Read Khiamniungan Naga 2 Sam 9 Bible Online

2 Sam 9 - Khiamniungan Naga bible

2 Sam 9

¹Nyitso Davidüh, “Nungai Saul tsamkhaiu ainou khaiunia ajantso poishikü noimo? Ajantso noi naito, ngo apatü Jonathan liko atsüojinyang hanau aiuji,” ta sang.

²Nungko Saul tsamkhaiu nai Ziba ta niankü ayathsüotsün tsak noutü David dongai lükhu ta ngiom, tilai apa khu, nungaih Nokpao nou apatü “Ni Ziba süne?” ta sang. Apaüh thalan, “Ni yathsüotsün ngo noin APAOU.”

³Nokpao nou apatü sang, “Ngo Goa tü thalokü taiutsün ngiotsüo naiuso atsüojinyang chhi hanau Saul tsamkhaiu ainou khaiunia ajantso poishikü noimo?” Zibaüh thalakü ngiom, “Nungko Jonathan thsoso ongko losaokü tsak noin. Apa chiune noin.”

⁴Nokpao nou sangshin, “Apa tiai noin?” Zibaüh thalakü ngiom, “Apa Lodebar nai Amiel thso Makir tsamai noin.”

⁵Nungaih Nokpao Davidüh apa jonau hong.

⁶Tilai Saul thsao Jonathan thso nou Mefiboshet shisaom, apa David khako asuhat kiukü kauthio. Davidüh “Mefiboshet,” ta jon, apaüh thalan, “Ni yathsüotsün ngo noin APAOU.”

⁷Davidüh ngiom, “Lahat,” “Apo Jonathan kothako ngo nitü atsüo- jinyang noi-e. Ngo apao Saul goh apem nihau laokü kiushi-e, naiuso ni jüpuo ai asaita monglingkü lo-e.”

⁸Mefiboshet loühjam kauthioküta ngiom, “Ngo jii mea tsak chiai ti meikü tsünoi APAOU! Ni tiauta ngütü nungti mei-an-e?”

⁹Nungaih Nokpao Saul yathsüo- tsün Ziba tü jonkü ngiom, “Ngo ni nou APAOU ün thsao Mefiboshet hau Saul naiuso apa tsamkhaiu ün nou alum kiuji.

¹⁰Ni athsoso, naiuso ni yathsüotsünsoüh Saul tsamkhaiu thaiutha eiu nou ah-e, naiuso ngüso hau eheshiu kiuao be-eiuyam yame. Lüko Mefiboshet to jüpuo ai asaita mesan atengtingau thekü noi-e.” (Ziba thsoso melothso chekü pungo naiuso ayathsüotsünso khaiunia kheikü nime noiküla.)

¹¹Zibaüh thalakü ngiom, “Ni Nokpao nou thoiluttsün ngo apem chhi-e.” Nungtiphe Mefiboshetüh nokpao puo nai heshiuha, nung nokpao thsoso ongko apa thso khekkü noiküla.

¹²Mefiboshet thso melothso tsak Maika ta niankü noiküla. Ziba tsamkhaiu mepem apem Mefiboshet yathsüotsün iula.

¹³Nungti Mefibo- shet, sau hok nemtso chiune noiküla, apa Yirusalem nai kihkü apa eheshiu apem nokpao puo nai heshiuhakü noiküla.