Read Khiamniungan Naga 2 Sam 6 Bible Online

2 Sam 6 - Khiamniungan Naga bible

2 Sam 6

¹Loühjam Davidüh Israel nai süpai ameiting nouso jonkam, ngüso apem nai mepem heng 30, 000 noiküla,

²ngüso Yihuda nai Athalou-e Ngiokhem Paidan süpao tü Akongting APAOU nian nou achiai akoi püle potsün thainian langlutkü taiu nung kankü shiau Bala ai nia- lokü khu.

³Ngüsoüh nung kingkhaiu nai noitsün Abinadab tsam ainou loküta nung tsamkei ayan tsak ko thio. Abinadab thso Uzza si Ahio ne

⁴ongko Ahio chong au thekü tsamkei nou niakü khu.

⁵David naiuso Israelhai apemüh APAOU lomsan, ngüso oukong apem nou jih hangkü noiküla. Ngüsoüh kokiang khongkü, poipoi matkü, paidan patkü, apat nai sangh alangtha khukhukü noitsün paidan patkü, naiuso longthong nou saiusaiukü nianlomkü noiküla.

⁶Ngüso Nakon tsonyaknya thangai shin, nungaih jangtsopong sübao nou Athalou-e Ngiokhem Paidan tsamkei nai thiokü tenkü noiküla nung khia-an nungaih Uzzaüh apa phaüh nung thalo.

⁷APAOU nou Uzza thako mongmat sungküta apa loatkü wan, tiautenai apaüh asuhat kiukü tsüchhikü noiküla. Uzza nungko Athalou-e Ngiokhem Paidan dongko ean,

⁸nungko yakü nung athang noutü Perez Uzza ta jon.(Athat- Uzza hau angja kiutsün) APAOU nou Uzza hau amongmat nai angjakiu nou shioko David thsüokü mongmatkü noiküla.

⁹Nungaih David APAOU lun hatkü ngiom, “Ngo Athalou-e Ngiokhem Paidan nou lo titi thekü kankü khu-e?”

¹⁰Nungtiphe apaüh Athalou- e Ngiokhem Paidan nou Yirusalem nai apako kankü tsükhuau yanglo, nungliko apa amao yamai phokle küta Gat noknio paopung tsak Obed Edom tsamai kankü khu.

¹¹Nung Athalou-e Ngiokhem Paidan nungko alei süme taiuwan, naiuso APAOU nou Obed Edom naiuso apa tsamkhaiu ouk kiukü noiküla.

¹²Nokpao Davidüh Athalou-e Ngiokhem Paidan taiu nou shioko Obed Edom apa tsamkhaiu, naiuso apaüh taiutsün alum ouk-iu ta lula, nungtiphe apaüh nung Athalou-e Ngiokhem Paidan nou Obed Edom tsam ainou loküta amkham asongting tsak kiukü Yirusalem ai kankü khu.

¹³Khaiuniahoi nouso Athalou-e Ngiokhem Paidan pikü keikom luok khuküta, Davidüh ngüso lolao küta apaüh APAOU hau jangtsopong tsak naiuso jangtso atsateng tsak loatkü chaithio kiu.

¹⁴Davidüh nepat amatchai loküta apa oum nai kheilutkü, meshen oukong apem nou APAOU hau asuhat kiukü jih hang.

¹⁵Nungti apa naiuso Israelhai apem Athalou-e Ngiokhem Paidan nung amongling sangh asong nou naiuso poipoi matngemkü Yirusalem ai kankü sungh.

¹⁶Athalou-e Ngiokhem Paidan nou noknio Yirusalem ai kankü shinai, Saul menyiuthso Maikelüh apa tsam koukhantso ainou thapshinai, apaüh Nokpao David asio jih hangtsün nai hamkeikü hangkü ep, nungaih apa tü chinyan-i.

¹⁷Ngüsoüh Athalou-e Ngiokhem Paidan kankü shikü ta Davidüh athang shantaiutsün Nejenkhio mongai taiu. Nungaih apaüh loatkü amkhamtsün chaithio nouso, naiuso aalo chaithio nouso APAOU hau kiu.

¹⁸Tilai apaüh aloat chaithio thiotsün nouso khemlo, apaüh khaiuniahoi nouso Akongting APAOU nianko ouk kiu,

¹⁹naiuso ngüso chikü hau eheshiu sunkü kiu. Apaüh Israel nai noitsün pohai naiuso nyiuhai pungkü hau themtsailop tsak, naiuso nyih atsao tsaokü apem tsak naiuso haothai intso ta kiu. Nung phiai khaiunia pungkü momo tsamai laokü khuwan.

²⁰Nungphiai tilai David apa tsammongso tü salam ngioau tsamai khu, Maikhel apa ko pheteau shikü ngiom, “Lonyi Israel nokpao nou apa thaiutha niansong tsak shaniu!” “Apa khemko asonghoi yathsüotsün menyiuthso nouso khako apaüh meshen chija maingahai tsakli haniu!”

²¹Davidüh thalakü ngiom, “Sauüh ngo apo naiuso apa tsammongso liko apa khaiuniaso ahei the-iau shankiu nung APAOU asuhat kiuao ngo hamkü jih hangkü noiküla. Naiuso loüh ngo APAOU hau asuhat kiuau jih hangkülu khu-e,

²²naiuso ngo jüchija loüh tekkü lomiamlo-e. Nito ngo ti tsüde ta yangau shiom, lüko nung menyiuthso nousoüh to ngo tsokkü lomsane!”

²³Saul menyiuthso Maikelüh methso tilaitso tsüchetkü noiküla.