Read Khiamniungan Naga 2 Sam 8 Bible Online

2 Sam 8 - Khiamniungan Naga bible

2 Sam 8

¹Atao intso phiai Nokpao Davidüh loüh Filistiahai komshin, ngüso oukong goumchi nai nungko thonkü shin.

²Nungthankü apaüh Moabhai shiolo. Apaüh sua nouso goh ai sai-i, naiuso khaiunia süme nouko nime to loatkü wan. Naiuso Moabhai apa yathsüotsün iula naiuso apa hau liukim nou kium.

³Nungaih Davidüh Zoba goh Seriahai nokpao, Rehob thso Hadadezer apa meshen goh Eufrates haiu yamkhengh ainou apa oukong nai thaloshiau akhu yamko nai shiolo.

⁴Davidüh mokthso chiai moknoitsün süpaihoi heng 1, 700, naiuso hok ko keitsün süpaihoi heng 20, 000 ta thalo. Apaüh tsamkei tsom tsak thaiutha mokthso nouso saiukü singtaiu loküta apoi nouso apem chiune iula-ikü shankiu.

⁵Tilai Damaska nai noitsün Seriahaiüh Nokpao Hadadezer tü hachuao süpaihoi tsak hong, Davidüh nungsotü pha pokü heng 22, 000 loatkü wan.

⁶Nungaih apaüh süpaihoi asaothang ngüso goumchi nai shan, naiuso ngüso apa oukong khemai shi-an naiuso apa hau liukim kiukü noiküla. APAOU nou David hau alumai ashiolotsün kiu.

⁷Davidüh Hadadezer ün asonghoi nousoüh kankeitsün lakkeng shii nou thalo naiuso nungh ngüsoüh Yirusalem nai kankü khu.

⁸Apaüh loüh Beta naiuso Berothai noknio Hadadezerüh nokshingkü noitsün ainou taoson nouso athat piakü lowan.

⁹Hamat Nokpao Toiüh Hadadezer süpaihoi apem Davidüh shiolowaniu ta lula.

¹⁰Nungtiphe atao piaküjam Toiüh Hadadezer thako ehlikü shitsün, Davidüh shiolo nung thaiutha amongling ngio ngioau apa thso Joram hong. Joramüh David hau chaiou lakkeng, tangkason naiuso taoson nou shantsün paopei nouso kankü khu.

¹¹Nokpao Davidüh nungso amkham nai kankeiau thaiutha apaüh shiolokü shitsün mele nouso naiuso kankü shitsün tangkason, naiuso chaiou lakkeng nousoko hakü losiokü wan.

¹²Apaüh shiolokü shitsün mele nouso nungso noiküla: Edom, Moab, Amon, Filistia, naiuso Amalek-nungko Hadadezer ainou lotsün jengtsaiu nouso haove nai hakü noiküla.

¹³Jem Tsamei nai Edomhai heng 18, 000 loatküta, tilai apa laokü shin, David loüh tekkü niansong iula shin.

¹⁴Apaüh Edom goumchi meankü süpaihoi akihthang shankütaiu, naiuso nungai noitsün khaiuniahoi apa yathsüotsünso iula. Nungti APAOU nou David khutsün apem nai ashiolo nou kiu.

¹⁵Davidüh Israel nokshing athum khako naiuso khaiuniahoi apem khako ngiotsüo kankeikü noiküla.

¹⁶Zeruia thso Joab nung apa süpaihoi ongko ahei noiküla, naiuso Ahilud thso Jehoshafat nung ngiolat sattsün nai ahei noiküla.

¹⁷Ahitub thso Zadok, naiuso Abiathar thso Amalek ne meson noiküla; nungko Seraia nung asattsün noiküla;

¹⁸Jehoiada thso nou Benaia nung David ün tengkhaiu ehü nai ahei naiuso David thsoso meson noiküla.