Read Khiamniungan Naga 1 Nokpao 14 Bible Online

1 Nokpao 14 - Khiamniungan Naga bible

1 Nokpao 14

¹Nung taoko nai Nokpao Jeroboam thso Abija akia iula.

²Jeroboamüh apa tsammongnyiu tü ngiom, “Ni nokpao nou ngo Israelhai nokpao the-e ta aya nai ngiokiutsün e-po Ahija kihtsün Shilo ai lükhu.

³Apa hau atsantsün themtsai che atsaotsün themtsai intso, naiuso liukhiam meng tsakko kankü lükhu. Je thso tü ti shithawao-e nung apatü lüsang, nungai apaüh nihau chite-e.”

⁴Nungtiphe nokpao tsammongnyiu Shilo nai Ahija tsamai khu. Nungai Ahija ason nou niovei pekkankü noiküla.

⁵Jeroboam tsammongnyiu apa thso akia noitsün thaiutha sangau shiji ta apatü APAOU nou ngiowankü noiküla. Naiuso APAOU nou Ahija hau athashiau nou nung chiteankü noiküla. Tilai Jeroboam tsammongnyiuüh Ahija tsam shisaom, nung nyiuhai nou apa amaohai tsakli kausaikü noiküla.

⁶Lüko tilai Ahijaüh nung nyiuhai nou koukhan nai shitsün lülan, apaüh ngiom, “Anap. Ni Jeroboam tsammongnyiu ta ngo ngeji. Ni tiauta amaohai tsakli thekü kausaiji? Ngo athaiutha ngiongem tsümeikü taim.

⁷Khokü Jeroboam tü Israel Goa APAOU nou nung ngioji ta lüngio: ‘Ngo ni khaiuniahoi ong ainou chosan küta jü khaiunia Israel khako nokpao theau shankiu.

⁸Ngü David thsaosithsoso ainou nokshing kankü khuküta nung nihau kiukü noiküla. Lüko nito ngo yathsüotsün David, sau ngüko mong thumkü kiukü, jü athoilut nouso kankeikü noiküla, naiuso ngo ti mongchioji nunglu chhikü noiküla, apali tsüde.

⁹Ni akhako nokpaohoi sauhai noiküla ngüsoüh phiowantsün tü simkü angei thatü thsüokü songkü sunlo-iu. Ni ngo lean-iu naiuso amkham au son sotsom nouso shantsün tsangkü ngo mongmat sungi-iu.

¹⁰Nung koko ngo anokshing khako asapat kankü shi-e naiuso methso si petche, athsaosithsoso apem loat-e. Ngo atsamkhaiu soian-e; ngüso khiam nou achinyan ji-antsünli tsaowan-e.

¹¹Atsammongso ongko ajantso noknio bekom mongko eithio nai nungso jih nou hean-e, naiuso ajantso kengpun nai ean nai nungso khaiunia mea hetsün letche nousoüh hean-e; ta nung Ngo, APAOU nou ngiowaniu.’”

¹²Ahijaüh Jeroboam tsammong- nyiu tü tsülaokü ngiom, “Lo tsamai laokü lükhu. Ni noksong nai kom- thiotsünko aikü athso ean-e.

¹³Israel khaiunia apemüh apa thaiutha mongsaiu küta khanan-e. Jeroboam tsamkhaiuko meikü paotsangkü khanantsün apa mealu noie, tiautenai APAOU Israel Goa monglengkü noitsün khaiunia tsak nou apalu noiküla.

¹⁴APAOU nou Israelhai khako nokpao tsak shane naiuso apaüh Jeroboam tsamkhaiu lothunkü wane.

¹⁵APAOU nou Israel hau angja kiu-e, naiuso apa haiu nai sangpai nouso tü saiukeitsün khekkü noi-e. Apaüh Israelhai nung goh amei sübao ngüso paosiposo hau kiutaiukü noiküla nung ainou seksan-e, naiuso apaüh ngüso Eufrates Haiu yankü pengpun-i-e, tiautenai ngüsoüh menyiu Ashera sotsom shantsün tsangkü apa mongmat sung-ikü noin.

¹⁶APAOU nou Israelhai lean-e tiau- tenai Jeroboamüh angei nai niakü khun.”

¹⁷Jeroboam tsammongnyiu Tirza ai laokü khu. Apa meshen tsamai napkü thunkü methso nou ean.

¹⁸Israelhaiüh apa thaiutha mong- saiu küta apa khanan, nung APAOU nou apa yathsüotsün e-po Ahija tsangkü ngiotaiutsünli noiküla.

¹⁹Nokpao Jeroboamüh chhitsün alum, apa ehli-ekü shitsün naiuso apaüh titi nokshingkü shin, nungso chikü Israelhai Nokpaohoi Ngiolat Thsam nai satkü taim.

²⁰Jeroboamüh pon kheikü nime nok-shing; küta apa ean naiuso khanan phiai, apa thso Nadabüh nokpao noikham lilo.

²¹Solomon thso Rehoboam Yihuda nai nokpao theau tsalotsün taoko apa achet pon aopülekü tsak noiküla, naiuso apaüh APAOU nou apa amkham-iau Israel apem hau athang chosantaiutsün noknio Yirusalem nai pon chekü chinyat nok-shingkü noiküla. Rehoboam nyiu nung Ammon nyiuhai Naama noiküla.

²²Yihuda khaiuniahoi nou APAOU thako angei sunlo, naiuso nungüh ngüso paosiposoüh chhitsün tü simkü ngüso thako APAOU amongmat tekkü sungi.

²³Ngüsoüh Ashera sotsom amkhamau thaiutha amthang, lungkheam nouso, king si paikhem nouso ai, tsam nouso lahkü taiu.

²⁴Apem chiko atsaoteng nou: nung amkham athang nousoko melo menyiuhoi nou meshen pem janhekü ajisiwop chhikü yathsüotsünso noiküla. APAOU nou Israelhai khutsün khako koman kiutsün khaiuniahoi nou chhisiyatsün amiam chhi nouso Yihuda khaiuniahoi nou chhikü noiküla.

²⁵Rehoboam nokshing pon pungo ngoitsün taoko Ijiphai Nokpao Shishaküh Yirusalem kom.

²⁶Apaüh Amkham Tsam naiuso nokpao tsam ainou jengtsaiu nouso apem kankü khuwan, nung ongko Solomonüh shantsün chaiou lakkeng shei nouso hakü noiküla.

²⁷Nungso liko Roho- boamüh taoson shei nouso shanshi naiuso nung nokpao tsam bekhan tü jimau thaiutha apaüh apa khemko asonghoi hau sonkiukü noiküla.

²⁸Nokpao Amkham Tsamai khutsün tao pungkü, ehühoi nou nung shei nouso kankü khuküta nungso ehühoi tsampai nai laokü shikü taiu.

²⁹Amao tilüsong Nokpao Reho- boamüh chhikü shin nungso chikü Yihudahai Nokpaohoi Ngiolat Thsam nai satkü taim.

³⁰Nung atao chikü Rehoboam si Jeroboam ne tsaksitsak ko ehli tsülaokü noikü shin.

³¹Rehoboam ean, naiuso apa mea David Noknio nai nokpao etam nai khanan; küta apa thso Ahijaüh apa nokpao noikham lilo.