Read Khiamniungan Naga 2 Sam 18 Bible Online

2 Sam 18 - Khiamniungan Naga bible

2 Sam 18

¹Nokpao Davidüh apa khaiuniaso apem lokam, küta ngüso heng tsak, naiuso tsom tsak ta hoihoi janthat, naiuso nungso khako asonghoi ahei au taiukiu.

²Küta Davidüh ngüso ahoi süme hau janthatkü hongpeng, Joab ko ahoi tsak, Joab dei Abishai ko ahoi tsak, naiuso Gathai nou Ittai ko ahoi tsak ta ngüso hoi pungkü nai ahei au thekü hong. Naiuso Nokpao nou apa khaiuniaso tü ngiom, “Ngü jüpem asamko khuha-e.”

³Nungaih ngüsoüh thalakü ngiom, “Ni samko tsükhuha au noin.” “Samto kha phoklelokü jingkü khuwan lüko naiuso sam ajantso loatkü wan lüko eh nouso thaiutha to ti amomo tsünoi-e, lüko nito samko naito heng 10, 000 mai noin. Nito noknio nai noikü sam tü eh hanou hongnaibao thatü mei-e.”

⁴Nokpao nou thalakü ngiom, “Asamüh ti ameiting ta yangji ngü chhi-e.” Nungaih apa khaiuniaso heng tsak ta naiuso tsom tsak ta khemlokü noknio ainou shikhutsün taoko apa pem bekhan dongko tsakü noiküla.

⁵Apaüh Joab, Abishai, naiuso Ittai so hau ngiokhem sopkiuji: “Jükothako oum Absalom tü latawaikiu.” Davidüh asonghoi hau ngiokhem kiutsün nung süpaihoi apemüh lulakü noiküla.

⁶David süpaihoiso Israelhaiko ehli au khu naiuso Israelhaiko Efraimhai goumchi nai ehli nou lihe.

⁷David khaiuniasoüh Israelhai shiolowan, nung ajekhaiuko nai heng 20, 000 loatkü shiohe-antsün ehli atsaoting tsak noiküla.

⁸Nung ehli ngem goh thapekkü khu, nungko liutsa nai eantsün nung ehlithang nai loattsün tü phopkü noiküla.

⁹Alekta Absalomüh David khaiuniaso ajantso pheten. Absalom mokthso tsak chiai moknoikü lampai piakü noitsün liukhemai khu, nungko Absalom khaiu-ou paikia nousoüh kholowan. Tilai mokthso nou jingkü khuwan, Absalomto paikia nou tü phankü wanan.

¹⁰David süpaihoi ongko tsaküh nung epküta Joab hau chiten, “APAOU, ngü Absalom lampai tsaktü singlutkü phanankü ep!”

¹¹Joabüh thalakü ngiom, “Apa epnaito, ni tiauta nungailu apa tsüloatan? Ngü jütengkhaiuüh lüko ni hau tangkason che naiuso omkhi tsak ta kiu-ela.”

¹²Lüko nung khaiunia nou thalakü ngiom, “Ni ngü hau tangkason heng tsak ngoikü kiu lüko, ngü nokpao thso thako phakhatso tsak lüko tsüloksane. ‘Jü thaiuthako oum Absalomtü ti latawaikiu.’ Ta ni, Abishai, naiuso Ittai tü ngiokhem kiutsün sam apemüh lula-iu.

¹³Lüko ni nokpao ngiokhem tsü-angkü Absalom loat naito, nokpao nou nung thaiutha lula-e, tiautenai apaüh alum thaiutha lulakü noiji- naiuso ni ngü tsühalo-e.”

¹⁴Joabüh thalakü ngiom, “Ngü loto niko atao tsüwane.” Apaüh me- shen lai süme nouso loküta Absalom moekü lampai nou tü phankü noi taoko kong nai chithio.

¹⁵Nungaih Joab süpaihoi khaiunia che Absalom dongko kamshiküta apa lolimkü wan.

¹⁶Joabüh ehli laoloau poipoimat au ngiokhem kiu, naiuso apa süpai hoiso Israelhai tü komtsün ainou laokü shin.

¹⁷Ngüsoüh Absalom mea loküta liutsa nai khan thatü aokü noitsün tsak ko yakthiowan, naiuso nung chiai lung asong sansanküta lopokkü wan. Küta Israelhai apem momo tsamai pengkü khuwan.

¹⁸Absalomüh apa aakih taoko Nokpao Tsamei nai kheam tsak kikü taiu, tiautenai apa thso melo tsühaphe nung apa nian tsüpeanau thaiutha alat noiküla. Nungti nung kheam nou apa nianphi niankiukü taiu, naiuso nungtü lonyi saokü Absalom kheam ta jonji.

¹⁹Nungaih Zadok thso Ahimaazüh Joab tü ngiom, “APAOU nou apa ehoi ainou kipsaniu ta nung ngiongem amei kankü ngü nokpao dongai jingkü khuko.”

²⁰Joabüh ngiom, “Nyah,” “ni lonyi ngem amei titso tsükane. Amao ajekhaiu nousoko nai ni nung chhi-au noi-e, lüko lonyi tsüde, tititenai nokpao nou thso eankü noin.”

²¹Nungaih apaüh apa sua Sudanhai tsak noutü ngiom, “Ni ti epiu nung thaiutha khukü nokpao hau lüchite.” Nungaih sua nou kauthiokü asuhat kiuküta apa jingkü khu.

²²Ahimaazüh tsülaokü koja, “ti thawao lünou ngü ti yangelatkü tsü- noi; tsüojinyangkü nung ngiongem ngü hau lüko kankü akhu-i.” Joabüh sangkü ngiom, “Jü thso, ni nung chhiau tiau aiuji?” “Ni nung chhitsün thaiutha ko amai titso tsüepe.”

²³“Tilüsong thawao lünou,” “Ngü khuau aiuji,” ta Ahimaazüh loüh ngioshin. “Nungaito lükhu,” ta Joabüh tha- lakü ngiom. Nungtiphe loto Ahimaaz Yordan Tsamei yam tsangkü jingkü saom, naiuso apaüh sua nou shelakü shakta khu.

²⁴Nung taoko Nokpao David apa noknio bekhan dongko mokkü noiküla. Ehü nou bekhan khütha tsamkhaiu atsokteng nai tsakü noi, nungaih apaüh khaiunia tsak jingkü shitsün ep.

²⁵Apaüh koi ai noikü nokpaotü jon, nungaih nokpao nou thashin, “Apa pemsa naito, apaüh ngiongem amei kankü shiji.” Nungko ajingtsün tekkü shimkü shin.

²⁶Loüh ehü nou khaiunia tsak pemsa jingjikantsün epkü bekhan jimtsün tü jonkü ngiom, “Athaplu! nungai loüh amao tsak jingji!” Nokpao nou thalakü ngiom, “Nung khaiunia tsak nou lüko ngem amei kankü shiji.”

²⁷Ehü nou ngiom, “Jingkü shitsün chong khaiunia nou ngüto Ahimaaz khekkü epji.” “Apa khaiunia amei tsak noin,” “apaüh lüko ngem amei kankü shijisao,” ta nokpao nou ngiom.

²⁸Nungaih Ahimaazüh nokpao tü salam ngio velutküta apa khako kau- thiokü ngiom, “Ni Asuhatkü noitsün Nokpao tü sauüh khengshikü noiküla, nung khaiunia nouso khako ashiolokiutsün a-Goa APAOU hau nianlom lükiu!”

²⁹Nungaih Nokpao nou, “Oum Absalom meikü noimo?” ta sang. Ahimaazüh thalakü ngiom, “APAOU, tilai akhemko noitsün asong Joabüh ngü hong, ngü apülai asongting tsak epm, lüko nung ti noiküla ngü ngioau tsüshio.”

³⁰“Nungai tsakü lünoi,” ta nokpao nou ngiom, naiuso apa nungai khuküta tsakü noi.

³¹Nungaih Sudanhai Sua nou shisaokü apaüh nokpao tü ngiom, “Ni asuhatkü noitsün Nokpao thaiutha ngü ngem amei kankü noin! Lonyi APAOU nou nitü khengshitsün apem khako ashiolotsün kiu-iu!”

³²Nokpao nou, “Oum Absalom meikü noin süne?” ta sang. Nungaih sua nou thalan, “Jü APAOU nokpao ehoiso, naiuso tsümei- kün chhisiya thaiutha nitü kheng- shitsün apem tü, nung oum noutü thawaotsün aküo nou thawaotünto ta ngüto yangji.”

³³Nungaih nokpao mong ayange- lat nou meankü iula. Nungtiphe apa bekhan khengai tsampai nai sung- küta shap. Apa sungtsün ko sangh asong nou vekü ngiom, “Oh jüthso! Jüthso Absalom! Absalom, jüthso! Athangko ngü lu ean-e, jüthso! Absalom, jü thso!”