Read Khiamniungan Naga 2 Sam 20 Bible Online

2 Sam 20 - Khiamniungan Naga bible

2 Sam 20

¹Nungtaoko Benjamin kau ainou khaiunia tsak, Bikri thso atheau tsünoikün tsak Sheba ta niankü noiküla. Apaüh David dongai saongoikü poipoimatkü jonkü ngiom, “Sam David ko ti haoson tsünoi! Israel khaiuniaso, sam tsamai laokü khuwanko!”

²Nungtiphe Israelhaiüh David le-an küta Sheba ko hoilutkü khuwan, lüko Yihuda khaiuniahoi to David tü mongkiukü Yordan ainou Yirusalem saokü apa phiai hoilut.

³Tilai Davidüh Yirusalemai apa nokpao tsam shisaom, apaüh menyiu che apa tsam jimau taiukü khutsünso loshiküta ngüso tü ehükü wanan. Apaüh ngüsoüh pohtsün kium, lüko ngüso ko tsü emkam. Ngüso jihinyiuhai kihtsün aa khek- kü, aakih thathonkü athang mothikü nai wanan.

⁴Nokpao nou Amasa tü ngiom, “Ajekhaiu samnyi mongko Yihuda khaiuniaso ni lüko hakü nungai ajonkam.”

⁵Amasa ngüso jonkamau khu, lüko apaüh nokpao nou kiu- taiutsün ataoko jonkamau tsüshio.

⁶Nungtiphe Nokpao nou Abishai tü ngiom, “Shebaüh sam hau Absalom tü phopkü angja kiu-e. Jü khaiuniaso nialoküta apa phiai lükhu, tsüdekünaito apaüh noknio ajantso thaloküta sam ainou khulükhune.”

⁷Nungtiphe Joab khaiuniaso, nok- pao tengkhaiu ehühoi, naiuso Yirusalem nai Abishai ko poitaiutsün süpaihoi apem Sheba phiai khuha.

⁸Tilai ngüsoüh Gibeon nai lung asong tsak shisaom, Amasa ngüsoko phete. Joabüh ehli au thaiutha apa salaiu omkhi nou jenkü shinglutkü noiküla. Apa kha ai shinai, sahlaiu nou salian.

⁹Joabüh Amasa tü ngiom, “Jübaiu, ni titi noin?” ta apa tü son nai chepkü sonpun nai apa pha uai nou thalokü noiküla.

¹⁰Joabüh apa salaiu pha tsakai semkü noin ta Amasaüh titso atsüolo tsünoiküla, küta Joabüh apa thai nai chi, nungko apa thai ainou achinyan goh ai shikü nungailu ean, nungtiphe Joabüh apa tü tsüchishi. Nungphiai Joab naiuso anio nou Abishai ne Sheba phiai khu.

¹¹Joab khaiuniaso ongko tsaküh Amasa mea dongko tsaküta ngiom, “Khaiunia sauhai Joab naiuso David thaiutha nai noin, ngüso Joab tü ahoilut!”

¹²Amasa mea she nou meankü nung yamthopkü loithiokü noiküla. Mea nou ta khaiunia shikü thaptsün epküla, Joab khaiunia ongko tsaküh khaiunia mea nou yam ainou khengtaiu nai tenlükhun küta neshe-eng tsaküh patjeikü wan.

¹³Yam ainou mea nou lowankütün phiai khaiunia pungkü nou Sheba tü komau Joab tü hoilut.

¹⁴Shebaüh Israel mele goh apem yankü khuküta Abel Bet Maka noknio nai shin, naiuso Bikri kau mepem apem kamloküta noknio nai apa phiai hoilutkü nap.

¹⁵Tilai Joab khaiuniasoüh Sheba nungko noin ta lula, nungai ngüso khukü nung noknio thalowan. Ngüsoüh kengchi pe nou thako puo nou naiuso pe nou loian-iau akhei ai khan nou aokü thaiuküla.

¹⁶Nung noknio mongko angelatsün menyiu tsak noiküla, apaüh pe khaiu ainou sangh asong tsak nou vekü ngiom, “Anglu! Anglu! Joab tü nungai ashi ta lüngio; ngü apako chiteau mongchioji.”

¹⁷Joab khu, naiuso nyiuhai nou sangh, “Ni Joab süne?” “Ah, ngo,” ta apaüh thala. Nyiuhai nou ngiom, “APAOU, ngü tü anglu.” Apaüh thashin, “Ngü angluji.”

¹⁸Nyiuhai nou ngiom, “Pe taonai ngüsoüh nungti ngiokü noiküla, ‘Abel noknio nai khukü ni sangtsün lüthashi, lo lülo.’ Naiuso atsüoting ngüsoüh nung chhin.

¹⁹Sam noknio nung asong tsak noin, noknio ongko thatü aaloting, naiuso Israel nai ngiotsüo noitsün noknio tsak noin. Ni nung lotheanau tiauta koweji? APAOU ün ti noin nung lomowanau mongchiojiso?”

²⁰Joabüh thalakü ngiom, “Laitso tsüde!” “Ngü laitso anoknio tsülothe- e naiuso tsülomo-e!

²¹Nungto sam ayangtaiu tsüde. Efraim king goh ainou khaiunia Bikri thso Sheba ta niankü noiküla, naiuso apa nokpao David tü khengshiau tsalokü noiküla. Nung khaiunia tsak nou athakiuwan, naiuso ngü noknio ainou soiane.” Nyiuhai nou ngiom, “Samüh apa khaiu asam hau pekhaiu nai yakshi kiu-e.”

²²Nungaih nyiuhai nou nok- nio nai noitsün khaiuniahoi dongai apa ayangtaiu kankü khu, naiuso ngüsoüh Sheba khaiu taploküta Joab dongai pekhaiu yankü yakthiowan. Joabüh apa khaiuniasoüh noknio ainou soianau ii tsak hankü poipoi mat, naiuso ngüso tsamai laokü khu. Naiuso Joab nokpao dongai Yirusalem ai laokü shin.

²³Joab nung Israelhai süpaihoi ahei; Jehoiada thso Benaia nung David ün tengkhaiu ehü nousoko ahei;

²⁴Adoniram nung akeng chhisiya nai ahei; Ahilud thso Jehoshafat thsamsat nai ahei noiküla.

²⁵Sheba nung mikhem puo nai asat; naiuso Zadok si Abiathar ne meson;

²⁶naiuso Jair noksong ainou Ira lüko David mesonhoi ongko tsak noiküla.