Read Khiamniungan Naga 1 Nokpao 11 Bible Online

1 Nokpao 11 - Khiamniungan Naga bible

1 Nokpao 11

¹Solomonüh gohmaohai menyiu piakü tsüojinkü iula. Ijip nokpao Farao menyiuthso lotsün chiai apaüh Hithai menyiu, Moabhai menyiu, Ammonhai menyiu, Edom- hai menyiu, naiuso Sidonhai menyiu piakü tsamsigoh yangkü noiküla.

²APAOU nou Israelhaitü nungsoko tsamsigoh yangetsün tsünoiau akiaptsün kiu, tiautenai ngüsoüh Israelhai tü ngüso mong amao goa nouso hau kiuwan-iau chhi-e nou ta shioko nung chhisiya chim.

³Solo- monüh tsammongnyiu 700 naiuso aphop taiutsün menyiu 300 noiküla. Ngüsoüh Solomon apa Goa ainou phoklekü khuwan-i,

⁴naiuso apa ason yamaito nungso menyiuhoi nou apahau gohmao goa nouso am- kham-i. Apato apa po David khekkü apa Goa APAOU nouko mongkiukü tsünoiküla.

⁵Apaüh Sidonhai menyiu sotsom Astart, naiuso Ammonhai achinyan sotsom Molek tü amkhamkü khuwan.

⁶Apaüh APAOU thako angei sunlo naiuso apa po Davidli Goatü mongtsükiu.

⁷Moab hai achinyan sotsom Kemos, naiuso Ammonhai achinyan sotsom Molek tü amkhamao apaüh Yirusalem tü ajepek king nai athang tsakko tsam tsak lahkiukü noiküla.

⁸Apaüh loüh gohmao tsammongnyiu nousoüh angannyamtsün jahkü aloat chaithio nouso kiuao athang naiuso tsam shankiu.

⁹APAOU, Israel Goa, Solomon dongai atao müjam tsangsheikü sungküta apatü gohmao goa nouso tsüamkhamau ngio lüko, Solomonüh APAOU ngio tsüangkü phoklekü khu- wan. Nungtiphe APAOU nou Solomon tü mongmat

¹¹kü ngiom, “Tiautenai ni ngoko athalou-e shantaiutsün ngengekü lotheanphe naiuso jü athoilut nouso angio tsü-angphe, ngo ni ainou nokshing kankü khuküta akhemko asonghoi ongko tsak hau kiuwane ta ngiomongshingkü ngioji.

¹²Lüko, apo David kothako ngü nung ni aa noitsün taoko tsüchhi-e, lüko nung athso nokshing taoko chhi-e.

¹³Naiuso ngo apa ainou nokshing athum kankü tsükhu-e; nungliko, ngo yathsüotsün David kothako naiuso ngo jüpemüh shankü taiutsün noknio Yirusalem kothako apa hau mele tsak taiukiu-e.”

¹⁴Nungtiphe APAOU nou Edomhai nokpao tsamkhaiu ainou Hadad nung Solomon thako eh iula-i.

¹⁵Nung khako tilai Davidüh Edomhai shiolo, apa süpaihoi ahei Joab nungh Edom nai ehoi mea khananau khukü noiküla. Apako apa khaiuniaso hakü Edom nai alei luok shamkü noi taoko ngüsoüh Edom nai noitsün melohoi apem loatkü wantsün

¹⁷taoko Hadad naiuso apa po yathsüotsün Edomhai ajantso Ijip nai haiulokü noiküla nungsolu poitaiu. (Nung taoko Hadad nung nionyaothso tsaklu noiküla.)

¹⁸Ngüso Midian wanküta Paran ai khuwan nungko khaiunia ajantso ngüsoko halutshi. Nungai ngüso Ijip nai khuküta nokpao dongai shin, nungai Hadad hau goh ajantso naiuso tsam tsak akih au kium naiuso apa hau eheshiu lüko kium.

¹⁹Hadadüh nokpao Farao haimei au shiolo, naiuso nokpao nou Hadad tsammongnyiu theau apa tsammong- nyiu Tapenes nio kiukü noiküla.

²⁰Nung nyiuhai nou apahau melothso tsak Genubat tü niankü chetkiu, naiuso nung melothso nou nokpao menyiu tsammong tsamai thashesan apa nungko nokpao thsosoko kihakü noiküla.

²¹Tilai Hadadüh David naiuso apa süpaihoi ahei Joab eaniu ta Ijip nai noikü nai lula, apaüh nokpaotü ngiom, “Ngü jü goumchi ai laokü akhu-i.”

²²“Tiau?” ta nokpao nou apatü sang. “Ngo nihau tsükiukü tso tsak phiowan süne? Nungüh ni a-goumchi ai laokü khushiao aiuji süne?” Hadadüh nokpao tü thalan, “Ngülu aya-anilu.” Naiuso apa meshen goumchi ai laokü ya. Hadad nung Edomhai nokpaophe, apa Israelhai thako eh atsaoting tsak noiküla.

²³Goa nou Eliada thso Rezon lüko Solomon thako eh sungi. Rezon nung apa APAOU Zoba Nokpao Hadadezer ainou khulükhunkü noiküla,

²⁴naiuso apa ngiokhem ko tsünoikünhoi tsakko ahei iula. (Nung Davidüh Hadadezer shioloküta apa paiu-etsün Siriahai chaoat phiai thawaokü noiküla) Rezon naiuso apa khaiuniaso khukü Damaska nai kih, nungko apa khaiuniasoüh apa Siria nokpao au shankiu.

²⁵Solomon aakih tao chikü Israelhai thako eh noiküla.

²⁶Amao khaiunia tsak sauüh Nokpao Solomon tü khengshi, nung apa khemko asonghoi ongko tsak Zereda ainou Efraimhai nou Nebat thso Jeroboam noiküla. Apa nung Jihinyiu Zeruia thso noiküla.

²⁷Akhengshitsün ngiolat nungti noin: Nokpao Solomonüh Yirusalem tü ajepek nai goh poksankü naiuso noknio pe nou shanshikü noiküla.

²⁸Jeroboam nung a-nge amon noi- tsün oum tsak tilai Solomonüh apa chhisiya nai mongkiukü kongkü chhitsün epsan, apaüh Jeroboam nung Manase si Efraim mele goum- chi nai chhi chhitsünso apem khako apaotsangau taiukiukü noiküla.

²⁹Nyitso, Jeroboam Yirusalem ainou khutsün taoko, Shilo ainou e-po Ahija apa pemsa yam ainou kengpun nai pheten.

³⁰Ahijaüh apaüh thokü noitsün phakhut ayan nou ngiosan, küta nung haoson chekü nime hau thekü chepek,

³¹küta Jeroboam tü ngiom, “Nung haoson che nouso athaiutha alou, tiautenai APAOU, Israel Goa nou nitü ngioji, ‘Ngo Solomon ainou nokshing nou kankü khuwanau noin, küta nihau mele che kiu-e.

³²Ngü yathsüotsün David kothako, naiuso Yirusalem noknio sübao ngü Israel goumchi athum ainou jü tengkhaiu thaiutha chosan nung kothako, Solomon phamongko mele tsaklu taiu-e.

³³Solomonüh ngo leankü gohmao goa nouso amkham- tsün shioko ngü nung chhi au noin: apaüh Sidonhai goa Astart, Moabhai goa Kemos, naiuso Ammonhai goa Molek amkhamkü khuwan. Solomonüh ngü tü angio tsü-ang; apaüh aphio nou chhianiu, naiuso apa po Davidüh chhikü shitsünli apaüh jü ngiokhemso naiuso athoiluttsünso tsaktso tsükankei.

³⁴Lüko ngü Solomon ainou nokshing athum to kankü tsükhu-e, naiuso apa aakihlaiu noitsün lektso ngü apa oukong nai taiu-e. Ngo nung ngü yathsüotsün David, sau ngo chosan naiuso sauüh jü ngiokhem naiuso athoilut nouso angio angkü kankei nung kothako chhi-e.

³⁵Ngo Solomon thso ainou nokshing che kankü khuwane küta nungh nihau kiu-e,

³⁶lüko Solomon thso hau mele tsak taiukiu-e, nungti ngü amkham au athang ngü chosantsün noknio Yirusalem nai ngü yathsüotsün David thsaosithsoso tsaküh asaita nokshing noi-e.

³⁷Jeroboam, ngü ni Israel nai nokpao shan-e, naiuso ni mongchiotsün goumchi chikü khako ni nok-shinge.

³⁸Ni ngütü thumkü angio angkü, jü ngiokhem nouso tsangkü kih naito, naiuso ti thoilutji nung chhisiyatsün tsangkü ngü mongchiotsün thalokü, ngü yathsüotsün Davidüh chhikü shitsünli chhi naito, ngo niko asaita noi-e. Ngü ni Israelhai nokpao shankiu-e ngü David thaiutha chhikiukü shitsünli, athsaosithsosoüh aphiai nokshing nai atsüoting shingshi-e.

³⁹Solomon ün angei shioko ngo David thsaosithsoso hau angja kiu-e, lüko asaita thaiutha tsüde-e.’”

⁴⁰Nungti Solomonüh Jeroboam loatkü wanao kowe, lüko apa Ijiphai Nokpao Shishak dongko pamlo, naiuso Solomon mo-eankün lektso apa nungko noi-an.

⁴¹Solomonüh chhitsün chhisiya alum, naiuso apa mongthat mongsai nouso apem, Solomon ün Ngiolat Thsam nai satkü taim.

⁴²Apa Yirusalem nai Israel apem khaiuko nokpao pon 40 the.

⁴³Apa eanküta David Noknio nai khanan, naiuso apa thso Rehoboamüh apa nokpao noikham lilo.