Read Khiamniungan Naga 2 Sam 16 Bible Online

2 Sam 16 - Khiamniungan Naga bible

2 Sam 16

¹Tilai Davidüh kingkhaiu nou intso yankü khukütünai, apaüh Mefiboshet tsamki Ziba, apako themtsai tsom nime kantsün gado nime, sainaoshep apung tsom tsak, shep aya eiusantsün apung tsom tsak, naiuso theng nyikhun nekong tsak meankü kankü alekta phete.

²David Nokpaoüh apa tü, “Ni nungso tiau the-e?” ta sang. Zibaüh thalan, “Nung gado nouso Asuhatkü noitsün Nokpao tsam- monghoi tsakei au, themtsai naiuso shep nouso khaiuniahoi nousoüh heau, naiuso theng nou ngüso liutsa nai tanatkü tsakei taoko shiu-au the-e.”

³Apa tü nokpao nou sangkü ngiom, “Ni ün APAOU Saul thsao nou Mefiboshet tiai noin?” Zibaüh thalan, “Apa Yirusalem nai noianji,” “tiautenai apa loto Israelhaiüh apa hau apa pao Saul ün nokshing laokü kiushi-e ta mong- lamkü noin.”

⁴Nokpao nou Ziba tü ngiom, “Mefiboshet thaio nou alum ni nou noin” Zibaüh thalakü ngiom, “Ngü ni yathsüotsün noin” “Asuhatkü noitsün Nokpao nou ngü asaita mongtsami- kü noi-auya!”

⁵Tilai David Nokpao Bahurim ai shisaom, nungaih Gera thso Shimei, Saul tsammongso ongko tsak nou apako pheteau shinai apaüh athesan kiukü shin.

⁶Shimeiüh David naiuso apa khemko asonghoi nouso tü lung nou yakau tsalo, nungti lüko David ko apa khaiuniaso naiuso ehü nou lemjeikü wan.

⁷Shimeiüh apa athesan kiukü ngiom, “Lükhuwan! Lükhuwan! Ni achaoattsün! Ni sheloshitsün!

⁸Ni Saul ün nokshing lowan, naiuso lo APAOU nou ni Saul tsamkhaiu piakü chaoattsün thaiuthako angja kiuji. APAOU nou anokshing athso Absalom hau kiuwaniu, naiuso ni mowaniu, ni sheloshitsün khaiunia!”

⁹Zeruia thso Abishaiüh nokpao tü ngiom, “Asuhatkü noitsün Nokpao, ni nung ji hau athesan tiauta kiu-iji? Ngü nungai khuküta apa khaiu taplokü shi-e!”

¹⁰“Nung asam chhisiya tsüde,” ta nokpao nou Abishai naiuso apa dei Joab netü ngiom. “Tiautenai apaüh ngü tü APAOU nou ngioküta athesan kiuji tünaito, apaüh nung tiauta chhiji ta sangau sau ayam thakü noin?”

¹¹Naiuso Davidüh Abishai naiuso apa khemko asonghoi apem tü ngiom, “Jü thsoteng nou ngü loatau koweji; nungaito apa nung Benja- minhai nou chhitsün ko tiauta nga-e? APAOU nou apa tü athesan lükiu ta chiten; nungaito apa lüja-i, küta nung apa hau lüchhi-i.

¹²Tsünge-an, APAOU nou jü angja tü thape, naiuso lonyi ngü athesan kiutsün thaiuthako APAOU nou amei yamai ngü hau lao- kü kiushiau tso shiom.”

¹³Nungtiphe David naiuso apa khaiuniaso tsülaokü yamai khu. Shimei ngüso ko khuhatsün laolowan küta king nai tsakeikü khuwan. Apaüh athesan kiukü lung nouso si pu nousoüh apa akhu taoko ngüsoüh yaklut.

¹⁴Tilai ngüsoüh Yordan shisaom, nokpao naiuso apa khaiuniaso tanankü noiphe ngüsoüh nungko aalo.

¹⁵Absalom naiuso Israelhai apem apako hakü Yirusalem nai nap, naiuso Ahithofel ngüsoko hakü noiküla.

¹⁶Tilai Davidüh monglamtsün haimei Hushai Absalom ko phete, apaüh sangh asong nou wekü ngiom, “Nokpao aakihlaiukü lünoi! Nokpao aakihlaiukü lünoi!”

¹⁷“Ni mong- lamtsün David tü ti thawaokü noin?” ta Absalomüh apa tü sangkü ngiom. “Ni tiauta apako tsükhuha?”

¹⁸Hushaiüh thalan, “Ngü titi khuha-e? Ngü APAOU nou, nung khaiunia nousoüh, naiuso Israelhai apemüh chosankü noin, ngü apa thaiutha noi-e, naiuso apa ko ngü noi-e.

¹⁹Ngio-etünaito, jü APAOU thso tsüdekünai, ngü sau yathsüokiu-e? Ngü apo yathsüokü shitsünli, nungti lo ngü ni yathsüo-e.”

²⁰Nungaih Absalomüh Ahithofel dongai kha phokleküta ngiom, “Lo sam nungko noin, ni samtü ti in chhiau lotsüokiuji?”

²¹Ahithofelüh thalan, “Khukü apo ün menyiu sauhai nokpao tsam tü paotsangau taim nungko lüemkam. Nungaito Israel nai khaiunia apemüh ni apo ün eh noin ta nge-e, naiuso ni tü hoiluttsünso lüko nungüh mong nou thsüokü lokong-e.”

²²Nungtiphe ngüsoüh Absalom hau nejenkhio tsamkhaiu nai tsam tsak lahkiu, naiuso apemüh epkü Absalom napküta apa po ün aphop menyiu nousoko emkamkü noiküla.

²³Nung taoko Ahithofelüh ti ayam hane nung Goa ainou ngio noin ta ngüsoüh kankeikü noiküla; David naiuso Absalom ne nemtsoüh nung yamhan kankeikü noiküla.