Read Khiamniungan Naga 2 Sam 24 Bible Online

2 Sam 24 - Khiamniungan Naga bible

2 Sam 24

¹Loühjam APAOU nou Israelhai tü mongmat, naiuso apaüh ngüso dongai angja kankü shiau David tü lotsüokü ngiom, “Khukü Israel naiuso Yihuda khaiuniahoi avesan.”

²Nungtiphe Davidüh apa süpai ahei Joab tü ngiokhem kiukü ngiom, “Akhemko noitsün asonghoi hakü khukü Israel goh athon tsak ainou athon tsak saokü khaiuniahoi lüvesan. Ngü mepem titso noin nung ngeau aiuji.”

³Lüko Joabüh nokpao tü thalakü ngiom, “Asuhatkü noitsün Nokpao, APAOU a-Goaüh Israel khaiuniahoi ngüso lo noitsün tü tsom tsakjam tekkü shingkü lükhu-i, naiuso nungso iulatsün epkü ni aakih laiukü lünoi-i. Lüko Asuhatkü noitsün Nokpao, nung chhisiya au tiauta mongchioji?”

⁴Lüko nokpao nou apa khemko Joab naiuso asonghoi hau apa ngiokhem angkü chhi-i, nungtiphe ngüso apa letaiukü khuküta Israel khaiuniahoi mepem vesan.

⁵Ngüsoüh Yordan Haiu yanküta Aroer ajepekki nai saonai, Gathai goumchi ai, tsamei wemko nung nok- nio tsak noiküla. Nung ainou ngüso Jazer tü ajenapki nai khu,

⁶naiuso nung ainou Gilead ai, naiuso Hithai goh Kades nai khu. Nung ainou ngüso Dan ai khu, naiuso Dan ainou Sidon tü ajenap nai khu.

⁷Naiuso ngüso ajepekki Tair noknio ai khu, nung ainou Hivhai noknio, Kananhai noknio, naiuso athonting nai Bersheba tisübao Yihuda goumchi nai ajepekki nai noin nungso apemai khu.

⁸Nungtiphe ngüsoüh goumchi apem thapekkü tsakei küta alei lükao ajekhaiu khei nouko Yirusalem ai laokü yashin.

⁹Ngüsoüh nokpao hau melohoi süpai chhisiya nai theau omkü noitsün apem kamkü nai Israel nai heng 800, 000, naiuso Yihuda nai heng 500, 000, ta vesankü kiu.

¹⁰Lüko Davidüh mepemveling loküta, apa mongyang aalo tsünoi: naiuso apaüh APAOU tü ngiom, “Ngü nung mepemveling chhitsünko thatü thsüokü angei sunlo-iu! Tsüojinyang- kü ngü hau awankiu. Ngü mongyang tsüpungkün chhi chhi-aniu.”

¹¹APAOU nou David ün e-po Gad tü ngiom, “Lükhu, küta David tü lüngio, APAOU nou nungti ngioji, ni choloau ngü chhi ayam süme ai kiuji, nungso ong ainou tsak lüchosan, ni sübao singlo-e nung ngü chhi-e.” Nungthan nyap ahom David chukü noi nai,

¹³E-po Gad apa dongai shiküta APAOU nou ti ngiom, nung apa hau chiten, küta sangkü ngiom, “Nungh sübao nou the-e? Agoum- chiko naiusile pon süme tsüdekünai ni meshen ehoi nousoüh komtsün ai- nou pon süme khukeiau, tsüdekünai agoumchi ko imkia ajekhaiu samnyi nou the-e? Lo nung tü lüyanglu, küta ti athashi ngü APAOU dongai kankü khu-e nung ngü tü angioshi.”

¹⁴Davidüh thalakü ngiom, “Ngü angja aküo nai noin! Lüko ngü khaiunia hau angjakiu-iau tsüaiu. APAOU apa pemühlu sam hau angja akiu-i, tititenai apa to atsüojinyang noin.”

¹⁵Nungtiphe APAOU nou Israelhai khako apaüh mocholokün khako yakü imkia tsak hong. Goumchi athon tsak ainou athon tsak nou mongko Israelhai heng 700, 000 ean.

¹⁶Tilai APAOU ün hong nou Yirusalem lotheanau noiküla, APAOU nou hong nou tü angja kiuau yangtaiutsün ainou naiuso loatanau ainou laoloau ngiom, “Alaolo! Nungüh saiuwaniu!” Naiuso APAOU hong nou Jebushai nou Arauna tsonyak nyatsün dongko noiküla.

¹⁷Davidüh hong nou khaiuniahoi loattsün nung epkü APAOU tü ngiom, “Aphiotsün ngü tsak noin. Tsü- thakün chhisiyatsün ngü tsak noin! Nung khaiunia nousoüh ti chhikü noin? Ni ngü naiuso jütsamkhaiu hau angja kiuau noin.”

¹⁸Nung ajekhaiu kolu e-po Gad David dongai khuküta ngiom, “Khu- kü Arauna tsonyak nyatsün dongko APAOU hau amthang tsak lüshan.”

¹⁹Davidüh APAOU ün athoilut nouso angio angkü apa tü e-po Gad tsangkü ngiotsünli khun.

²⁰Araunaüh thapi nai nokpao naiuso apa khemko asonghoi apa dongai sungtsün ep. Apaüh meshen chija goh ai David khako kauthio,

²¹kü ngiom, “Asuhatkü noitsün Nokpao, tiauta ni nungko noin?” Davidüh thalakü ngiom, “Imkia lolaoau thaiutha APAOU hau amthang tsak lahsanau ni nou tsonyak nyatsün tuhloau shikü noin.”

²²Araunaüh ngiom, “Nung lülo, Asuhatkü noitsün Nokpao, naiuso ni tilüsong mongchioji nung APAOU hau chaithio lükiu. In nai jahkü amthang nai kiuao nungko jangtsopong, naiuso khe nouso naiuso anyatsün khiupo nouso ajahpai ao theau nungso noin.”

²³Araunaüh nungso apem nokpao hau kiuwan naiuso apa tü ngiom, “APAOU, a-Goaüh ni thiotsün chaithio nouso alokiu.”

²⁴Lüko nokpao nou thalakü ngiom, “Tsüde, ngü nung thaiutha ni hau amai nou kiu-e. Atuh tsütuhkün to ngü APAOU jü Goa hau chaithio tsükiu-e.” Nungti apaüh tsonyak nyatsün athang nou tuhlo, naiuso tangkason aopungo nou jangtsopong nou tuh.

²⁵Nungaih apaüh APAOU hau amthang tsak shanküta nungko ajahtsün chaithio naiuso aalo chaithio nouso kiu. Nungko APAOU nou apa misao thalakü, Israel nai imkia nou lolaokiu.