Read Khiamniungan Naga 2 Sam 11 Bible Online

2 Sam 11 - Khiamniungan Naga bible

2 Sam 11

¹Lo chihle khiamle thiotsün a taoko, nokpaohoi ehli iutsün taoko, Davidüh Joab apa khemko noitsün asonghoi naiuso Israelhai süpaihoi ehli nai hongan, ngüsoüh Ammonhai shiolo naiuso Rabba noknio lüko shiolokü noiküla. Lüko David to ehli nai tsü-iuhakü Yirusalem nai noian.

²Nyitso anyiwem yanküta, David apa aalo saitsün ainou chukü nokpao tsamkhaiu ai sungkü noiküla. Apa tsamkhaiu chiai tsakei taoko apaüh menyiu tsak khiampengkü noitsün ep. Nung nyiuhai nou shisileng thatü meikü noiküla.

³Nungtiphe apaüh nung nyiuhai nou sau ta tsangshei au ngiongem kantsün tsak hong, nungaih nung nyiuhai nou Hit hai nou Uria tsammongnyiu Eliam menyiuthso Batsheba ta ngela.

⁴Davidüh nung nyiuhai nou nialokü shiau hong, nungai ngüsoüh nung nyiuhai nou apa tsamai nialokü shin, naiuso apa nung nyiuhai ko emsai. (Nung taotengko nyiuhai nou apa alei nouko achinyan khutsün khem- lokü noiküla.) Küta nyiuhai nou apa tsamai laokü shin.

⁵Nungphiai nyiuhai nou apa pemtsükeng ta ngesan küta David hau nung chiteau ngio tsak hong.

⁶Nungaih Davidüh Joab dongai ngio tsak hong: “Jü dongai Hit hai nou Uria ahongshi.” Nungtiphe Joabüh Uria nung David dongai hong.

⁷Tilai Uria shisaom, Davidüh apatü Joab naiuso süpaihoi nouso meikü noin süne? naiuso ehli nou titi liji ta sang.

⁸Nungaih Davidüh Uria tü ngiom, “Tsamai lükhu küta intso lü aalo.” Uria tsalokü khuwan, naiuso Davidüh apa phiko apa tsamai paopei tsak hong.

⁹Lüko Uria apa tsamai tsükhu, nunglikoto apa nokpao ehühoi ko nokpao keng bekhan nai sai-an.

¹⁰Tilai Davidüh Uria nung apa tsamai tsükhu ta lula, apaüh Uria tü sangkü ngiom, “Atao laiukü noiküta ni lolu laokü shikü noin; ni tiauta tsamai tsükhukü noian?”

¹¹Uriaüh thalakü ngiom, “Israel- hai naiuso Yihudahai ehli nai khukü noin, naiuso Athalou-e Ngiokhem Paidan nou ngüsoko hakü noin. Jü aniakei Joab naiuso apa khemko asonghoi nouso kengpun nai asao- thang shankü noin. Ngü titi thekü tsamai khuküta heshiukü, naiuso jütsammongnyiu ko kamhakü noi-e? Nung athatsamlo yam chikü noi- taiukü ngü nungtin chhisiya tilaitso tsüchhi-e ta ngiomong shingkü ngioji!”

¹²Nungaih Davidüh ngiom, “Nungaito lonyi ajekhaiu nou nungko anoi-an, naiuso homso ngo ni laokü hongan-e.” Nungti Uria nung ajekhaiu naiuso nungthan ajekhaiu nou Yirusalem nai noi-an.

¹³Davidüh apa asham thaisam taoko jonküta apa theng nou thatukkü shentuk. Lüko loüh nungsoh lüko Uria apa tsamai tsükhu, nunglikoto apa nokpao ehühoi asai tsampai ai apa nesheeng lokü sai-an.

¹⁴Nungthan ahom Davidüh Joab dongai thsamsat tsak satküta Uria tsangkü hong.

¹⁵Apaüh nungti satkü noiküla: “Uria nung, ehli athsüoting litsün nai chongtingai lütaiu, küta soikü anoi naiuso apa ehoi hau lüloat-i.”

¹⁶Nungtiphe Joabüh noknio nou thalokü noitsün taoko apaüh ehoi akongting tiai noin nung athang ai Uria hong.

¹⁷Ehoi nouso noknio ainou shikü Joab süpaihoiko li-e; nungai David khemko asonghoi ajantso loatkü wan, nungko hakü Uria lüko ean.

¹⁸Nungaih Joabüh David dongai ehli ngiongem thaiutha chiteau hong,

¹⁹naiuso apaüh ngiongem kantsün hau ayam hankü ngiom, “Ni nokpao hau ehli thaiutha apem chitekütün phiai,

²⁰‘Asam tiauta noknio shimkü khuküta ngüso ko ehli tsüli-e? ta apaüh nitü mongmatkü sangau shiom. Ngüsoüh dioai ainou uokop chon nou kope ta ni tsüyangshi süne?

²¹Gideon thso Abimelek titi loattan ta ni tsüyangshi süne? Nung Thebez nai menyiu tsaküh lungpun tsak dioai ainou lungpun tsak le-ikü apa loatan ta ni tsüyangsan süne? Nungaito, ni tiauta dioai nou shimkü khun?’ ta Nokpao nou nitü nung sang naito, apa hau lüchite, ‘Akhemko noitsün asong Uria lüko loataniu.’”

²²Nungtiphe ngiongem kantsün Joabüh thoiluttsün kankü David dongai khu,

²³Apaüh ngiom, “Sam ehso sam chiai kongkü noiküla, naiuso ngüso samko ehli au noknio ainou kengpun nai shin, lüko samüh ngüso noknio bekhan tü thalutkü laokü shikü koman.

²⁴Nungaih ngüsoüh sam tü uokop chon nousoüh dioai thsatkü kopshi, naiuso nokpao khemko nouso asonghoi ajantso loatan, naiuso ni nou asong Uria lüko loatan.”

²⁵Davidüh ngiongem kantsün tü ngiom, “Joab monglülosong naiuso apatü ayangelat lanoi ta lüngio, tiautenai ehlithang naito sauhai eane sauüh ngioau tsüshioji. Joab tü noknio tü khengshikü loüh intso kongkü lükomshi küta nung lüthalo ta lüngio.”

²⁶Tilai Batshebaüh apa tsam- mongpo eaniu ta lulan, apa tsam- mongpo thaiutha apa mongsaiukü noiküla.

²⁷Tilai amongsaiu atao nou thonlo, Davidüh Batsheba tü nokpao tsamai ashi ta jonau hong; apa David tsammongnyiu au iula naiuso apa hau melothso tsak chetkiu. Lüko Davidüh ti chhin nungtü APAOU tsümonglingkü noiküla.