Read Khiamniungan Naga 2 Sam 7 Bible Online

2 Sam 7 - Khiamniungan Naga bible

2 Sam 7

¹Nokpao David loto apa nokshing noikham nai noilo, naiuso APAOU nou apa ehoi apem ainou kipsankü taiu.

²Nungaih nokpao nou e-po Nathan tü ngiom, “Ngo nungai cedar pai nou lahtsün tsam nai kihkü noin, lüko Goa Athalou-e Ngiokhem Paidan nouto nejenkhio nai wankü noin!”

³Nathanüh thalakü ngiom, “Amongpem ai yangtsün apem lüchhi, tiautenai APAOU niko hakü noin.”

⁴Lüko nungsoh nai APAOU nou Nathan tü ngiom,

⁵“Ngü yathsüo- tsün David tü khukü ngü ngiotsün nung lüngio, ‘Ngo noiau thaiutha Amkham Tsam tsak lah au khaiunia nou ni tsüde.

⁶Ijip ainou Israelhai ngo kipsankü shitsün atao ainou lo saokü nouko ngo tilaitso Amkham Tsamai tsünoi; ngo nejenkhio nai noikü tsakeikü shin.

⁷Israelhaiko tsakeikü shitsün chikü nouko ngo tilaitso aheihoi tü ngo noiau cedar pai nou lahkü amkham tsam tsak lah- sanau sautso chosankü tsüsangh.’”

⁸“Nungtiphe ngü yathsüotsün David tü, Ngo APAOU, Akongting nou ngioji ta lüngio, ‘Ngo ni khengtaiu nai onnemok hoi jimkü noitsün ainou nialo naiuso jü khaiunia Israelhai nokpao au shankiu.

⁹Ni tilüsongai khukü noiküla, ngo niko hakü shin, naiuso ni kha ai khutsünko ngo a-ehoiso apem shiolo-in. Ngo ni goumchi athum nai aheihoi ongko asongting tsak shane.

¹⁰Ngo jü khaiunia Israelhai thaiutha athang tsak chosaniu, nungaih ngüso loto tilaitso athangmang tsünoishi-e naiuso ngüso nungko noilo-iu. Ngüso nung goumchi nai naptsün atao ainou mongthe hoi nou ngüso tü pha pokü noiküla, lüko nung tsüthawao- ishi-e. Ngo ni a-ehoi ainou kipsankü taiu-e, naiuso ni hau thsaosithsoso kiu-e ta thalou.

¹²Tilai ni eane, ni apaosiposo ko hakü khanane, ngo athsoso ongko tsak nokpao shane, naiuso apa nokshing mongkü taiu-e.

¹³Jü thaiutha amkham tsam tsak lah au khaiunia nou apa tsak noi-e, naiuso apa nokpao noikham athontsüyangkü noi-e.

¹⁴Ngo apa po noi-e naiuso apa jüthso noi-e. Tilai apaüh aphio chhi-e, po tsaküh meshen thso lohattsünli ngo apa lohat-e.

¹⁵Lüko ngo sau, ni nokpao the-au thaiutha wanantsün Saul tü chhikü shitsünlito, ni ainou ahachu laokü tsülowane.

¹⁶Ni thsaosithsoso asaita taiu-e, naiuso ngo anokshing athontsüyangkü shane. Anokshing noikham tilaitso athon tsüyange.’”

¹⁷Nathanüh David hau Goa nou apa tü atsangshei hantsün alum chiten.

¹⁸Nungaih Nokpao David APAOU noitsün Nejenkhio nai khukü moknoi küta misaokü ngiom, “Akhengting APAOU, ni jü thaiutha chhikiutsünko ngo naiuso jü tsamkhaiu titso maikü tsünoi.

¹⁹Lüko loüh ni nungtü phopkü chhiji, Akhengting APAOU, ashiau noitsün pon nousoko ni jü thsaosithsoso thaiutha athalou shankiu. Naiuso ni nung khaiunia tsak hau epiji, Akhengting APAOU!

²⁰Ngo nitü loüh ti ngioshi-e! Ni yathsüotsün ni ngeji.

²¹Nung chhi chhiau thaiutha ni mongchiokü noiküla, nung chhisiya asong nouso ni ngü hau tsandeau thaiutha chhin.

²²Ni titi asong, Akhengting APAOU! nungko ni khekkü sau tsünoi; nilu Goa noin ta samüh asaita ngekü noin.

²³Ni sübao khaiuniahoi sua aküo ainou Israelhai kipsantsün khekkü goumchi nai amao mele tsaktso tsünoi. Ni ngüso thaiutha chhisiya asong naiuso athanga chhikiutsün nou aniansong goumchi apem tha- pekkü pengkü khu-iu. Khaiuniahoi sauhai ni Ijip ainou akhaiunia theau soktham, nung akhaiuniaso kha ai khutsün taoko ni amao mele nouso naiuso ngüso goa nouso koman.

²⁴Ni Israel athontsüyangkü thaiutha akhaiuniahoi shaniu, naiuso ni APAOU ngüso Goa iula-iu.

²⁵“Naiuso lo, APAOU Goa, ni jü thaiutha, naiuso jü thsaosithsoso thaiutha thalotsün atao chikü thaiutha athawaokiu, naiuso ni chhi-e ta ngiotsün nung achhi.

²⁶Aniansong asong iula-e, naiuso khaiunia nou asaita ngio-e, ‘Israel khako APAOU nou Akongting Goa noin.’

²⁷Akongting APAOU, Israelhai Goa! Ngo nung misao nitü sao au mongsongkü noin, tiautenai ni nung apem ngü ni yathsüotsün tü tsangsheikü haniu, naiuso ni jü thsaosithsoso athontsüyangkü nokpao au shane ta ngü tü ngio-iu.

²⁸“Naiuso lo, Akhengting APAOU, ni Goa noin, ni athalotsünso asaita taiuji, naiuso ni nung athanga athalo nou ngüko shaniu.

²⁹Ngüso ni nou atsüojinyang tsülaokü epkü noiau jü thsaosithsoso oukkiu ta ngo nitü sangji. Ni Akhengting APAOU nou nung thalo-iu, nungtiphe ni nou ouküh jü thsaosithsoso khako asaita jimkü noi-e.”