Read Khiamniungan Naga 2 Sam 19 Bible Online

2 Sam 19 - Khiamniungan Naga bible

2 Sam 19

¹Nokpao David Absalom thaiu- tha shapkü mongsaiuji ta Joab hau chiten.

²Nungtiphe nungh ajekhaiu David süpaihoi thaiutha ashiolo monglingtsün amongkia au iulawan, tiautenai nokpao nou apa thso thaiutha mongsaiuji ta ngüsoüh lulan.

³Süpaihoi amiam epküta ehlithang ainou khulükhuntsün khekkü ngüso apem noknio mongai nyankü laokü khuwan.

⁴Nokpao nou apa kha lopok küta sangh songkü, “O jüthso! Jüthso Absalom! Absalom jüthso!” ta vekü shap.

⁵Nungaih Joab, nokpao tsamai khuküta nokpao tü ngiom, “Lonyi ni yathsüotsünso apem, sauhaiüh lonyi apim aa, naiuso athso melo si menyiuthso nouso, naiuso tsammongnyiu naiuso tsamsigoh tsüyangkün athso menyiuthso nouso aa nou kipsantsünso hau amiam kiu-iu.

⁶Ni tü khengshitsünso tü ni tsüojin naiuso ni chinyantsünso tü ni hachu! Akhemko noitsün asonghoi naiuso khaiuniahoi athaiutha ti pokü tsünoi ta ni lonyi tsangsheikü hanji. Lonyi Absalom aa noikü naiuso sam apem ean naito ni thatü monglingela ta ngü epji.

⁷Lo khukü ta akhaiuniaso ou alokongshi. Ngü nitü ngiomong shingkü ngioji, ni nung tsüchhikü naito lühom ahom nai yaküto ngüso niko tsaktso tsühashi- e. Ni aakih apem nouko angjatsün tü phopkü nungbao atsaoting aküo noi-e.”

⁸Nungaih Nokpao nou khuküta noknio bekhan dongko moknoi. Apa khaiuniasoüh nung lulanai ngüso apa lemkü kamshin. Nungphiai, Israelhai apem momo tsamai laokü khuwankhem.

⁹Goumchi thapekkü ngüso mongkolu li-e au yachu. Ngüso mongko chitekü ngiom, “Nokpao Davidüh sam ehso ainou sam kipsan.” Apaüh sam Filistiahai ainou kipsan, lüko lo apa Absalom ainou khulükhunkü goum- chi nou le-ankü khuwan.

¹⁰“Samüh Absalom nung sam nokpao au theau tsomkiu, lüko apa ehli nai loatkü wan. Nungtiphe khaiunia ajantso to nokpao David nialokü shiau tiauta tsükhu?”

¹¹Israelhai ti chiteji nung ngem nou nokpao David ngoi-iu. Nungtiphe apaüh Yihuda aheihoi nouso tü sangau meson Zadok si Abiathar ne hongkü ngiom, “Nokpao nou apa noikham nai laokü shishitsün tü hachuau asam tiauta phitengau the-e?

¹²Asam jü tsammongso noin, jüshe naiuso jünyih, ngü laokü kanjikan shiau thaiutha asam phiau tiauta the-e?”

¹³Davidüh lüko ngüso tü Amasa tü lüngio ta ngio. “Ni jü tsammong noin. Lo nai yakü ngü ni jüsüpaihoi ahei the-au Joab thangko taiukiuji. Ngü nung tsüchhikü naito, Goa nou ngütü ee nou ashiuh!”

¹⁴David ngioüh Yihudahai mong apem thumkü shiolowan, naiuso ngüsoüh apa dongai apa khemko noitsün asonghoi apem hakü laokü shiau ngio hong.

¹⁵Nokpao nou apa yamai laokü shi taoko Yihuda khaiuniahoi nouso apako Yordan Haiu sai ai phete, nungko ngüso Gilgal nai shikü apa haiu yankü lamthioau noiküla.

¹⁶Naiuso Gera thso Shimei, Benjaminhai nou Bahurim nok ainou khaiunia hoikü nokpao David ko pheteau liukü tsalo.

¹⁷Apako Benjamin kau ainou khaiunia heng 1000 hakü noiküla. Naiuso Ziba sau Saul tsammongso tsamki nou noiküla, apa lüko apa melothso chekü pungo naiuso tsamkihoi khei hakü shin, naiuso ngüso Yordan nai nokpao khako shisaom.

¹⁸Ngüsoüh nokpao nouso lamthiokü haiu nou yankü khu, naiuso nokpao nou tilüsong mongchioji nung chhi chhiaulu noiküla. Nokpao nou haiu yanau khemlotsün taonai, Shimei apa nokpao khako kauthiokü

¹⁹ngiom, “Asuhatkü noitsün Nokpao, ni Yirusalem le-ankü khutsün ajekhaiuko nai ngü nitü aphio chhitaiu nou tsüojinyangkü awankiu. Nung thaiutha loto ti layangshi.

²⁰Ngü angei chhi-iu ta ngü ngeji, APAOU, nung shioko ajenapki mele nouso ainou ngü chong ni asuhatkü noitsün Nokpao ko pheteau lonyi shiji.”

²¹Zeruia thso Abishaiüh ngiom, “Shimei loatkü wanau noin, tiautenai APAOU nou nokpao theau chosantsün tsak tü athesan kiutsün apa tsak noin.”

²²Lüko Davidüh Abishai naiuso apa dei Joab tü ngiom, “Asam ayang tü sauüh saoji? Asamüh ngü hau angja kiu-e süne? Lo Israel nai nokpao tsak nou ngü noin, naiuso lonyi Israelhai sau lünou loatkü tsüwane.”

²³Naiuso apaüh Shimei tü ngiom, “Ni tsüloate ta ngü nitü ngioji.”

²⁴Nungaih Saul thsao nou Mefiboshet, nokpao ko pheteau saom. Nokpao ashiolotsün epkü molaoji- kanshikün lektso, nokpao nou Yiru- salem le-ankü khuwantsün taoko aita apaüh hok tsüpengan, sonpun tsü-iuwan, naiuso apa neshe tsüphe- tankü noiküla.

²⁵Tilai Mefiboshet Yirusalem ainou nokpao ko pheteau shisaom, nokpao nou apatü ngiom, “Mefiboshet, ni ngüko tsükhuha, tiauta tsükhuha?”

²⁶Apaüh thalakü ngiom, “Ngü chiokao khaiunia ta ni ngekü noin, Asuhatkü noitsün Nokpao. Ngü jütsamki tü niko aikü khuhaau ngü moknoiau gado tsak akhemsan ta ngiom, lüko apaüh ngü sapthiokiukü noin.

²⁷Apaüh jü thaiutha ni Asu- hatkü noitsün Nokpao, kausaiatiu, lüko nito Goa ün hongli noin, nung- tiphe nitü ti thakü noin ta yangji nung lüchhi.

²⁸Ni Asuhatkü noitsün Nokpao tsangkü nai jüpo tsam- mongso apem loatkü wanau maikü noin, lüko ni ngü hau athaisampuo ai heshiuhaau ayam nou kium. Ngü ni asuhatkü noitsün Nokpao ainou loüh nungtü piakü ni atsüojinyang tü saoshiau ayam tsünoi.”

²⁹Nokpao nou thalakü ngiom, “Ni ngioshiau ti tsünoishi. Ni naiuso Ziba ajeüh Saul tengkam janekü theau ngü thatlowaniu.”

³⁰Mefiboshetüh thalakü ngiom, “Nungso apem Ziba hau lüthe-i. Jü thaiutha to ni Asuhatkü noitsün Nokpao tsamai meikü yasaoshitsün nou saiuwaniu.”

³¹Gileadhai nou Barzillai lüko Rogelim ainou Yordan yankü nokpao lamthioau thaiutha saom.

³²Barzillai achetpon aopetjei sonkü khaiunia tsak noin. Apa thatü memei, naiuso tilai nokpao Mahanaim nai noiküla, apaüh nokpao hau eheshiu kium.

³³Nokpao nou apatü ngiom, “Ngüko hakü Yirusalem nai ashi, naiuso ngü ni paotsange.”

³⁴Lüko Barzillaiüh thalakü ngiom, “Ngü aakih laiukü kihshiau tsünoi, tiauta ngü ni Asuhatkü noitsün Nokpaoko hakü Yirusalem ai khu-e?

³⁵Ngü loto achetpon aopetjei ngoi-iu, naiuso loto tiühtso among- ling tsükiushi. Ngü ti heji naiuso shiuji, nung nyasitsünya tsüngeji, naiuso ngü jih hangnai sangh nou tsülulashiji. Ngü ni Asuhatkü noitsün Nokpao hau thsale kiutsün tsaklu noi-e.

³⁶Ngü nungtin paopei asong epao ti maikü tsünoi. Nungtiphe ngü niko Yordan yankü yam intsolu khuko.

³⁷Nungphiai ngü jütsamai laokü khukü jüposinyiu etam dongko lu eanko. Jüthso Chimham nungko noin apaüh ni paotsang-e; niko aikü apa lünialo, küta ni ameiting ta yangtsün apa thaiutha lüchhi.”

³⁸Nokpao nou thalakü ngiom, “Ngü apa ngüko aikü nialokü khu-e, naiuso ni tilüsong aiutsün nung apa thaiutha chhi-e. Naiuso ni ngü tü tilüsong sange nung ngü ni hau chhikiu-e.”

³⁹Nungaih David naiuso apa khaiuniaso apemüh Yordan yankü khu. Apaüh Berzillai tü chep, naiuso Berzillaiüh apa oukkiu küta apa tsamai laokü khuwan.

⁴⁰Tilai nokpao nou haiu nou yan apa Yihudahai khaiunia apemüh naiuso Israel khaiunia ajantsoüh ta lamthiokü Gilgal ai khu, naiuso Chimham apako khuha.

⁴¹Nungaih Israelhai apem nokpao dongai khukü apa tü ngiom, “Asuhatkü noitsün Nokpao, tiau sam deisinio Yihuda khaiuniahoi nousoüh ni nialokü, lamthioau, atsammongso, naiuso akhaiuniaso Yordan yankü khuau ngüsolu ayam thakü noin ta yangji?”

⁴²Yihuda khaiuniahoi nousoüh thalakü ngiom, “Tiautenai Nokpao nou sam ong ainou haphe, samüh nung chhin. Nungtiphe nungüh tiauta asam mongkia-iji? Apaüh sam hau eheshiu thaiutha amai tsükiu, tsüdekünai apaüh sam hau titso tsükiu.”

⁴³Israelhaiüh thalakü ngiom, “Samüh Nokpao David khako asam tü chejam piakü apato asam ongko nou tsaklu tü ngio lüko samüh ngioau to nungti noin. Asamüh sam tiauta lochi lotsaowanji? Nokpao laokü kankü shiau ayating nai sam ngio nung lape-an!” Lüko Israelhaiko naito Yihudahai ngiobao tekkü jeetsokü noiküla.