Read Khiamniungan Naga 2 Sam 10 Bible Online

2 Sam 10 - Khiamniungan Naga bible

2 Sam 10

¹Atao intso phiai Ammon Nokpao Nahas ean, naiuso apa thso Hanunüh apa po nokpao noikham lilo.

²Nokpao Davidüh ngiom, “Apa po Nahasüh ngütü chhikü shitsünli, ngü Hanun hau ngiotsüo haimei hanau noin.” Nungtiphe Davidüh apa atsüojin hanau ngiongem kantsünso hong. Tilai ngüso Ammon nai shisaom,

³Ammonhai aheihoi nousoüh nokpao tü ngiom, “Apo ün asuhat nai Davidüh nungso ngiongem kantsünso apa atsüojin nihau hanau hong ta ni yangji süne? Nung ayang to tsüde-e! Apaüh sam komanau thaiutha ko, nung khaiunia nouso noknio noutü kautha au hongkü noi-e!”

⁴Hanunüh David ngiongem kantsünso thalowan, küta ngüso sonpun etsak ainou iuwankiu, ngüso neshe nouso omko yangkü lamankiu, küta ngüso hongan.

⁵Ngüso tsamai laokü yashiau thatü miamkü noiküla. Tilai Davidüh ti thawaokü noin nung thaiutha lula, apaüh ngüso sonpun mosamshikün lektso laokü tsüyakü Yeriko nai anoi ta ngio tsak hong.

⁶Ammonhaiüh David nung ngüso eh iula-iu ta yangshi, nungtiphe ngüsoüh Betrebob naiuso Zoba ainou Seriahai süpaihoi heng 20, 000 Tob ainou heng 12, 000, naiuso Maka nokpao ko heng 10, 000 hakü jonlo.

⁷Davidüh nung ngio lulakü noiküla, naiuso apaüh ngüso tü khengshikü süpaihoi athum hakü Joab hong.

⁸Ammonhai ehli au khemlokü ngüso noknio Rabba nai naptsün yamko ngüso ehjiothang shankü noi, naiuso amao nouso Seriahai naiuso Tob naiuso Maka ainou jonlotsün khaiuniahoi nouso khengtaiu nai ehjiothang shanlokü noiküla.

⁹Joabüh apa ehoi nousoüh kha ai si phiai shipo-e ta epsan, nungtiphe apaüh Israelhai süpai ameiting nouso choloküta Seriahai süpaihoi nousotü kha sheilutkü ehjiothang shanlo-i.

¹⁰Apoi nouso apaüh apa dei Abishai khemko taiukiu, apaüh ngüso Ammonhai tü kha sheilutkü ehjio jio-i.

¹¹Joabüh Abishai tü ngiom, “Ni ngü Seriahaiüh shiolo- wantsün epnai, shiküta ngü ahachu, naiuso Ammonhaiüh ni shiolowan nai, ngü khuküta ni hachu-e.

¹²Mongnyankü naiuso kongkü lüthe! Samüh sam khaiunia thaiutha naiuso sam Goa noknio nouso thaiutha kongkü ehli liko. Naiuso APAOU nou apa khako ti amei ta mongchioji nung lüchhi-i!”

¹³Joab naiuso apa khaiuniahoiso akomau thaiutha kha ai khu, naiuso Seriahai khulükhunankü noiküla.

¹⁴Tilai Ammonhaiüh Seriahai jingkü khuwantsün ep, ngüso Abishai khako nou khulükhun küta noknio nai kamshin. Nungaih Joab, Ammon haiko ehlitsün ainou laokü shiküta Yirusalem ai khuwan.

¹⁵Seriahaiüh ngüso Israelhaiüh shiolowaniu ta ngesan, nungtiphe ngüsoüh süpaihoi apem jonkam.

¹⁶Nokpao Hadadezer Eufrates haiu ajepek nai noitsün Seriahai dongai hong, naiuso ngüso Zoba nai Nokpao Hadadezer süpai ahei khemko Shobak ngiokhem nai Helam ko kamshin.

¹⁷Tilai Davidüh nung lula, apaüh Israelhai süpaihoi lokam küta Seriahaiüh apatü kha sheilutkü ehjiokü noitsün Helam nai Yordan haiu yankü khu. Ehli nou tsalo,

¹⁸naiuso Israelhaiüh Seriahai süpaihoi phiai komshi-an. David naiuso apa khaiuniasoüh Seriahai tsamkei niatsün 700, naiuso mokthso chiai moknoikü ehlitsün heng 40, 000 naiuso ngüsoüh ehoi ahei Shobak tü tawaikiu, naiuso apa ehlithang nai ean.

¹⁹Hadadezer khemko noitsün nokpao nousoüh ngüso Israelhaiüh shiolowaniu ta tilai ngela, ngüsoüh Israelhaiko nokmei shan, naiuso ngüso khemko ngüso ngio thekü iula. Nungtiphe loto Seriahaiüh Ammon- hai tü hachushiau hatkü noiküla.