Read Khiamniungan Naga 1 Nokpao 1 Bible Online

1 Nokpao 1 - Khiamniungan Naga bible

1 Nokpao 1

¹Nokpao David loto sonkü shi naiuso apa tsamkisoüh apa hau ateitham ne nouso tenkiu, lüko nungüh alamtsün tsüep.

²Nungtiphe apa khemko noitsün asonghoi nou apa tü ngiom, “Asuhatkü noitsün Nokpao, samüh niko lamekü noiau naiuso ni paotsangau mesothsohai tsak yame. Apa nitü shimkü sai-e naiuso ni lamkü taiu-e.”

³Israel apem ai meso alengmei tsak thaiutha thapekkü yam, naiuso ngüsoüh Shunem ai meso alengmei tsak Abishak ta niankü epsan, naiuso nung meso nou nokpao hau kankü shin.

⁴Nung menyiu athapau meso thatü meikü noiküla, apa nokpao dongko taiukü apa tü paotsang, lüko nokpao nou apako tsüem.

⁵Loto Absalom eanphe, David naiuso Haggit ne thsoyamchong Adonija poikü noiküla. Apa pühe naiuso shisileng meitsün khaiunia tsak noiküla. Naiuso Davidüh apa tü ti thaiuthakotso tsüthutkü wan, naiuso apa nokpao theau ayang noiküla. Apaüh meshen thaiutha ehli tsamkei, mokthso, naiuso khaiunia aopungoüh niakü khuau khemkü taiuküla.

⁶

⁷Apa (Zeruia thso Joab) naiuso meson Abiathar ko chite, naiuso ngüso apa tü hachuau mongchio.

⁸Lüko meson Zadok, Jehoiada thso Benaia, e-po Nathan, Shimei, Rei, naiuso David ün ehühoi nouso Adonija mongthat ko tsümongchioha.

⁹Nyitso Adonijaüh Enrogel haiu shimkü Pao Lung ta jontsün nai on- nemok, jangtsopong, naiuso jangtso atsa nouso aloat chaithio kiukü noiküla. Apaüh Nokpao David thso amao nouso naiuso Yihuda ainou nokpao khemko asonghoiso nung chaithio sümai nai haau jon,

¹⁰lüko apaüh apa dei Solomon, e-po Nathan, Benaia, naiuso nokpao ün tengkhaiu ehühoi tüto tsüjonha.

¹¹Nungaih Nathan Solomon nyiu Batsheba dongai khukü apa tü sangkü ngiom, “Haggit thso Adoni- jaüh apa chija nokpao shanlo-iu ni tsülu süne? Naiuso Nokpao Davidüh nung thaiutha titso ngekü tsünoi!

¹²Ni apim aa nou naiuso athso Solomon aa kipsanao aiu naito,

¹³ngo ni Nokpao David dongai loteng khukü apa tü nungti lüsanglu ta ayamhanji, ‘Asuhatkü noitsün Nok- pao, ni tü jüthso Solomonüh lilo-e ta ni ngiomong shingekü tsüthalo taiu süne? Nungaito, titi thekü Adonija nung nokpao iula-iji?’”

¹⁴Naiuso Nathanüh ngioshin, “Nungai ni Nokpao David ko chitekü noitaoko, ngo nappe naiuso angiolat lomong- kiu-e.”

¹⁵Nungtiphe Batsheba Nokpao nouko pheteau apa asai tsampai nai nap. Nokpao nou thatü sonnankü, Shunem ainou menyiuthso Abishaküh apa paotsangkü noiküla.

¹⁶Batshebaüh nokpao khako goh ai kauthio, nungaih nokpao nou sangkü ngiom, “Ni ti aiuji?”

¹⁷Batshebaüh thalakü ngiom, “Asuhatkü noitsün Nokpao, ni tü thankü jüthso Solomon nokpao theau ni ngü tü APAOU a Goa nianko ngiomong shinge tsak shankü noin.

¹⁸Lüko nokpao hau Adonija theaniu, naiuso nung thaiutha ni titso tsünge.

¹⁹Apaüh jangtsopong, onnemok, naiuso jangtso atsa nouso piakü loatkü chaithio kiuwaniu, naiuso apaüh athsoso, meson Abiathar, naiuso a-süpaihoi ahei Joab, sümai nai jon, lüko apaüh athso Solomon to tsüjonha.

²⁰Asuhatkü noitsün Nok- pao, Israelhai apemüh nitü sauüh liloau noin nung ngüso hau chiteau taiukü noin.

²¹Ni tsüchhikü naito, ni eanphitengko yakü jüthso Solomon jetü akausai haili kankei-e.”

²²Batsheba chitekü noitaoko Nathanüh nokpao tsam shisaom.

²³E-po shikü noin ta nokpao nou lula, naiuso Nathan lüko nokpao tsamai nap naiuso kauthiokü nokpao hau asuhat kiu.

²⁴Nungaih apaüh ngiom, “Asuhatkü noitsün Nokpao, Adonijaüh nitü nokpao noikham lilo-e ta apin khako velutaniu süne?

²⁵Lonyilu apaüh jangtsopong, onne- mok, naiuso jangtso nouso piakü kankü chaithio thioau khuwaniu. Apaüh athsoso apem, a-süpaihoi ahei Joab, meson Abiathar jonkü loting ngüso sümai nai sang songkü, ‘Adonija Nokpao Aakihlaiu Lünoi!’ ta vekü khaiuniahoi nou apako ngemji.

²⁶Lüko apaüh ngü, meson Zadok, Benaia, naiuso Solomon sam to tsüjonha APAOU.

²⁷Akhemko noitsün asonghoi hau lüko ni tü sauüh nokpao theau lilo-e ta tsüchitekü ni Asuhatkü noitsün Nokpao nou nung ayam thakü noin ta chhin süne?”

²⁸Nokpao Davidüh ngiom, “Bat- sheba tü tsamai laokü anapshi ta lüngio” naiuso apa shikü nokpao nou khako tsakü noi.

²⁹Nungaih nokpao nou apa tü ngiom, “Sauüh ngü angja apem ainou kipsankium, nung aa noitsün APAOU nianko ngo ni tü thalokü ngioji,

³⁰APAOU, Israel ün Goa, nianko lonyi ngo nitü athso Solomonüh jü nokpao noikham lilo-e ta thalokü taiutsün nung kankei-e.”

³¹Batshebaüh asuhat kiukü kauthiokü ngiom, “Jü APAOU Nokpao athontsüyangkü lünoi!”

³²Nungaih Nokpao Davidüh Zadok, Nathan, naiuso Benaia tü jonau hong. Tilai ngüso tsamai nap,

³³nokpao nou ngüso tü ngiom, “Jü nokpao mikhem asonghoiüh lam- thioko, ngü nou mokthso chiai jüthso Solomon moknoikü, Gihon haiu ai lünialüthio,

³⁴nungai Zadok si Nathan neüh apa Israelhai nokpao theau tsomkiu au noin. Nungaih jangongmatkü ‘Solomon Nokpao Athontsüyangkü lünoi!’ ta sang songkü lüvelut.

³⁵Tilai apa nungko jü nokpao noikhamai shikü moknoi-e apa phiai hoilutkü lükhu. Apaüh ngo nokpao lilo-e, tiautenai ngü Israel naiuso Yihuda khako nokpao theau chosantsün apa noin.”

³⁶Benaiaüh thalakü ngiom, “Nung chhi-e,” “naiuso APAOU a-Goaüh nung lülomongkiu.

³⁷Ni Asuhatkü noitsün Nokpao nouko APAOU hakü shitsünli, apa Solomonko lüko hakü lünoi-i, naiuso apa nokshing ni nou nokshang tü phopkü shingkü ashankiu.”

³⁸Nungtiphe Zadok, Nathan, Benaia, naiuso nokpao tengkhaiu ehühoi nou Solomon, Nokpao David ün mokthso chiai moknoi-i naiuso Gihon haiu ai ngüsoüh apa lamthio- kü khu.

³⁹Zadoküh APAOU noitsün Nejenkhio ainou kankü shitsün Olip khiam naptsün meng nou loküta Solomon tsomkiu. Ngüsoüh jangong nou mat, naiuso khaiunia apem nou, “Solomon Nokpao Aakihlaiu athon- tsüyangkü lüthe!” ta sang songkü vekü ngiom.

⁴⁰Nungaih ngüso apem apa phiai hoilutkü tsülaokü amongleng nou poipoi matkü, goh lemlemao lümeikü sang thsüokü vekü shin.

⁴¹Adonija naiuso apa mesan apem nou sümai khemlokü shitsün taoko nung sangngem nou lula. Naiuso tilai Joabüh jangongmat ngem sangh lulan, nungaih apaüh sangkü ngiom, “Noknio nai sangngem nung ti athat noin?”

⁴²Apaüh chitetsün mokhem- kü khako, meson Abiathar thso Jona- thanüh shisaonai, “Nungai anap,” ta Adonijaüh ngiom. “Ni khaiunia amei tsak noin- nito ngem amei tsak kankü shikü noi-e.”

⁴³Jonathanüh Adonija tü thalakü ngiom, “Ngü hatji,” “Asuhatkü noitsün Nokpao, Davidüh Solomon hau nokpao shankiu waniu.

⁴⁴Apaüh Zadok, Nathan, naiuso nokpao ün tengkhaiu ehühoi apa lamthioau hongkü noin. Ngüsoüh apa nokpao ün mokthso chiai moknoi-in,

⁴⁵naiuso Zadok si Nathan neüh apa nokpao theau Gihon haiu ai tsom- kiuwaniu. Nungaih ngüso amongling nou vekü noknio nai nap, naiuso loto khaiuniahoi nou ongko angem sungh. Nung ni lulatsün ngem noin.

⁴⁶Loto Solomon nokpao noin.

⁴⁷Mikhem noikham nai noitsün asonghoi nou Asuhatkü noitsün Nokpao David hau asuhatkiu au thaiutha apa tsamai nap, naiuso ngiom, ‘A Goaüh Solomon ni tü phopkü shingkü ashankiu, naiuso Solomon nokshang anok- shang tü phopkü shingkü anoi-i.’ Nungaih Nokpao Davidüh apa then ai kaukü amkham.

⁴⁸Naiuso misaokü ngiom, ‘Israel Goa, sauüh lonyi jü thsaosithsoso ongko tsaküh jü nok- pao lilo-iu, naiuso ngü hau nung epikü aakihlaiu nou kiu, samüh APAOU nian lomkiuko!’”

⁴⁹Nungaih Adonijaüh jonkamtaiu- tsün mesanhoi hat, naiuso ngüso apem tsajikan küta momo yamai pungekü khuwan.

⁵⁰Adonija, Solo- mon lun thatü thsüokü hat nou, APAOU noitsün Nejenkhio nai napküta amthang tsamniokun nouso tü thalo.

⁵¹Nokpao Solomonüh Adonija apa lun hatkü noin ta lula, naiuso apa amthang tsamniokun nouso tü helutkü noikü ngiom, “Chongting nai, Nokpao Solomonüh ngü loatkü tsüwane ta ngü tü ngiomongshinge tsak shanlo-iau aiuji.”

⁵²Solomonüh thalakü ngiom, “apa ngiotsüo noi naito, apa khaiu ainou khaiuo tsak tütso tsüthane; lüko apa ngiotsüo tsüdekü naito, apa eane.”

⁵³Nokpao Solomonüh Adonija dongai hongküta apa amthang ainou nialokü saom. Adonija nokpao dongai khu naiuso apa khako kauthio, naiuso nokpao nou apa tü ngiom, “Ni atsamai khuau shio-e.”