Read Khiamniungan Naga 1 Nokpao 15 Bible Online

1 Nokpao 15 - Khiamniungan Naga bible

1 Nokpao 15

¹Israel Nokpao Jeroboam nokshing pon chekü petjei taoko, Abija Yihudahai nokpao tsalo,

²naiuso apaüh Yirusalem nai pon süme nokshingkü noiküla. Apa nyiu Absalom thso Maaka noiküla.

³Apaüh apa poüh angei sunlotsün- lilu chhikü, apa pau Davidüh APAOU apa Goako thumkü kiukü shitsün tsükhekkü noiküla.

⁴Lüko David kothako APAOU nou Abija hau Yirusalem nai apa thanko nokshing liluau melothso tsak kium. Naiuso Yirusalem noknio aalokü taiu.

⁵APAOU nou nung chhitsün tiautenai Davidüh Hithai nou Uria tü chhitsün aküo tü simkü apaüh thoiluttsün tsaktso angio tsü-angkü tilaitso tsüchhi lüko apaüh mongchiotsün ti noin nungso chhikü noiküla.

⁶Rehoboam si Jeroboam ne jetko ehli tisübao yachükü noiküla nung Abija aakihlaiu thumkü tsülaokü noiküla.

⁷Naiuso Abijaüh chhisiyatsün alum Yihudahai Nokpaohoi Ngiolat nai satkü taim.

⁸Abija ean küta apa David Noknio nai khanan, naiuso apa thso Asaüh apa nokpao noikham liloshin.

⁹Israel Nokpao Jeroboam nokshing pon kheikü nime nouko nai, Asa Yihuda nai nokpao tsalo,

¹⁰naiuso apaüh Yirusalem nai pon aopülekü tsak nokshing shing. Apa jii Maaka, Absalom thso nou noiküla.

¹¹Asaüh apa paosipo Davidüh chhi- kü shitsünli APAOU ti nou monglenge nung chhin.

¹²Apaüh ajisiwop chhi- siya tsangkü aakihtsünso sauhaiüh tsüngekünso goa amthang nousoko chhikü noin nungso apem apa goumchi ainou koman, naiuso apa khako thekü shitsün nokpao nousoüh chhitaiutsün sotsom nouso apem lowan.

¹³Apaüh apa jii Maaka menyiu nokpao noithang ainou lowan, tiautenai nung nyiuhai nou Ashera sotsom shankü noiküla, Asaüh nung sotsom hehongküta Kidron tsamei nai jah-an.

¹⁴Asaüh sotsom amkham thang nouso apem tsülothean lüko, apa aakihlaiu thathonkü APAOU nouko mongkiukü noiküla.

¹⁵Apa poüh Goa hau losiokü taiutsün jengtsaiu apem, naiuso apaüh losiotsün chaiou lakkeng nouso, tangkason nouso apem Amkham Tsam nai wan.

¹⁶Yihudahai Nokpao Asa naiuso Israelhai Nokpao Baasha ne nemtso nokshing oukong nai noitsün lektso asaita tsaksitsak ko ehli külu noiküla.

¹⁷Baashaüh Yihuda tü khengshi, küta Yihuda nai akhu ashi tsakeitsün yam kiapau thaiutha Rama noknio aleng meikü shanshiau tsalo.

¹⁸Nungtiphe Nokpao Asaüh Amkham Tsam naiuso nokpao tsam nai taiutsün chaiou lakkeng naiuso tangkason apem loküta Hezion thsao nou Tabrimmon thso Siriahai Nokpao Benhadad dongai Damaska nai apa khemko asonghoi ajantso tsangkü hongkü ngiongem kium:

¹⁹“Sam poso kihkü shitsünli sam mei-ekü noiko. Nung chaiou lakkeng naiuso tangkason nouso nihau paopei kiuji. Nungtiphe lo Israel Nokpao Baasha ko ni mei-etsün alaowan, nüngaito apaüh jü goumchi ainou apa süpaiso laolowan-e.”

²⁰Nokpao Benhadad Asaüh ayangkiutsünko mongchiokü iula küta apaüh meshen süpaihoi ahei naiuso apa süpaihoi Israelhai noknio nouso komao hong. Ngüsoüh Ijon, Dan, Abel Bet, Maaka noknio nouso Galil khiamnok athang shimkü naiuso Napthalihai goumchi athum thalokü noiküla.

²¹Tilai Nokpao Bashaüh thawaokü shitsün thaiutha lula, apa Rama noknio aleng lomeitsün chhisiya laoloküta Tirza nai khuwan.

²²Nungaih Nokpao Asaüh Yihuda goumchi apem thapekkü khaiunia sautso tsüwankü apem dongai ngio- khem tsak hongpengkü Baashaüh Rama noknio shanshiao kamshitaiu- tsün lung naiuso pai linsantaiu nouso Rama ainou kanlükhunau kiu. Nung jengtsaiu nou Asaüh Benjaminhai goh ai Mizpa naiuso Geba noknio aleng meikü shanshi.

²³Nokpao Asaüh chhiyatsün alum apa amongsong naiuso aleng lomeikü shanshitsün noksong nouso chikü Yihudahai Nokpaohoi Ngiolat Thsam nai satkü taim. Lüko apa ason taoko hok nai akia tsak tsangkü apa chiokau lothean.

²⁴Asa ean naiuso apa nokpaohai etam David Noknio nai khanan, naiuso apa thso Jeho- shafatüh apa nokpao noikham lilo.

²⁵Yihudahai Nokpao Asa nokshing pon nime nouko, Nokpao Jeroboam thso Nadab Israel nai nokpao tsalo, naiuso apaüh pon nime nokshing shing.

²⁶Apa khako apa po chhisiyali apaüh APAOU thako angei sunlo naiuso Israelhai angei nai niakü khu.

²⁷Isakar mele Ahija thso Baa- shaüh Nadab ta mongkhem naiuso apa Filistia nai Gibethon noknio thaloau apako apa süpaihoi hakü noi taoko apa loatkü wan.

²⁸Nung Yihudahai Nokpao Asa nokshing pon süme taoko thawaokü noiküla. Nungti Baashaüh Israelhai nokpao theau Nadab tü lilom.

²⁹Apa nokpao noikham nai noilokü thunkü apaüh Jeroboam tsammongso mepem chikü loat au tsalo. Shilo ainou APAOU yathsüotsün e-po Ahija tsangkü ti ngiokü noiküla, nungli Jeroboam tsamkhaiuko mepem tsaktso tsüpoi- kü loatkü wan.

³⁰Tiautenai nung Jeroboamüh Israelhai Goa APAOU nou mongmatikü angei sunlo naiuso Israelhai hau lüko sunhe-in, nungshioko thawaokü noiküla.

³¹Nadabüh chhisiyatsün alum Israelhai Nokpaohoi Ngiolat Thsam nai satkü taim.

³²Yihudahai Nokpao Asa naiuso Israelhai Nokpao Baasha ne nemtso nokshing oukong nai noitsün atao chikü nai tsak si tsak jetko ehli tsülaokü noiküla.

³³Yihudahai Nokpao Asa nokshing sampon nouko, Ahija thso Baasha Israel apem khako nokpao tsalo, naiuso apaüh Tirza nai pon kheikü püle nokshing shing.

³⁴Apa khako Nokpao Jeroboamühli apaüh lüko APAOU thako angei sunlo naiuso Israelhai apem angei nai nialokü khu.