Read Khiamniungan Naga 1 Nokpao 13 Bible Online

1 Nokpao 13 - Khiamniungan Naga bible

1 Nokpao 13

¹APAOU ainou athoilut tsangkü Yihuda ainou e-po tsak Bethel ai khu naiuso Jeroboam nung amthang nouko aloat chaithio kiuao tsataiukü nai apaüh shisaom.

²APAOU athoilut tsangkü e-po nou nung a-amthang thako khengshikü wekü ngiom: “O a-amthang, a-am- thang, APAOU nou ngiotsün nungti noin: David tsamkhaiu ainou melothso tsak Josia ta niankü chette. Apaüh sotsom a-amthang nousoko yathsüotsün mesonhoi saühaiüh nihau aloat chaithio kiuji nungso akhako chaoate, naiuso apaüh akhako khaiunia uo nouso jah-e.”

³E-po nou tsülaokü ngiom, “Nung amthang nou paikü loi-an-e, naiuso nung chi ai noitsün inmot pengpune. Nungailu APAOU nou ngo tsangkü chite-iu ta asamüh nge-e.”

⁴Tilai Jeroboamüh nung lulan, apaüh nung khaiuniatü thsüokü ngiokhem kiukü ngiom, “Nung khaiunia nou lüthalo!” Nungai alekta nokpao pha tsopai-ekia nou shitha- lowan naiuso nung alekloshiau tsüshiokü iula.

⁵E-po nou APAOU nianko khapiam ngiotaiutsünli amthang nou alekta paikü loi-an küta lou nouso gohai hongpengan.

⁶Nokpao Jeroboamüh E-po noutü ngiom, “Tsüojinyangkü APAOU a-Goa tü jüthaiutha misao asaokiu, naiuso apatü jüpha alomeikiu ta asangkiu!” E-po nou APAOU tü misao sao, nungai nokpao pha meikü iula.

⁷Nungai nokpao nou e-po tü ngiom, “Ngüko hakü tsamai ashi küta tso tsak lühe. Ni ti chhikü noin nung thaiutha ngü nihau paopei kiu-e.”

⁸E-po nou thalan, “Ni ngü hau amemei jengtsaiu haoson awewe kiu lüko ngü niko khukü tsühe-e tsüdekünai titso tsüshiu-e.

⁹APAOU nou ngo tü titso tsüheau naiuso tsüshiuau thoilut, naiuso ngo nung yam tülu tsamai laokü tsüshishiau ngiom.”

¹⁰Nungtiphe apa ashitsün yamtü tsüdekü, amao yamtü ya-anshin.

¹¹Nung taoko nai Bethel nai sonthe E-po tsak kihküla. Apa dongai apa thsoso shiküta apahau nung ajekhaiu Yihuda ainou e-po tsaküh Bethel nai ti chhin naiuso Nokpao Jeroboam tü apaüh ti ngiokü noiküla nung ngio chiten.

¹²Sonthe e-po nou ngüsotü sangkü ngiom, “Apa laokü khutsün taoko apa yam sübao ai khukü noin?” Ngüsoüh apa hau yam nou han

¹³nungai apaüh ngüso tü apa noiau thaiutha meshen gado tsak akhemsan ta ngiom. Ngüsoüh nung chhikium, naiuso apa nung chiai moknoikü

¹⁴Yihuda ainou shitsün e-po tsakeitsün yamai saonai nung e-po apaüh lampai tsak khemko moknoikü ep. Apaüh sangkü ngiom, “Yihuda ainou e-po nou ni süne?” Ah, “Ngo noin,” ta nung khaiunia nou thala.

¹⁵Apaüh ngiom, “Jütsamai shiküta ngüko thaisam tao tsak anoi.”

¹⁶Lüko Yihuda ainou shitsün e-po nou thalakü ngiom, “Ngo niko tsamai khuau tsüshio-e tsüdekünai ni nou atsüojin thaloau tsüshio. Naiuso ngo niko hakü nungko titso heau naiuso shiuau tsüshio-e

¹⁷tiautenai APAOU nou ngütü titso lahe naiuso lashiu ta, naiuso ngo shitsün yamtülu lashishi ta thoilutkü noin.”

¹⁸Nungai Bethel ainou e-po sonthe nou apatü ngiom, “Ngo lüko, ni lilu e-po tsak noin, naiuso hong tsaküh ni jütsamai nialoküta ni hau jü atsüojin kiuau APAOU nou thoiluttsün tsangkü ngü tü ngiokü noin.” Lüko nung e-po sonthe nou yaang ngiokü noiküla.

¹⁹Nungtiphe Yihuda ainou shitsün e-po nung e-po sonthe tsamai khuküta apa ko heshiukü noiküla.

²⁰Ngüne chihe puo nai moknoitsün taoko, nung e-po sonthe dongai APAOU ngio tsak shin;

²¹naiuso apaüh Yihuda ainou e-po tü sang songkü welutkü ngiom, “APAOU nou ni apa ngio tsü-ang naiuso athoiluttsün tsüchhi ta ngioji.

²²Ni laolokü yashiau nou liko, nitü lahe ta ngiotsün ko thaisam tsak heao laokü khuwan. Nung chhisiyatsün shioko ni loatkü wan-e, naiuso a-mea atsammongso etam ai tsükhanha-e.”

²³Ngüneüh heshiukhem küta, nung e-po sonthe nou Yihuda ainou shitsün e-po nou thaiutha gado khemkiu

²⁴küta apa yakhu nai, yamai chongkhao tsak phetekü apa jeiatkü wan.Apa mea yamai noikü nung dongko chongkhao si gado lüko tsakü noiküla.

²⁵Khaiunia ajantso nung yankü khunai nung mea nou naiuso nung shimkü chongkhao tsa- noikü ep. Ngüso Bethel ai khuküta ngüsoüh eptsün khaiuniahoi hau chiten.

²⁶Tilai nung ngiongem e-po sonthe nou lulan, apaüh ngiom, “APAOU ün athoilut ngio tsüangkü noitsün e-po nou nung noin! Nungtiphe APAOU nou chongkhao nou hongkü apatü pokü apa loat nung APAOU nou chhi-e ta ngiotsün chhin.”

²⁷Nungaih apaüh apa thsoso tü ngiom, “Jü thaiutha gado akhemkiu.” Ngüsoüh nung apa hau chhikium,

²⁸naiuso apa nung gado chiai noikü khunai, gado naiuso chongkhao losaokü mokhukü nungko e-po mea yamai yaktaiukü noitsün dongko tsakü ep. Chongkhao nou nung mea tsühe tüdekünai gado nou tü tsüpokü noiküla.

²⁹E-po sonthe nou mea tenlo, küta gado chiai loklut, naiuso nung tü mongsaiu küta khananau Bethel ai laokü kankü shin.

³⁰Apaüh nungh mea apa tsammongso etam ai khanan, naiuso apa si apa thsosoüh nungti, “Oh jü deisinio, jü deisinio!” ta ngiokü mong- saiukü noiküla.

³¹Mea nou khanan- kütün phiai, e-po sonthe nou apa thsoso tü ngiom, “Ngo tilai eane, jü mea apatü shimkü nung etam nouko akhan.

³²APAOU athoilut tsangkü Bethel nai amthang thako naiuso Samaria noksong nouso ai amkham athang nouso thako sübao apaüh chiten nung atsüoting shithawao-e.”

³³Israelhai Nokpao Jeroboam apa angei chhisiya ainou tsüphokle, lüko apaüh lahtsün amthang nousoko yathsüoau mesonhoi athatha tsam- khaiu ainou cholokü noiküla. Khaiunia sauhaiüh meson theau mongchioji apaüh nung meson theau losiokiu.

³⁴Nung angei chhisiya nou apa tsammong nokpaoting yam athum thamokü lotheau kankü shin.