Read Khiamniungan Naga 2 Sam 14 Bible Online

2 Sam 14 - Khiamniungan Naga bible

2 Sam 14

¹Nokpao David apa thso Absalom epau thatü mong- chetji ta Joabüh ngekü noiküla,

²nungtiphe Joabüh akausai menyiu tsak sau Tekoa ai kihkü noiküla apa nialokü shiau hong. Tilai nung nyiuhai nou shisaom, Joabüh apa tü ngiom, “Ni amongsaiu noin ta asaisile ahan, amongsaiu taoko tentsün neshe nouso lütenlo naiuso akhaiu lahethe. Menyiu tsak atao laiukü mongsaiukü noitsün khekkü saisile ahan.

³Küta ngü ni tü ti lüngio ta chite-e nokpao dongai khuküta apa tü nung lüngio.” Nungaih Joabüh nyiuhai nou hau ti ngio-i-e nung chiten.

⁴Nung menyiu nou nokpao dongai khuküta asuhat kiukü apa khako kauthiokü ngiom, “Asuhatkü noitsün Nokpao, ngü tü ahachu!”

⁵Nungaih nokpao nou nyiuhai tü, “Ni ti aiuji?” ta sang. Nungaih nyiuhai nou thalakü ngiom, “Ngü angja jihinyiu tsak noin, APAOU.” Jü tsammongpo eaniu.

⁶“Jüthso melothso nime noiküla, naiuso nyitso ngüne ongko khengtaiu nai ali-e sungh, nungko ngüne hathamau sau tsünoi küla, küta tsaküh tsak loatekü ean.

⁷Asonghai, jü tsammongso lo ngütü khengshikü tsaoji, naiuso anio nou loattsün thaiutha ngüsoüh loüh apoitaiu nou loat shiau ngü ta jü thsoso ngüso phamongai akiuwan ta saoji. Ngüsoüh nung chhi naito, ngü melothso tsühakü pemsa poi-ane. Ngüsoüh jü athonting mongyang nou lomowan kiu-e, naiuso jü tsammong- po apa nian tsünoishikü wanane.”

⁸Nokpao nou thalakü ngiom, “Tsamai laokü lükhu.” “Naiuso nung chhisiya nou tü ngü paotsange.”

⁹Nyiuhai nou ngiom, “Asuhatkü noitsün Nokpao” “Ni tilüsong chhilünou jü tsamkhaiu naiuso nianlochi nou ngü the-e, ni naiuso atsamkhaiu to aphio tsüsunkü noin.”

¹⁰Nokpao nou thalakü ngiom, “Ajantsoüh ni lohatnai, apa jüdongai nialokü ashi, naiuso apaüh nihau tilaitso angja tsükiushi-e.”

¹¹Nyiuhai nou ngiom, “Asuhatkü noitsün Nokpao, jü tsammongso sau- hai jüthso eantsün thaiutha thsale noin ngüsoüh jüthso amao nou loatshitsün tsangkü angei asong tsüsunhe au APAOU a-Goa tü misao asaokiu.” Nungaih Davidüh thalakü ngiom, “Ngü aa noitsün APAOU nianko thaloji” “nung athso tiühlünou tsütawai-e.”

¹²Nungaih menyiu nou ngiom, “Asuhatkü noitsün Nokpao, atsüojin- yangkü ngü loüh ngio tsaklu ngioshi-e.” Nungaih Nokpao nou thala, “Angioshi.”

¹³Nyiuhai nou apatü ngiom, “Tiauta nungaito ni Goa khaiuniahoi tü tsüthakü nou chhisiya chhin? Ni athsoteng sau ni ainou khulükhunkü noin apa hau laokü shishiau ayam tsüsopkiu? nung ngio nou achija ni phiokiu-iu.

¹⁴Sam apem eane, sam goh ai khiam tsapengtsün khekkü noin, nung loüh akamloshiau tsüshioji. Goa nou lüko e nou aakü tsüshi-i lüko nokpao nouto khaiunia khulükhunkü noitsün laokü shi-iau yam tsotsak to eppe.

¹⁵Asuhatkü noitsün Nokpao, ngü adongai niko chiteau shitsün ayang nou: Khaiuniahoi nousoüh ngü lohatji, naiuso ngü jümongai yanghetsün nung ngü nitü ti sange nung ni chhikiu-e ta ayang nai shikü noin.

¹⁶Ni ngü tü anglu-e naiuso ngü jüthso loatkü wanau kowetsün ainou naiuso Goa nou apa khaiuniaso hau kiutaiutsün goumchi ainou wanau chhitsün ainou ni sam kipsan kiu-e ta ngü yangkü noiküla.

¹⁷Ngü jümongai ngiom, APAOU, ni thalotsün nou ngü kiplo-e, tiautenai nokpao nou to Goa hongthon khekkü noin naiuso tsümeikü ainou amei nou epsanau shioji. APAOU a-Goa ni ko hakü lünoi!”

¹⁸Nokpao nou thalakü ngiom, “Ngü nitü ngiosang tsak sang-e, naiuso ni ngü hau ngiotsüoteng nou chiteshi-au noin.” “Ngü tü tilünou asang, asuhatkü noitsün Nokpao,” ta nyiuhai nou thalakü ngiom.

¹⁹“Nungko Joabüh ni loktsakü noin süne?” ta nokpao nou nyiuhai nou tü sangh. Nyiuhai nou thalakü ngiom, “Ngü nung apem asio ngiomong shingekü ngioji, asuhatkü noitsün Nokpao, ni sangtsün tsüthalakü hau nungai amao ti yam tsünoi. Nung atsüoting akhemko asong tsak Joabüh ngü tü ti chhi-e naiuso ti ngio-e nung chitekü noiküla.

²⁰Lüko apaüh nung chhitsün to, ayam nou apem ayam nai lothakü taiuau chhin. Asuhatkü noitsün Nokpao, ni Goa hongthon a-nge khekkü naiuso athawaotsün alum ngetsün noin.”

²¹Phiküta nokpao nou Joab tü ngiom, “Ni ti mongchioji nung chhiau ngü thaloji, khuküta oum khaiunia Absalom apa nungai nialokü ashi.”

²²Joabüh David khako asuhat kiukü kauthiokü ngiom, “Goa nou ouk kiu, asuhatkü noitsün Nokpao! Loto ni ngüko mong lengji ta ngü ngeji, tiautenai ngü nitü kojatsün ayam ni sopkiu-iu.”

²³Nungaih Joab tsalokü Geshur ai khuküta Absalom nialokü Yirusalem ai laokü shin.

²⁴Nokpao nou Absalom nokpao tsamaito tsükiha-iau ngiokhem kiu. Nokpao nou ngiom, “Ngü apa epau tsümongchio” Nungtiphe Absalom apa tengkhaiu tsamai kih naiuso nokpao nou hau tsüepi.

²⁵Israelhai apem ongko Absalomli pühe mei thatü lomsanau lümeikü amao tsaktso tsünoiküla; apa khaiu ai yanou hokpho saongoikü ti aleng alothe tsünoiküla.

²⁶Apa khaiuou thatü tei naiuso lethsangkü iula nai, apaüh pon tsak ko khaiu jamlu iuwankü noiküla. Apa khaiuou nung thatlu nai alethsang nou tsoi nime khengai noiküla.

²⁷Absalom thso melo süme naiuso menyiuthso tsak Tamar ta niankü aluao shisileng thatü meikü noiküla.

²⁸Absalom, apa po David Nokpao ko tsüepekü Yirusalem nai pon nime kih.

²⁹Nungtiphe apaüh nokpao dongai khukiu-iau Joab dongai hong lüko Joabüh tsümongchiokü shanan.

³⁰Nungtiphe Absalomüh apa yathsüotsünso tü ngiom, “Athaplu, Joab eiu nung jü eiu thanko noin, naiuso nungko barlitso sungkü noin. Khukü nungtü in nou lüjeklut.” Nungtiphe ngüso khuküta nung eiu noutü in jeklut.

³¹Joab nungaih Absalom tsamai khuküta ngiom, “Ni yathsüotsün- soüh tiauta jü eiu tü in jeklut?”

³²Absalomüh thalakü ngiom, “Tiautenai ngü adongai hongtsün tao ni tsüshi. Ngü ni nokpao dongai khukü jü thaiutha asangkiu ta ayang noiküla: Ngü Geshur wankü nungai tiauta shin? Ngü nungaih noian naibao meitsoküla?” Absalomüh tsülaokü ngiom, “Ngü nitü nokpao ko jü thaiutha epeau ayam ashankiu ta mongchioji, naiuso nungko ngü aphio nai epsan naito, nungaito ngü apa hau loatkü awan-i.”

³³Nungtiphe Joab, nokpao David dongai khuküta Absalomüh ti ngiom nung apa hau chiten. Nokpao nou Absalom jon, naiuso apa shikü nokpao khako kauthio. Nungko nokpao nou apa sonüh chepkü apa monglingkü nialo.