Read Khiamniungan Naga 2 Sam 13 Bible Online

2 Sam 13 - Khiamniungan Naga bible

2 Sam 13

¹David thso Absalom nio menyiuthso meso thatü meikü tsamsigoh moyangkü Tamar ta niankü noiküla. David thsoso ongko tsak Ammon ta niankü nou nung menyiuthso nouko tsüojinekü iula.

²Apa nung menyiuthso noutü thatü tsüojinkü akiali iula; lüko apa nungko emkü tsüojineau thaiutha nung chhi ashioau tsüdekü noiküla, tiautenai asangting meso tsak nung apa melo haiko epetsün ainou lolaokü wanan.

³Nungko Ammon ün haimei David nio Shamma thso Jonadab ta niankü akheisilat khaiunia tsak noiküla.

⁴Jonadabüh Ammon tü ngiom, “Ni nokpao ün thso tsak noin, lüko ngü ni ajekhaiu tsütokü kha nyakhemkülu epji. Ni ti ayang noin?” Ammonüh thalakü ngiom, “Ngü jüpo ehen nou thso menyiuthso Absalom nio Tamar tü tsüojinkü chinekji.”

⁵Jonadabüh apa tü ngiom, “Ni akia ta yaang tsandeküta then nai khukü lüsai-an. Tilai apo adongai ni thapau shi-e, apa tü lüngio, ‘Tsüojinyangkü jünio Tamar shiküta ngü hau awaoshen ta lüngio. Ngü apaüh yamthengsan küta, apa pem au nung paotsangkü waoshen-iau aiuji, naiuso apa epao aiuji.’”

⁶Nungtiphe Ammon apa akia ta yaang tsandekü apa then ai khukü sai. Nokpao David apatü thapau shinai Ammonüh apa tü ngiom, “Tsüojin- yangkü Tamar ashi-i naiuso apa hau themtsai intso ngü epkü ashan-i küta nung ngü hau apa pemüh paotsang- kü awaohi.”

⁷Nungtiphe Davidüh Tamar dongai ngio hongkü ngiom, “Ammon tsamai lükhu küta apa hau eheshiu intso lüpaotsang kiu.”

⁸Tamar khunai apa dei Ammon nung then ai saikü ep. Tamarüh wonne loküta nungüh themtsai ajantso Ammonüh epepkü paotsangsan.

⁹Nungaih apaüh nung themtsai nou saisan naiuso apa khako nung lo, lüko apaüh tsühe. Apaüh ngiom, “Khaiunia apem lühongan” naiuso ngüso apem khuwan.

¹⁰Nungaih apaüh Tamar tü ngiom, “Nung themtsai nouso jüthen ai kankü shiküta nung ngü hau apimüh awao.” Tamarüh themtsai nou loküta apa dongai shin,

¹¹apaüh nung themtsai nouso Ammon hau kiu nai apaüh Tamar thalo kü ngiom, “Ngü ko then ai ashi!”

¹²Tamarüh ngiom, “Nyah”. Ngü tü nungti nou amiamsimo chhisiya thaiutha lakoja! Nung amiam chhisiya noin!

¹³“Ngü jükha titi thekü nyong khako epi shi-e? Naiuso ni, Israel nai apim amiam noi-e. Tsüojinyangkü nokpao tü lüngio, nungaito ngü monglamji apaüh ngü ni hau kiu-e.”

¹⁴Lüko Ammonüh apa tü tsü-anglu; menyiuthso nouko nai melo nou kongtsophe apaüh menyiuthso nou shiolowan naiuso apa tü kojakü ajisiwop chhisiya chhin.

¹⁵Nungaih Ammon apa nio Tamar tü thatü chinyankü iula. Apaüh Tamar tü ngiom, “Lükhuwan!”

¹⁶“Tsükhu-e,” ta Tamarüh thala, “Ni lo ti chhikü noin nungko naito nungti hongantsün angei asongting tsak noin!” Lüko Ammonüh apa tü tsü-anglu;

¹⁷apaüh apa tsamai yathsüotsünso tü jonkü ngiom, “Nung nyiuhai nou jüdong ainou kankü lükhuwan! Apa kengchiai atenshi-an, küta kou nou kiapkü awan!”

¹⁸Tsamki nou Tamar kengchiai thoishi-an küta kou nou kiapkü wan. Tamarüh tsamsigoh moyangkün nokpao menyiuthso nou thetsün phakhut alaiu nou thokü noiküla.

¹⁹Tamarüh apa khaiu nai luo nou lamlut, apa phakhut chipek naiuso apa pha nou kha nou kappokkü shapkü khuwan.

²⁰Tilai apa dei Absalomüh apa ep, apaüh sang, “Ammonüh ni tü pha pokü angja-in süne? Tsüojinyangkü nungüh ni thatü yangelatkü lanoi niohai. Apa adei noin, nungtiphe nung thaiutha sauhau lachite.” Nungaih Tamar nung apa dei Absalom tsamai apa mong tsütsamkü ayangelat nou meankü kiha.

²¹Tilai Nokpao Davidüh athawaotsün ngem lula, apa thatü mongmat.

²²Naiuso Absalomüh Ammon tü thsüokü chinyan, tiautenai apaüh meshen nio Tamar tü mongdem ajisiwop chhisiya chhin naiuso nungüh apa loto Ammon ko ngio lüko tsüchiteshi.

²³Pon nime shamküta Absalom nung Efraim noksong shimkü Baal Hazor nai apa onnemok pun tippankü noiküla naiuso apaüh nokpao thsoso apem nungai haau jon,

²⁴apa Nokpao David dongai khuküta ngiom, “Asuhatkü noitsün Nokpao, ngü jü onnemokhoi apun tippanji. Ni naiuso akhemko noitsün asonghoi shikü nung sümai nai haoson loha au shio-e mo?”

²⁵“Tsüshio-e, jüthso,” ta nokpao nou thalakü ngiom. “Sam apem khunaito nung athaiutha thsale thsüokü noi-e.” Absalomüh tsülaokü sangh, lüko nokpao nou tsüthala, naiuso apaüh Absalom tü nung ainou leankü lükhuwan ta ngio.

²⁶Lüko Absalomüh ngiom, “Oh, naito, ni titilünou jüdei Ammon hongshi-e mo?” “Tiauta apa ahongshi?” ta nokpao nou thashi.

²⁷Lüko Absalomüh Ammon naiuso apa thso amao nouso apem apako mokhuhakün lektso apaüh sanglutkü noi. Absalomüh nokpao noutü waokü sümai tsak khemsan,

²⁸naiuso apa tsamkiso tü akaungio chimkü taiu: “Tilai Ammonüh theng thsüokü shiulo-e, nung ngekü ataiu naiuso tilai ngü ngiokhem kiu-e apa loatkü lüwan. Hatkü lanoi. Nung thsale nou ngü kanlo-e. Mongsongkü naiuso tsühenyikü lüthe!”

²⁹Nungtiphe tsamki nousoüh Absalom akaungio angkü hoilutküta Ammon loatkü wan. David thso apoi nouso apem ngüso mokthso chiai noilo küta khulükhunan.

³⁰Tilai ngüso apem tsamai yashiau yamai noiküla, David tü ngiom, “Absalomüh athsoso tsaktso tsüpoikü loataniu!”

³¹Nokpao nou tsakü chukü, apa neshe chipekkü monghen naiuso apa pem goh ai loian. Tsamkihoi sauhai nungko apako hakü noiküla ngüsoüh lüko ngüso neshe chipek.

³²Lüko David dei Shamma thso Jonadabüh ngiom, “Asuhatkü noitsün nokpao, ngüsoüh athsoso apem tsüloat. Ammon lu loat. Ammonüh apa nio Tamar tü tilai kojakü ajisiwop chhin nung taoko ya- kü Absalomüh nung chhi nou chhiau yanglowankü noiküla.

³³Nungtiphe athsoso apem eaniu ta ngiotsün ngiongem ta lamonglam, Ammon lu eankü noin.”

³⁴Nung taoko Absalom lüko khulükhunan. Horonaim yamai khaiunia piakü king ainou saotsün ehü süpai tsaküh epküta apa nokpao dongai khukü apaüh ti ep nung chitekü noiküla.

³⁵Jonadabüh David tü ngiom, “Ngü nitü ngiokü shitsünli, nungso athsoso shiji.”

³⁶Apaüh nung ngiokü thunkü David thsoso shisaom, ngüso ashapau yachu, naiuso David naiuso apa khemko noitsün asonghoi lüko mongkiakü shap.

³⁷Absalom khulükhun küta Ammihud thso Talmai Geshur nokpao dongai apa pon süme kiha. David apa thso Ammon thaiutha atao laiukü mongsaiu;

³⁹Lüko tilai apaüh Ammon eantsün pe-ankü iula, apa meshen thso Absalom thaiuthabao mongchet nou meankü noiküla.