Read Khiamniungan Naga 1 Nokpao 12 Bible Online

1 Nokpao 12 - Khiamniungan Naga bible

1 Nokpao 12

¹Rehoboam Shekem ai khu, tiautenai ajenapki nai noitsün Israelhai apem apa nokpao shankiuau kamshikü noiküla.

²Tilai Nebat thso Jeroboam sau Nokpao Solomon ainou soluau Ijip nai khothiokü noiküla, apaüh nung ngiongem lula, apa Ijip ainou laokü yashin.

³Israel hai ajenapki nai kihtsünso apa dongai hong, naiuso ngüso apem kamkü Rehoboam dongai khuküta apatü ngiom,

⁴“Apo Solomonüh samtü thatü jeikü kankeikü shin. Lüko ni sam da thsale nouso lohekkü naiuso sam thaiutha aakih nou tsüchekkü kih au shankiu naito, samüh ni mongkiukü yathsüo-e.”

⁵Apaüh thalakü ngiom, “Samnyi mongko ashishi naiuso ngo nungai asam hau athashi nou kiu-e.” Nungtiphe ngüso laokü khu.

⁶Nokpao Rehoboam apa po Solomon hau alotsüo kiutsün ashehoi nousoko chite. Apaüh ngüsotü sangkü ngiom, “Asamüh ngütü nung khaiunia nouso hau ti athalatsün kiushiau lotsüoji?”

⁷Ngüsoüh thalakü ngiom, “Ni nung khaiunia nouso meikü yathsüo-e ta aiu naito, ngüsoüh kojatsün tü pohthakü athalatsün lükiu, nungaito ngüsoüh ni asaita mongkiukü yathsüo-e.”

⁸Lüko apaüh ashehoi nousoüh lotsüokiutsün tü mong tsükiukü nungliko apa mewe nousoüüh alotsüo kiutsün dongaibao phoklekü khuwan.

⁹Apaüh ngüso tü sangkü ngiom, “Asamüh ngühau ti chhi-iau lotsüoji, sauhaiüh ngütü ngüso cha lohekkü ashankiu ta sangji, nung khaiunia nousotü ngü ti ngio-e?”

¹⁰Ngüsoüh thalakü ngiom, “Ni ngüso hau nung chite au noin: ‘Jü phakha ehentso nou jüpo om tü intso teithamtso!’

¹¹Ngüso hau nung lüchite, ‘Jüpoüh asam hau cha thsüokü lethsangkü kan-ikü noiküla; ngü loüh nungtü tekkü lethsangkü shanshi-e. Apaüh asam tü aothsan nou shioh; ngo asam tü son nou shioh-e!’”

¹²Apaüh ngiotsünli samnyi phiai Jeroboam naiuso khaiuniahoi nouso apem Nokpao Rehoboam dongai laokü shin.

¹³Nokpao nou ashehoi tsangkü ayamhantsün wankü mewehoi nousoüh ayamhantsünli,

¹⁴khaiuniahoi nouso tü ngio kongkü chitekü ngiom, “Jüpoüh asam tü thsale kanlutkiukü noiküla; ngü nung loüh tekkü lethsangkü shanshi-e. Apaüh asam tü aothsan nou shiuhkü noiküla; lüko ngo to asam tü son nou shiuh-e!”

¹⁵Shilo ainou e-po Ahija tsangkü Nebat thso Jeroboam tü ti ngiokü noiküla nung thawaoau nung APAOU nou mongchiotsün noin. Nungti nokpao nou khaiuniahoi nou ngiotsün tü tsü-angkü noiküla.

¹⁶Tilai khaiuniahoi nou ngüsoüh ngiotsün tü nokpao nou tsü-anglukü ep, ngüsoüh sang songkü wekü ngiom, “David naiuso apa tsammong saowan-e! Ngüsoüh sam thaiutha ti chhikiukü shin? Israel khaiuniaso, sam tsamai khuwanko! Rehoboam hau apa thaiutha apa chija lüpaotsanglo-i!” Nungtiphe Israel khaiuniahoi nou khengshi,

¹⁷küta nokpao Rehoboam Yihuda goumchi mongko noitsün khaiuniahoi chikolu nokpao theau lean.

¹⁸Nungai Nokpao Rehoboammüh Adoniram, sau apa khemko chhisiya hoitü paotsangau taiukiuküla apa Israelhai dongai hongnai, nungko ngüsoüh apa lung nou yakkatkü wan. Nungai Rehoboam liuliukü apa mokthso tsamkei chiai moknoikü Yirusalem ai khulükhunkü haiulo.

¹⁹Nung atao nai yanou ajenapki nai noitsün Israelhaiüh David thsaosi- thsoso thako khengshikü noiküla.

²⁰Tilai Israelhaiüh Jeroboam Ijip ainou laokü shi-iuta lula, ngüsoüh apa akam tsak ko jonshiküta apa nokpao au shankiu. Yihuda kau lu David thsaosithsoso ko mei-ekü noiküla.

²¹Tilai Rehoboam Yirusalem nai shisaom, apaüh Yihuda naiuso Ben- jamin mele ainou süpai ameitinghoi 180, 000 nouso aikü jonkam. Apaüh ehli iuküta Israel ajenapki mele nouso khako nou nokshing oukong epshiau ayangtaiu noiküla.

²²Lüko Goa nou Rehoboam naiuso Yihuda si Benjamin mele nousoko

²³khaiuniahoi apem tü nung ngiongem kiuau e-po Shemaia tü chitekü ngiom:

²⁴“Israelhai adeisinioso lu noin ngüso tü lakom. Asam apem tsamai laokü khuwan. Ti thawaokü noiküla nung ngü mongchiotsün noin.” Nungai ngüso apemüh APAOU ngio angkü tsamai laokü khuwan.

²⁵Israel Nokpao Jeroboamüh Efraim king goh nai noitsün Shekem noksong meikü shansan naiuso apa nungko atao letletkü thaiutha kih. Nungai apaüh nung noksong wanküta Penuel noksong aleng meikü shanshin.

²⁶Jeroboamüh yanghekü ngiom, “Aküo lo lilu naito, jükhaiuniaso Yirusalem ai khukü Amkham Tsam ai APAOU hau aloat chaithio kiu nai ngüso mong Yihuda Nokpao Rehoboam dongai khuwanküta ngo loatkü wan-e.”

²⁸Nungtü yanghekütü phiai, apaüh chaiou lakkeng nou jangtso- pong athso nime shanküta apa khaiuniaso tü ngiom, “Asam Yirusalem ai amkham kiuao atao laiukü ai yakü khukü shi-iu. Israel khaiuniaso, asam Ijip ainou niasantsün goa nouso nungai noin!”

²⁹Apaüh nung chaiou lakkeng nou saitsün jangtsopong nime ongko tsak nou Bethel nai naiuso amao tsak nou Dan nai taiukiu.

³⁰Nungti khaiuniahoi nou Bethel naiuso Dan nai amkhamtsün tsangkü angei nou sunhe.

³¹Jeroboamüh kingson nouso ai amkhamthang nouso shanpengkü taiu, naiuso apaüh mesonhoi Levi kau ainou tsüdekü amao kau nouso ainou singlokü noiküla.

³²Jeroboamüh Yihuda nai sümai saohetsün khekkü, alei petjei ajekhaiu chekü pungo nouko saoheau don yamko sümai lüko shansankü noiküla. Bethel nai amthang apaüh shantaiutsünko chaiou lakkeng jang- tsopong hau apaüh aloat chaithio nouso kiu, naiuso apaüh shantaiu- tsün Bethel amthang nai yathsüoau mesonhoi nouso taiu.

³³Naiuso nung alei petjei ajekhaiu chekü pungo, sübao ajekhaiu apa chija thatsan, nung ajekhaiuko apa Bethel nai Israelhai thaiutha sümai saohetsün nyi nai amthang nai aloat chaithio kiuau sungh.