Read Khiamniungan Naga 2 Sam 2 Bible Online

2 Sam 2 - Khiamniungan Naga bible

2 Sam 2

¹Nungphiko Davidüh APAOU tü sangkü ngiom, “Ngo khuküta Yihudahai noksong ongko tsak ashiolo tümo?” Nungaih APAOU nou apatü thalakü ngiom, “Lükhu.” Davidüh sangshikü ngiom, “Ti sübao?” Nungaih APAOU nou thalakü ngiom, “Hebron.”

²Nungtiphe David apa tsammongnyiu nime- Jezreel ainou Ahinoam, naiuso Karmel ainou Nabal naiuso jihinyiu Abigailso nialokü Hebron ai khu.

³Nungko apaüh meshen khaiuniaso naiuso ngüso tsammongso nialo küta Hebron lemkü noksong nouso ai kihlo.

⁴Nungaih Yihudahai Hebron nai shiküta David Yihuda nokpao theau tsomkiu. Tilai Davidüh Gilead nai Jabes haiüh Saul khananiu ta lula,

⁵apaüh ngiongem tsak kankü khaiunia ajantso hong: “Asamüh asam APAOU Saul tü atsüojin hankü apa khanantsün thaiuthako APAOU ainou asam ouk lünoi.

⁶Naiuso lo APAOU nou asamko atsüojinyang kiukü asam tü ngiotsüo lünoi. Asamüh ti chhin nung shioko ngo lüko asam tü meikü kankei-e.

⁷Nungtiphe asam oukongkü naiuso mongsongkü lüthe! Asam nokpao Saul eaniu, naiuso Yihudahaiüh ngo ngüso nokpao au tsomkiu-iu.”

⁸Saul süpai ahei, Ner thso Abner, Saul thso Isboshet ko aikü Yordan yankü Mahanaim nai khulükhunkü noiküla.

⁹Nungaih Abnerüh Isboshet nung Gilead goumchi nai nokpao au shan, apa Asher, Jezreel, Efraim naiuso Benjamin goumchi nouso chiai nokpao, atsüoting naito Israel apem chiai nokpao noiküla.

¹⁰Apa Israel nai nokpao au shantsün taoko achetpon aopüle naiuso apaüh pon nime nok-shing. Lüko Yihuda mele to David tü mongkiukü noi,

¹¹naiuso apaüh Yihuda khako Hebron nai pon chinyat küta apaitso nok-shingkü noiküla.

¹²Abner naiuso Isboshet khemko noitsün asonghoi Mahanaim ainou Gibeon noknio ai khu.

¹³Zeruia thso Joab, naiuso David khemko asonghoi nouso Gibeon temkhao dongko pheteküta ngüso ahoi tsak temkhao etsai naiuso ahoi tsak temkhao etsai ta apem moknoi.

¹⁴Abnerüh Joab tü ngiom, “Samüh hoi pungkü ainou oumhoi ajantso shingsanküta oukong si tsükong khenge-iko.” Joabüh “nungti achhiko” ta thalakü ngiom.

¹⁵Nungtiphe Benjamin kau Isboshet liko khaiunia chekü nime naiuso David khaiunia chekü nime nousoko khengeau tsalo.

¹⁶Khaiunia pungkü nou momo wao-etsün tü khaiu nai thalo naiuso apa salaiu tensanküta uokhaiu nai chi, nungti khaiunia kheikü püle nouso aikü loikü ean. Nung Gibeon nai thawao- tsün athang nou tü “Sahsingiu Ke” ta jon.

¹⁷Nungaih ehli thatü thsüokü iu- lakü nungko Abner naiuso Israelhai David khaiuniasoüh shiolowan.

¹⁸Nungko Zeruia thsoso süme- Joab, Abishai naiuso Asahel hakü noiküla. Asahel nung jinchaili khaolaotsün khaiunia tsak

¹⁹apaüh Abner tü saitha chanlutkü kom.

²⁰Abnerüh phiai lapshikü thapküta ngiom, “Asahel, nung ni süne?” Nungaih apaüh “Ah, nung ngo” ta thalakü ngiom.

²¹Abnerüh ngiom, “Ngü tü komtsün alaowan!” “Süpaihoi ongko tsak phiai komkü khuküta apaüh ti kan nung lülo” Lüko Asahelüh apatü tsülaokü kom.

²²Loühjam Abnerüh apatü ngiom, “Ngütü komtsün alaowan! Ni loatau ngü tü tiauta choikeiji? Adei Joab ko ngü titi thekü phete some?”

²³Lüko Asahelüh akomtsün tsülao, nungtiphe Abnerüh apa lai phiai sheikü cheishi, nungai apa laiüh apa thai chatkü phiai sheikü lang. Nungaih Asahel nungko loikü ean, naiuso khaiunia pungkü sauhai nung athangai shin, apemüh apa loitsün ko laokü tsakü thap.

²⁴Lüko Joab naiuso Abishai ne tsalokü Abner phiai komkü khu, naiuso ngüso Gibea liutsa yam sübao Giah ajepek nai noin nung Amma kingai ajenap taoko shisaom.

²⁵Benjamin kau khaiuniahoi loüh Abner lemkü kamshiküta ngüso kingson nai tsakü noiküla.

²⁶Abnerüh Joab tü jonkü ngiom, “Sam athontsüyangkü ehli au noin süne? Athon naito akhosaklu nungtü simkü amao titso tsünoi-e ta ni tsüep süne? Sam agoumchi khaiunialu noin. Ni akhaiuniaso tü sam phiai komkeitsün ainou laoloau ngiokhem mokiukün khako atao tilektso noi-e?”

²⁷Joabüh thalakü ngiom, “Ngü aa Goa nianko ngiomong shingkü ngioji,” “ni nung tsüngiokü naito jü khaiuniasoüh ni tü lühom ahom saokü komkei-e.”

²⁸Nungaih Joabüh apa khaiuniasoüh Israelhai tü komtsün ainou laoloau ii tsak hankü jangongmat, naiuso nungti ali-etsün laolo.

²⁹Abner naiuso apa khaiuniaso asoh chikü tsakeikü Yordan tsamei yankü khu, ngüso Yordan Haiu yankü nungthan ahom thalutkü khuküta Mahanaim ai laokü shin.

³⁰Tilai Joabüh akomtsün lao- lowan, apaüh apa khaiuniaso apem jonkam, nungaih Asahel ko hakü apa khaiunia chekü lükao mowankü ngesan.

³¹David khaiuniasoüh Benjamin kau ainou Abner khaiuniaso 360 loatkü wan.

³²Joab naiuso apa khaiuniasoüh Asahel Betlehem nai apa tsammongso etam ai khanan. Nungaih ngüso asoh chikü keiküta a-ngethaiu Hebron nai laokü shisaom.