Read Khiamniungan Naga 2 Sam 23 Bible Online

2 Sam 23 - Khiamniungan Naga bible

2 Sam 23

¹Jese thso David sau Goa nou losongkiu, naiuso Yakob Goaüh apa nokpao theau chosankiu, apa Israel thaiutha jih alengmei nouso kamsantsün khaiunia tsak noiküla. Nung ngio nouso David ün athonting ngio noin:

²APAOU Onthso nou ngü tsangkü chiteji, apa ngiongem jüsonkou ai noin.

³Israel Goa nou ngiowaniu; Israel solotsün nou ngü tü ngiom, “Nokpao sauüh ngiotsüo nai nokshing shingji, sauüh Goa tü angio angji,

⁴apato thengmia tsünoikü ajeen uotsün khekkü noin, naiuso ah-uo phiai khengliu samsantsün khekkü noin.”

⁵Nungti Goa nou jü thsaosithsoso oukkiu-e, tiautenai apaüh ngüko athontsüyangkü hau, athalou-e tsak shankü noin, nung tsülotheankün athalou-e tsak noi-e, naiuso nung athalou-e nouto tsüli-eshikü hau nou noin. Nunglu ngü mongchiotsün noin; nungh jü ashiolotsün noi-e, naiuso Goa nou nung titilünou kankü shiau noin.

⁶Lüko Goa lun tsühattsünso to ayakkantsün tsaoli noin; saulünou nungsotü phajeüh thantanau tsüshioji.

⁷Ni son jengtsaiu tsüdekünai lai tsak kankeikü haulu noin, ngüso to thumkü in nai jawane.

⁸Davidüh taiutsün süpaihoi ateng nouso nian nungso noin: Chongting nou Takemon hai nou Yosheb Bashebet, noiküla, apa süme nouko ahei noiküla, apaüh lai lokkü 800 ko ehli nai, ehlithang tsak ko ngüso apem loatkü wan.

⁹Müjam nai süme nouko ahei Aho kau ainou Dodo thso Eleazar noiküla. Nyitso apa naiuso Davidüh ehli au kamshi noitsün Filistiahai tü tai, naiuso Israelhai phiai soikü shin,

¹⁰lüko apaüh meshen noithang mongloshi küta Filistia haiko apa pha nou salaiu lokshiau tsüshiokü mo-iulakün lektso ehli kü noiküla. Nung ajekhaiu nai APAOU nou ashiolotsün asong tsak kium. Nung yankütün phiai Israelhai Eleazar noi nai laokü shin küta eanhai jengtsaiu nouso tü thio.

¹¹Samjam nai apatü than nou Hararhai nou Agee thso Sahma noiküla. Filistiahai Lehi nai kamshin nungko chuom eiu tsak noiküla. Israelhai Filistiahai ainou khulükhunan,

¹²lüko Sahma apa eiu mongko anoithang shanlokü jiolo, naiuso Filistiahai loatkü wan. APAOU nou nung ajekhaiu ko lüko ashiolotsün asong tsak kium.

¹³Be-eiuyam tao yaloau shimkü David noitsün ken Adullam ai aheihoi “Ao sam” nouso ongko süme nouso saom, nungaih Filistiahai Refaim Tsamei ai ahoi tsak shantaiukü noiküla.

¹⁴David ehü keng nai noi- tao, Filistiahai hoi tsaküh Betlehem kihlowankü noiküla.

¹⁵Davidüh mongjuokü yangkü ngiom, “Khaiunia ajantsoüh lüko Betlehem bekhan dongko noitsün temkhao ainou khiam ngü shiuao kankü shiaoya!”

¹⁶Nungaih süpai ateng süme nousoüh ngüso Filistiahai saothang nou tsatkü khuküta temkhao ainou khiam intso khaiulokü David hau kankü shikü shen. Lüko apaüh nung tsüshiu; lüko apaüh nung APAOU hau chaithio tsakli tsapeng

¹⁷kü ngiom, “APAOU, ngü nung tilaitso shiuao tsüshio! Nung shiu naito nung khaiunia süme sauhaiüh ngüso aa thumkü kium ngüso she shiuthang noi-e!” Nungtiphe apaüh nung shiuao tsüaiu. Nungso süpai ahei süme nousoüh nou ateng chhisiya nouso noiküla.

¹⁸Joab nio (Zeruia thso) Abishai nung “Ateng Aosam” nouso ahei noiküla. Apaüh meshen lai tsangkü khaiunia 300 thako ehli, naiuso ngü- so loatkü wanküta “Aosam” ongko ateng iula.

¹⁹Apa “Aosam” nouko thatü ateng naiuso ngüso ahei iula, lüko apa “Süme” nouso lito ateng tsüdekü noiküla.

²⁰Kabzeel ainou, Jehoiada thso Benaia lüko süpai ateng tsak noiküla, apaüh mongsong chhisiya piakü chhin, nungko Moabhai lengsiya asong nime lüko loatkü noila. Apa ataojam nyinsao ajekhaiu tsak ko khan nai saom naiuso chongkhao tsak loat.

²¹Apaüh loüh Ijiphai asongting tsak lai semkü thokü noitsün loat. Benaiaüh apatü pha poh, Ijiphai nou phamong ainou lai nou aplo, küta nungüh apa chiatkü wan.

²²Nungso Benaia ün mongsong chhisiya nouso noin: apa “Aosam” nouko ateng tsak noiküla.

²³Apa ngüso ongko amaohaiüh tsüthayapkü tsak noiküla, lüko “Süme” nousolito ateng tsüde. Davidüh meshen tengkhaiu ehü au apa thiowan.

²⁴“Aosam” mongko mongthiohatsün amao mepem nouso: Joab nio Asahel Betlehem ainou Dodo thso Elha- nan Harod ainou Shamma naiuso Elika Pelet ainou Helez Tekoa ainou Ikkes thso Ira Anathot ainou Abiezer Husha ainou Mebunnai Aho ainou Zalmon Netofa ainou Maharai Netofa ainou Baana thso Heleb Bejamin goumchi Gibea ainou Ribai thso Itai Pirathon ainou Benaia Gaas shimkü tsamei ainou Hiddai Araba ainou Abiathon Bahurim ainou Asmavet Shaalbon ainou Eliahba Jashen Jonathan melothsoso Harar ainou Shamah Harar ainou Sharar thso Ahiam Maaka ainou Ahasbai thso Elifelet Gilo ainou Ahithofel thso Eliam Karmel ainou Hezro Arab ainou Paarai Zoba ainou Nathan thso Igal Gad ainou Bani Ammon ainou Zelek Joab ün ehli shitho kantsün Beerot ainou Naharai Jattir ainou Ira naiuso Gareb Hit hai nou Uriah. Nungso apem kamkü süpai ateng aosamkü chinyat noiküla.