Read Khiamniungan Naga 2 Sam 21 Bible Online

2 Sam 21 - Khiamniungan Naga bible

2 Sam 21

¹David nokshing taoko naiusile pon süme thatü thsüokü noiküla. Nungtiphe Davidüh nung thaiuthako APAOU tü sanglunai, APAOU nou thashin, “Saul naiuso apa tsamkhaiuüh Gibeonhai chaothio- wantsün thaiutha aphio noin.”

²(Gibeonhai to Israelhai tsüde, ngüso Amorhai ongko hoi ehentso tsak Israelhaiüh akiploau thalokü noiküla, lüko Saulüh apa mong- chiotsün Israelhai naiuso Yihudahai thaiutha ngüso lomowanau yangkü noiküla.)

³Nungtiphe Davidüh Gibeon khaiuniahoi jonkam küta ngüso tü ngiom, “Ngü asam thaiutha ti chhikiu au shio-e? Asam tü aphio chhikü shikü noitsün thaiutha ngü lomeikiuwanau aiuji, nungaih asamüh APAOU ün khaiuniahoi ouk kiu-e.”

⁴Ngüsoüh thalakü ngiom, “Sam Saul naiuso apa tsamkhaiu ko li-etsün mi to tangkason tsüdekünai chaiou lakkeng hakü lotsamau tsüde, tsüdekünai samüh Israelhai loatau aiuji ta lüko tsüde.” Davidüh sangkü ngiom, “Nungai- to, asam thaiutha asamüh ngü hau ti chhi-iau yangji?”

⁵Ngüsoüh thalakü ngiom, “Saulüh sam Israel nai aa tsaktso tsüpoitaiukü lomowanau aiuji.

⁶Nungtiphe Saul ün melothso nouso sam hau akiuwan, naiuso samüh APAOU nou chosantsün nokpao ün asong Gibea nai APAOU khako ngüso singatkü phanan-e.” Nokpao nou thalakü ngiom, “Ngü ngüso kiu-e.”

⁷Lüko apa naiuso Jonathan ngüne jetko asio athalou-e shanetaiu nou shioko, Davidüh Saul thsao, Jonathan thso Mefiboshet poiküwan.

⁸Aia menyiuthso Rizpa tsangkü Saul tü chetlutkiutsün melothso nime nou Armoni naiuso Mefiboshet naiuso Meholahai nou Barzillai thso Adiel tü Saul menyiuthso Merab tsangkü chetluttsün melothso pungo apaüh lo,

⁹David ün ngüso Gibeon khaiuniahoi hau lethiowan ngüsoüh king nai APAOU khako ngüso singatkü phanan, naiuso nung chinyat nouso apem aikü ean. Tilai ngüso loat, nungtaonai barli tso be-eiuyam yalotao, naiuso thsanyan nyim tao noiküla.

¹⁰Nungaih Saul menyiu Rizpa, Aia menyiuthsoüh mea kappoktaiu- tsün lung chiai apa thaiutha asoloau nyikong nou shankü tsamtso tsak lah, naiuso apa nungai be-eiuyam yalotsün tao ainou paithsam thuk tao a uotsün tü thalutkü noi. Anyi taoko apaüh waio nouso hau mea nou ta tsüthan-i; naiuso asoh taoko liu thainian hau tsüthan-ikü taiu.

¹¹Tilai Davidüh Rizpaüh ti in chhiji nung lula,

¹²apa khukü Gilead nai Jabes khaiuniahoi ainou Saul naiuso Jonathan uo loum.(Gilboa kingai Filistiahaiüh Saul loatküta phankü wan, nung Betshan nai apin khengtaiu ainou ngüsoüh kaulokü khu.)

¹³Davidüh Saul naiuso Jonathan ne uo loum, naiuso nungko hakü khaiunia chinyat singatkü phanattsünso uo loum.

¹⁴Nungaih ngüsoüh nokpao nou thoiluttsünli Benjamin goumchi ai Zela nai Saul po Kis etam nai Saul naiuso Jonathan uo nouso khanan. Naiuso nungphiai Goa nou ngüso goumchi thaiutha ngüso misao thalan.

¹⁵Nungaih Filistiahai si Israelhai ehli tsak lishin, nungko David naiuso apa khaiuniaso khukü Filistia haiko eh nou lih. Ehli tao tsak ko David tanatkü noiküla.

¹⁶Naiuso Isbibenob oukongting tsaküh apa pha nai sahlaiu alethsang taoson tsoithat nai süme küta apaitso nou semkü thokü noiküla, naiuso nungko apaüh David loatau yang.

¹⁷Lüko Zeruia thso nou Abishaiüh David hachu au shin, küta nung akongting nou tü po, kü apa loatkü wan. Nungaih David khaiuniasoüh David tü nung phiaito apa laitso ehlithang nai ngüsoko aikü lakhuha ta ngiom: Ngüsoüh ngiom, “Nito Israelhai thaiutha ayangtaiu noin, naiuso samüh ni mowani-au tsüaiuji.”

¹⁸Nungphiai Gob nai Filistiahaiko ehli tsak li, nung taoko Husha ainou khaiunia tsak nian Sibekaiüh akong khaiunia tsak Saph ta niankü loatkü wan.

¹⁹Loüh Filistia haiko amao ehli tsak Gob nai noiküla, naiuso Betle- hem ainou Jair thso Elhananüh Gat ainou Goliat loat, apa lai nelathsan son tsakli deithamkü noiküla.

²⁰Loüh Gat nai amao ehli tsak sungshi, nungko ehliau mongchio- tsün akong khaiunia tsak noiküla. Apa tü pha nemtso ai phakhatso luok luok pokü noiküla.

²¹Apaüh Israel- hai lochikiu naiuso David nio Shama thso Jonathanüh apa loatkü wan.

²²Nungso khaiunia püle nouso Gathai akongting thsaosithsoso noiküla, naiuso ngüso David naiuso apa khaiuniasoüh loatkü wan.