Read Khiamniungan Naga 2 Sam 15 Bible Online

2 Sam 15 - Khiamniungan Naga bible

2 Sam 15

¹Nungphiai Absalomüh tsam- kei tsak, mokthso tsak naiuso nung niakeiau khaiunia aopungo khemlo.

²Apa ahom beta chukhu- küta noknio bekhan yamkukko tsakü noi. Tilai khaiunia ajantso misingem janthat kiu-iau nokpao dongai shi-iau yang, Absalomüh apa tü jonküta apa ti ainou shin ta sang. Khaiunia nou apa ti kau ainou noin nung chitekü tün phiai,

³Absalomüh ngio-e, “Athaplu, ngiokhem nou adongko noin, lüko ami tü anglu au nokpao liko sau tsünoi.”

⁴Naiuso apaüh nung ngioshi-e, “Ngü mikhem tsak thetünto ta ngü yangji! Tiautenai sauhai tsüngela-ekü mi noin nung jüdongai shiau shio-ela, naiuso ngü apa hau ngiotsüo mikhem kiu-ela.”

⁵Tilai khaiunia ajantsoüh Absalom tü asuhat kiutsün saisile nou kauthiokü han, Absalomüh apa pha tsatphukü thaloküta apa tü son nou chep.

⁶Absalomüh nung Israelhai apem sauhai nokpao dongai ngiotsüo mikhem thaiutha shin ngüso tü chhin, nungti apaüh ngüso apem mong shiolokü noiküla.

⁷Pon püle phiai Absalomüh Nokpao David tü ngiom, “APAOU, Hebron nai ngü APAOU tü tisübao thalokü taim, nungh jü athalotsün kiuau ngü akhu-i.

⁸Ngü Geshur nai kihtsün taoko, Seria nai ngü APAOU tü athalo tsak thalokü taim: apaüh ngü Yirusalem nai laokü nialokü shi naito, ngü apa hau Hebron nai amkham kiu-e ta thalokü taim.”

⁹Nokpao nou ngiom, “Aalo nai lükhu.” Nungaih Absalom Hebron ai khu.

¹⁰Lüko apaüh Israel mele apem tü ngioau ngiongem kantsünso hongkü ngioji, “Tilai asamüh poipoi mattsün sangh nou lula-e, nungti lüwe: ‘Hebron nai Absalom nokpao iula-iu!’”

¹¹Nungko Absalomüh jontsünso apako aikü Yirusalem ainou shitsün khaiunia 200 noiküla; ngüsoüh akhengshiau to ayang ti tsünoikü apem amonglam amei nailu khuhakü noiküla.

¹²Naiuso tilai apaüh jahkü aloat chaithio nouso kium, Absalomüh Ahithofel nung sau Gilo noksong nai Nokpao David tü ayam hantsünso tsak noiküla, apa nung David tü khengshitsün mongthat thattsün mongsai nou shiolowan, naiuso Absalom tü hoiluttsun haove nai singkü khu.

¹³Ngiongem kantsün tsaküh David hau chiten, “Israelhaiüh ngüso mongkiutsün Absalom noi-e ta thaloji.”

¹⁴Nungtiphe Davidüh Yirusalem nai apako hakü noitsün asonghoi apem tü ngiom, “Sam Absalom ainou thakhuau aiu naito, sam liukü khuwanau noin! Liukü! Tsüdekünai apaüh sam shiolowane, naiuso noknio nouko noitsün khaiunia apem loatkü wane!”

¹⁵“Ah, Asuhatkü noitsün Nokpao,” “Ni tilüsong ngio-e sam khemlokü noin.”

¹⁶Nungtiphe Nokpao nou apa tsamkhaiu, apa khemko noitsün asonghoiso hakü tsalokü khuwan nungko apaüh aphop tsammongnyiu ajantso taiutsün ngüso che nouso sauhai nokpao tsam tü paotsangau taiukiu nungso lu taiukü amaohai apem Yirusalem leankü khuwan.

¹⁷Nai nokpao nou apa tsam- monghoi apem noknio ainou tsalokü khutsün taoko ngüso athonting tsamei tsakko lao.

¹⁸Apa ün asonghoi nokpao noutü thankü tsa nungai nokpao ehü nou apa khako yankü khu. Apa ko süpai 600 nouso Gat ainou hoiluttsünso lüko yankü khu,

¹⁹naiuso nokpao nou ngüso ahei Ittai tü ngiom, “Ni samko tiauta khuhaji? Laokü khuküta nokpao ayan nouko lünoiha. Ni gohmao khaiunia tsak nito agoumchi ainou pungekü ahaiulotsün tsaklu noin.

²⁰Ni nung atao letletkülu kihakü shin, nungtiphe ngü tiauta niko hakü tsakeiha-e? Ngü tiai khuji ngütso tsünge. Laokü khukü agoumchi khaiunia niko nialokü lükhu naiuso APAOU nou ni tü tsüojinyang kiukü naiuso mongkiukü lünoi-i.”

²¹Lüko Ittaiüh thalakü ngiom, “Asuhatkü noitsün Nokpao, ngü niko asaita aikü khuha-e ni tilüsongai khu-e, ei au li sunglüko ngü niko khuha-e ta APAOU nianko ngiomong shingekü ngioji.”

²²“Thatü mei!” ta Davidüh thalakü ngiom. “Kha ai lükhuha!” Nungtiphe Ittai apa khaiunia apa tü monglamtsünso ko khuha.

²³David ko hoiluttsünso khunai khaiuniahoi thatü songkü shap. Nokpao nou Kidron haiutso apa khaiuniaso ko aikü yankü khu, naiuso liutsa dongai ngüso kamloküta tsalokü khu.

²⁴Nungko meson Zadok naiuso Asio Athalou-e Ngiokhem Paidan pikü Levihai hakü noiküla. Noknio ainou khaiuniahoi mosoilükhun- khemkün lektso ngüsoüh Paidan tsüloklokü taiu. Nungko meson Abiathar lüko hakü noiküla.

²⁵Nungaih Nokpao nou Zadok tü ngiom, “Athalou-e Ngiokhem Paidan nou noknio nai laokü kankü lükhu. APAOU ngü tü mongling naito, nyitso to apaüh ngü laokü shikü nungtü thapi-e, naiuso nung tiko taiuau athang noin nungko lütaiu.

²⁶Lüko apa ngüko tsümonglingkü naiüh titsüyang, nungti apaüh ti chhiau yangji nung ngü tü achhi-i.”

²⁷Naiuso apa Zadok tü ngioau khu, “Athaplu, athso Ahimaaz naiuso Jonathan thso Abiathar nialoküta noknio nai aalokü laokü lükhushi.

²⁸Nung taoko nai haiu nou yankü liutsa nai ngü ni ainou ngiongem molushikün lektso taiukü noi-e.”

²⁹Nungtiphe Zadok naiuso Abiathar neüh Athalou-e Ngiokhem Paidan loküta Yirusalem ai laokü ya.

³⁰David Olip king ai shapkü sungh; nungko apaüh amongsaiu ii hankü hokje nou keikü apa khaiu khijei. Apako hoiluttsün apem ngüso khaiu loijei lüko shap.

³¹Tilai Davidüh Ahithofel nung akhengshi- tsün Absalom hoi nai hakü noin ta lulan, nungaih apaüh misaokü ngiom, “APAOU, atsüojinyangkü Ahithofel ün ayamhan nouso atsüo tsüdekü yaang nai lüiula-i!”

³²Tilai Davidüh kingson nou sungngoi, nungai amkham athang tsak noiküla, nungko apaüh monglamtsün apa haimei Ark hai nou Hushai apa neshe chipekkankü naiuso apa khaiu nai pu nou pokü pheten.

³³Davidüh apa tü ngiom, “Ni ngüko shiha lüko jü thaiutha ti ahachu tsünoi-e,

³⁴lüko noknio nai laokü shiküta Absalom tü apotü mongkiukü yathsüokiukü shitsünli ni lo apa yathsüo-e, nungüh ni ngü hachuao shio-e. Nungtiphe Ahitho- felüh tilüsong ayamhan kiu-e nungso apem tü khengshikü ni chhiau shio-e.

³⁵Meson Zadok si Abiathar so nungai noi-e, ni nokpao tsamai tilüsong lulo, apem ngüso hau lüchite.

³⁶Ngüso ko ngüso thso Ahimaaz si Jonathan so hakü noin, naiuso ni ngüso angem- tsün apem hakü jü dongai hongshiau shio-e.”

³⁷Nungtiphe David haimei Hushai, Yirusalem noknio nai Absalom shingoitsün taoko nap han.