Read Khiamniungan Naga 2 Sam 1 Bible Online

2 Sam 1 - Khiamniungan Naga bible

2 Sam 1

¹Saul ean küta Davidüh Amalek- hai ehli shioloutsün ainou laokü shikü Ziklag nai ajekhaiu nenyi noi-an.

²Nungthan nyi nai Saul saothang ainou oum khaiunia tsak shisaom. Apaüh amongsaiu hankü neshe nouso chipekkü apa khaiu ai pu nou tsomlut. Apa David dongai khuküta asuhat kiukü kauthio.

³Davidüh apatü sangkü ngiom, “Ni ti ainou shikü noin?” Apaüh thalakü ngiom, “Ngo Israelhai saothang ainou thakhukü noin.”

⁴“Ti thawaokü noin nung ngü hau achite,” ta Davidüh ngiom. Apaüh thalan, “Sam süpaiso ehlithang ainou khulükhunaniu,” naiuso “sam khaiuniaso piakü loataniu. Saul naiuso apa thso Jonathan lüko loataniu.”

⁵Davidüh apa tü sangkü ngiom, “Saul naiuso Jonathanso eaniu ta ni titi ngeji?”

⁶Apaüh thalakü ngiom, “Aküo meikü ngo Gilboa king nai noikü thaküla, naiuso ngo Saul apa lai tü niolutkü ep naiuso ehoi ehli tsamkei nouso naiuso mokthso chiai moknoitsünso apa shimkü yankeikü noiküla.

⁷Nungaih apaüh lemkü thaplunai ngü ep, naiuso ngü tü jon. Nungaih ngo apatü ‘Ah, APAOU!’ ta thala.

⁸Apaüh ngütü ni sau ta sangnai, ngo apa hau ngo Amalek hai tsak ta chiten.

⁹Nungaih apaüh ngiom, ‘Nungai ashi küta ngü aloatan! Ngo thsüokü tawaikü noin, naiuso ngo eanau lu noin.’

¹⁰Nung- tiphe ngo apa dongai sungküta apa loatkü wan, tiautenai apa loithiotsünko aikülu apa eau noin ta ngo ngekü noiküla. Küta ngo apa khaiu ainou nokpao kandio naiuso apa ainou khiapthso nouso loküta nungso adongai kankü shin, APAOU.”

¹¹Davidüh apa neshe chipekkü mongsaiu, naiuso apa khaiuniaso lüko apali mongsaiu.

¹²Ngüso Saul, Jonathan naiuso APAOU ün khaiunia Israelhai thaiutha asham tü tha- lutkü mongkiakü mongsaiu naiuso keithon noiküla, tiautenai ehlithang nai khaiunia piakü loattan.

¹³David hau oum sauüh ngiongem kankü shikiu, apatü sangkü ngiom, “Ni ti ainou noin?” Apaüh thalakü ngiom, “Ngo Amalek hai tsak, lüko agoumchi ko kihji.”

¹⁴Davidüh apatü sangkü ngiom, “Ni APAOU nou chosantsün nokpao loatau titi somkü noiküla?”

¹⁵Nungaih Davidüh apa khaiuniaso ongko tsak jonküta ngiom, “Apa lü- loat!” Nai nung khaiunia nou Amalek hai nou thioatkü wan,

¹⁶naiuso Davidüh Amalek hai nou tü ngiom, “Ni nung achija chhisanloji. Tilai ni APAOU nou chosantsün tsak nou loat, ta ngiom, ni achija phio-i-iu.”

¹⁷Davidüh nung mongsaiu jih nou Saul naiuso apa thso Jonathan thaiutha hang,

¹⁸naiuso nungh Yihudahai hau tsandeau thoilut. (Nung Jasher thsam nai satkü taim.)

¹⁹“Israel ün king nouso ai sam ehoi ean! Sam lengpo süpaihoi nouso loian!

²⁰Nung Gat nai tsüdekünai Askelon yamai lapongpeng. Filistiahai menyiuhoi lamongling-i; melemaohai menyiuthso nouso lamongling-i. Tititenai mongsonghoi nouso ahei nungko amiam nai wan.”

²¹“Gilboa king nouso chiai khiamle naiuso auo nouso lahongshi; nung kingpun nouso asaita lon lünoi-i! Tititenai mongnyan nouso shii amiam nou loi-an; Saul shii da loto khaiutsom nou tsütsomshi.

²²Jonathan ün uokop pai atheau tsünoi naiuso Saul sah atsüojinyang, oukong nouso ehoi loatau tsüshioshi.”

²³“Saul naiuso Jonathan thatü athanga naiuso atsüojin; aa nouko kamkü naiuso ee nouko aikü; letche nousoko naito ngüso khaolaotso, naiuso chongkhao nousoko naito ngüso kongtsokü noiküla.”

²⁴“Israel menyiuso, Saul thaiutha lümongsaiu! Apaüh asam hau memei neshe nou thokiu, naiuso asam hau tangkason, chaiou lakkeng nou aleng yamkiu.”

²⁵“Leng süpaihoi nouso loianiu, ngüso ehlithang nai loataniu. Jonathan king nai loatkü noin.”

²⁶“Ngo athaiutha mongsaiukü noin jüdei Jonathan; jü khako ni titi usokkü noila! Ni nou atsüojin titi athanga ngü da noila, nung menyiuhoi atsüojintü phopkü songkü.”

²⁷“Leng süpaihoi nouso loian-iu, ngüso ehli jengtsaiu nouso atheau, tsümeishikü leankü noin.”