Read Khiamniungan Naga 2 Sam 12 Bible Online

2 Sam 12 - Khiamniungan Naga bible

2 Sam 12

¹APAOU nou E-po Nathan David dongai hongkü ngiom, “Noksong tsak kolu khaiunia nime kihkü noiküla, ngüne ongko khaiunia tsak nou memei naiuso amao tsak nouto tsosilu noiküla.

²Memei khaiunia nou jangtso naiuso onnemok piakü taiukü nyimhekü noiküla,

³loüh tsosilu khaiunia nouto onnemok tsaklu tuhtaiuküla. Apaüh nungtü paotsang, naiuso nung apa tsamai apa thsoso ko aikü shekü songjikan. Apaüh nung onnemok apa eheshiuüh tsadkü, naiuso apa thengkam ainou senhaküta meshen shiokha nai lokkü kankei. Nung onnemokthso nou apa thaiutha menyiuthso tsak khekkü noiküla.

⁴Nyitso memei khaiunia tsamai asailuhai tsak shisaom. Nungko memei khaiunia nou apa hau thaisam tao tsak thaiutha meshen thainianso ong ainou tsak loatkü khemkiuau tsümongchio; nungliko apaüh tsosilu khaiunia ün onnemok loküta apa mesan hau thaisam tsak khemsankü waoshen.”

⁵David nung memei khaiunia noutü thatü mongmat naiuso ngiom, “Aa noitsün APAOU nianko ngü ngioko, nung sau khaiuniaüh chhisiyakü noin, apato loatkü wanau noin!

⁶Nungtin tsümeikü chhisiyatsün thaiutha apaüh lowantsün tü püle nou phopkü apaüh thamshiau noin.”

⁷“Nung khaiunia nou ni noin, ta Nathanüh David tü ngiom. APAOU Israelhai Goa nou ngiotsün nungti noin: ‘Ngü ni Israelhai nokpao shankiu naiuso ni Saul ainou kipsankiu.

⁸Ngü nihau apa nokshing naiuso apa tsammongnyiuso kium; Ngü ni Israel naiuso Yihuda khaiuko Nokpao theau shankiu. Nungüh tsüsaiu-e tünaito, Ngü ni hau nungtü müjam phopshikü kiu-ela.

⁹Nungaito, ni tiauta jü athoilut nouso angio tsü-ang? Ni nung chhisiya tsümeikün tiauta chhin? Ni Uria ehlithang nai Ammon hai au loatan-i, küta ni apa tsammongnyiu lowan!

¹⁰Loto, vetao pungkü athsaosithsoso ajantso to eethe nou eane, tiautenai ni ngü tü angio tsü-ang naiuso Uria tsammongnyiu atsammongnyiu theau lowan.

¹¹Ngü, nitü ngiomong shingkü ngioji, atsamkhaiu ko lu ajantsoüh angja kankü shikiu-e. Tilai ngü atsammongnyiu loküta amao khaiunia tsak hau kiuwane, nungko apaüh apako anyi awon nouko ajisiwop chhi-e nung ni eppe.

¹²Ni akau-ai angei chhin, lüko ngü nung Israelhai apem hau epikü anyi awon nai thawao-iau chhi-e.’”

¹³“Ngü APAOU khengshikü angei chhi-aniu” ta Davidüh ngiom. Nathanüh thalakü ngiom, “APAOU nou nihau awan kiuji; ni tsü-eane.

¹⁴Lüko ni nung chhisiya nou APAOU lochikü hantsün thaiutha ko athso eane.”

¹⁵Nungphiai e-po Nathan apa tsamai laokü khuwan. APAOU nou Uria tsammongnyiuüh David hau chetkiutsün methso tü veimo thatü thsüokü mou-i.

¹⁶Davidüh nung methso mei-iau Goa tü misao sao. Apaüh titso tsühekü asoh tsütokü meshen tsampai ai napkü atao wankü noiküla.

¹⁷Apa tsamai noitsün asonghoi apa dongai khukü apa asaitaiu ainou chu-iau kowe, lüko apa tsüchu naiuso ngüso ko hakü titso tsühe.

¹⁸Anojet tsak phiai nung methso nou ean naiuso David khemko asonghoi nousoüh nung ngiongem apa hau chiteau hat. Ngüsoüh ngiom, “Methso nou aa noitsün taoko, tilai sam apa ko chite Davidüh sam tü tsüthashi. Titi thekü samüh apa thso eaniu ta apa hau chitesome? Apaüh apa chijabao tawailo-e!”

¹⁹Tilai Davidüh ngüso ongko tsaksitsak sang-ekü chitetsün ngela, apaüh apa thso eaniu ta ngela. Nungtiphe apaüh ngüso tü sangkü ngiom, “Methso nou eaniu süne?” Nungaih ngüsoüh thalakü ngiom, “Ah, apa eaniu.”

²⁰David saikü noitsün ainou chuküta khiam penganlo, khaiu hetthelo, naiuso apa neshe nouso li-anlo, küta apa APAOU tsamai khukü amkham. Tilai apa meshen tsamai laokü shin apaüh eheshiu tü sao naiuso nung kiukü thunkü helowan.

²¹“Samüh nung tsüngela,” ta apa khemko asonghoi nousoüh apatü ngiom. “Methso nou aa noi taokoto ni apa thaiutha shap naiuso thai tsüsam; lüko apa ee si ee, ni chuküta heshiu!”

²²Davidüh thalakü ngiom, “Ah” “Ngü apa aa noi taoko keithon lo naiuso shap. APAOU nou ngütü atsüojinyang kiukü methso nou tsü eani-e ta ngü yangküla.

²³Lüko loto apa eaniu, ngü tiau keithone? Ngü nung methso nou müjam aa kankü shiau shio-e süne? Ngü lüko nyitso to apa tiai noin nungai khu-e, lüko apa tilaitso jüdongai laokü tsüshishi-e.”

²⁴Nungaih Davidüh apa tsam- mongnyiu Batsheba mong aalo-i. Apa loüh Batsheba ko em naiuso loüh melothso tsak chetkiushi, Davidüh apa Solomon ta niankiu. APAOU nou nung methso tü tsüojinkü noiküla,

²⁵küta APAOU nou E-po Nathan tü nung melothso nou nian Jedidia ta niankiuau thoilut, tiautenai APAOU nou apa tsüojinkü noiküla.

²⁶Joabüh loüh Ammonhai noknio Rabba thako ehli tsülaokü li. Naiuso nung noknio thaloau shimankü noiküla.

²⁷Apaüh David hau chiteau ngiongem kantsünso hong: “Ngü Rabba noknio komiu naiuso nungko khiamnok nou thalo-iu.

²⁸Lo asüpai apoi nouso akamshi, küta noknio nou komheko küta asamüh nung lüthalo. Tsüdekünaito ngü nung noknio thalotsün thako niansong wananau tsü-aiu.”

²⁹Nungtiphe Davidüh apa süpaihoiso kamshi küta Rabba ai khukü nung kom naiuso nung thalowan.

³⁰Ammonhai goa sotsom Molek khaiu ainou tangkason napkü langtsün chaiou lakkeng kandio tsoi aosamkü püngo thatso lethsangkü noitsün Davidüh lowan. Davidüh tangkason nou loküta nung apa kandio nai lothiokü taiu. Apaüh noknio ainou jengtsaiu in piakü kamhe-an.

³¹Naiuso nung noknio nai noitsün khaiuniahoi pailin chhi, asanpektsün chhisiya nai, son nou langtsün uo chhisiya nai, naiuso lung tsamau saitsün chhisiya nai ngüso thoilutkü taiuwan. Apaüh amao noksong nai noitsünso Ammonhai lüko apem hau nung chhisiya wekülu chhi-i. Nungphiai apa naiuso apa khaiuniaso Yirusalem ai laokü yashin.