoshi-e, tsüdekünai goumchi lomoau shelei laitso tsünoishi-e.

¹²Naiuso Goa nou ngiom, Ngo si asam, naiuso asam ko aa noitsün chikü jetko, athontsüyang vetao saokü, Jü Athalu-etsün ii nung noi-e:

¹³Ngo thengmia nai jü theng- miathsan taiukiuji, naiuso nung ngo si goumchi jetko athaluetsün ii noi-e.

¹⁴Tilai ngo goumchi khütha nai thengmia nouso kankü shiji, nungai nung thengmiathsan nou thengmia nai eppe.

¹⁵Jü Athalu-etsün nung: ngo si asam naiuso aa thainian apem jetko aa nou soimokü hao shelei loto tsünoishi-e.

¹⁶Naiuso thengmiathsan nou maou nai noi-e, naiuso goumchi nai noitsün aa ong ainou aa thainian apem jetko athontsüyang athalu-etsün yangsanao thaiutha ngo nungtü thape.

¹⁷Naiuso Goa nou Noa tü ngiom, Nung Athalu-etsün ii ngo si goumchi nai noitsün aa apem jetko ngo mongkü shaniu.”

¹⁸Naiuso Noa thsoso sauhai kheng ainou saom, ngüso Shem, Ham, naiuso Japet noiküla, (Ham nung Kanan po noiküla.)

¹⁹Noa thso nung süme nouso goumchi nai khaiunia apem paosiposo noin.

²⁰Noa eiu ah khaiunia tsak noiküla, apa sainaoshep eiu ah tsün ayating khaiunia nou noiküla.

²¹Naiuso apaüh theng shiukü tokkü iulaküta apa tsosa nejenkhio nai noiküla.

²²Nungai Ham, Kanan poüh meshen po tsosa epkü apaüh deisinio nime tü kengai shikü chiten.

²³Nungai Shem si Japet neüh nepat tsak kankü shikü nung ngüne sangdongkhaiu ai woilutkü phiai lekkü shikü ngüso po tsosa noitsün tenpokkiu, naiuso ngüso kha phiai shikü noiphe ngüsoüh ngüso po tsosa noi nou tsüep.

²⁴Naiuso Noa apa thengtok ainou thsümon küta apa thso niophi nou apa tü ti chhin, nung ngelakü iula.

²⁵Küta apaüh ngiom, “Kanan tü athesan tsak lünoi! Apa meshen desinioso sua tsak noi-e.

²⁶APAOU, Shem Goa nian lülom! Kanan to Shem sua noi-e.

²⁷Goa nou Japet lüloshingkiu! Apa thsaosithsoso to Shem khaiuniaso ko lükiha-i! Kanan to Japet sua noi-e.”

²⁸Shelei phiai Noa pon 350 kih

²⁹küta loüh apa 950 aakihlaiu pon kihshikü ean.